Geeshsha Maxaafa
Isayaasa 2
Godaa Zuma
Amoxe na7ay Isayaasi Yihudabaanne Yerusalaameba be7idaysi haysa.
Wursetha gallasatan Godaa keethay keexetida zumay, zumata ubbaafe dhoqu gidi bentana; zuma ubbaafe bollara dhoqu gaana. Kawotethati ubbay iyako baana. Higgey Xiyoonepe, Godaa qaalay Yerusalaamepe keyiya gisho, daro asay yidi, “Ane haayite! Godaa zumako, Yayqooba Xoossa keethaako keyoos. Nuuni iya ogiyan baana mela I nuna ba ogiya tamaarsana” yaagana. I kawotethata giddon pirdana; daro asata palama shaakana. Enti banta mashshaa marasha, banta toora baaca kessana. Kawotethati kawotethata bolla mashsha denthokona; hizape enti ola timirte tamaarokona.1
Hinteno, Yayqooba kochato, haayite! Ane Godaa poo7uwan hemetoos.
Godaa Gallasa
Godaw, ne asaa, Yayqooba kochata aggadasa. Enti doloha bagga asaa Bitaaninne Filisxeeme asaa murunnuwan kumidosona; allaga asaara issifidosona. Enta biittan birinne worqey kumis; enta miishiyas zawi baawa. Enta biittan pari kumis; enta para gaariyas zawi baawa. Enta biittan eeqi kumidosona; enti banta kushe oosuwa goyinnoosona.
Hessa gisho, asa ubbay tooshettananne kawuyana. Enta nagaraa atto goopa.
Godaa daganthuwafenne yashshiya bonchuwafe attanaw zaallako biite; biitta giddon qosetite! Otoranchoti kawuyana; ceeqeteysati guuxana; he gallas Godaa xalaali dhoqu dhoqu gaana. Ubbaafe Wolqaama Goday, issi gallas otoranchota, ceeqeteysatanne bantana dhoqu dhoqu ootheyisata kawushana. Adussa Libaanose zigatanne Baasane wola ubbaa dhaysana; Dhoqa deretanne zumata dembayana. Katamaa naagiya adussa shakotanne mino dirsa gimbeta ziqi oothana. Goday gitanne lo77o markabeta haathan mitisana. Asa otoroy ziqi gaana; iya ceeqetethay dhayana. He gallas Godaa xalaali dhoqu dhoqu gaana. Eeqa ubbay polo dhayana.
Goday biitta qaathanaw dendiya wode iya daganthuwafenne iya yashshiya bonchuwafe attanaw asay shucha gongoloninne biitta ollan qosetana. He gallasay asay goyinnanaw medhida banta bira misiletanne banta worqa misileta girotasinne shirshiqotas yeggana. Goday biitta qaathanaw dendiya wode iya daganthuwafenne iya yashshiya bonchuwafe attanaw enti gongolo giddonne shucha za7o giddo baqatana.
Hiza shempoy siidhen de7iya, ha hayqiya asan ammanetofite. Asi ay maaddii?
Source notes (1)
- Cross-reference Iyyu 3:10.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.