Geeshsha Maxaafa
Isayaasa 15
Moo7abey Dhayana
Moo7abe biittaba Goday odida qaalay haysa:1 Moo7aben de7iya Era katamaynne Qiira katamay issi qamma laaletidi dhayidosona. Diboonan de7iya asay banta eeqa keethan yeekanaw dhoqa bessi keyidosona. Moo7abe asay Nebosinne Medebaas yeekees. Huuphe ubbay buluusetis; buuchi ubbay meedetis. Oge bolla kayo ma7o ma7oosona; pooqe bollanne dabaaba ubban yeekoosonanne afuthi dharcoosona. Haseboona asaynne Elaala asay waassoosona; enta waasoy Yahaaxa gakanaw si7etees. Hessa gisho, olas dancida Moo7abe wotaadareti banta qaala dhoqu oothidi waassidosona; enta shempoy kokoris. Taani Moo7abes wozanape yeekas; iyan de7iya asay Zo7aarenne Egilaat-Shelisha katamaa baqatis. Enti Luhita ogiyan yeekishe boosona; baggati qassi Horonayma biya ogiyan, banta dhayuwa gisho waaso goochidosona. Namirima haathati melidosona; maatay miccis; aacay shullis; cil7obay aybika baawa. Hessa gisho, enti banta shiishida shaluwanne minja tooki ekidi, Ahaya mithay de7iya zangaarape hefinthi efoosona. Moo7abe heera ubbay waaso xalaala gidis; enta waasoy Eglaamanne Bi7eer-Elime gakanaw si7etees. Dimoona haathati suuthi gididosona; shin, ha77ika taani Dimoona katamaa bolla kaseysafe aadhiya meto ehana. Moo7abepe kessi ekidi baqateyisata bollanne he biittan attidaysata bolla gaammo yeddada wursana.
Source notes (1)
- Cross-reference Isa 25:10-12; Ermi 48:1-47; Hiz 25:8-11; Amo 2:1-3; Sofo 2:8-11.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.