Geeshsha Maxaafa
Hose 12
Efreema asay wontafe omarsi gakanaw doloha carko oykees woyko yedethees. Enti wordonne geellatethi darsoosona; Asoore biittara caaqidosona; shamaho zayte Gibxe biitta yeddoosona.
Godaas Yihuda asaara mootoy de7ees; I Yayqooba nayta enta ogiyada seerana; enta oosuwada entaw zaarana. Yayqoobi ba aaye ulon de7ishe ba ishaa gindiya oykis. Dicci gakidi Xoossara butetis; kiitanchora baaxetidi xoonis. Bana keeha ayfen xeellana mela ba ishaa yeekidi woossis. Yayqoobi Xoossaa Beetelen demmin Xoossay yan iyara haasayis. I Godaa, Ubbaafe Wolqaama Xoossaa. Iya eretida sunthay Godaa geetetees. Hessa gisho, hinte Xoossaako simmite; siiqonne suure pirdaa minthi oykite; hinte Xoossay oothana gakanaw naagite. Zal7anchoy wordo mizaanen zal7ees; I asaa cimmanaw dosees. Efreemi, “Taani daro dure; taani taw aqo demmas. Ta aqo ubban tanan enti bala woyko nagara demmokona. Shin taani hintena Gibxe biittafe kessada ehida Godaa, hinte Xoossaa; Shaqara Ba7aale gallas hinte dunkaanen de7idaysada ta hintena zaara dunkaanen wothana. Taani nabetas odas; daro qoncethi entaw immas; enta baggara daro leemisota odas” yaagis.
Galadi iita nagarancho; Galada asati pathonayisata. Enti Galgalan kormata yarshana. Enta yarsho bessay goshshan de7iya keela shuchada laaletana.
Yayqoobi Soore biitta baqatis; Isra7eeley macho ekanaw une oothis. Koyta immanaw yan dorse heemmis. Goday Isra7eele asaa nabeta baggara Gibxe biittafe kessidi he nabeta baggara enta naagis. Shin Efreemi Godaa daro hanqethis; I suuthi gussida gisho iya Goday achana; iya cashshaa iyaw zaarana.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.