Geeshsha Maxaafa
Ibraawe 4
Hiza, Xoossay nuna ba shempo bessaa gelsana gida qaalay buroo sinthafe de7iya gisho, hintefe oonika he shempo bessaa gelonna attonna mela naagetoos. Entaw Wongelay sabbaketidaysada, nuuska sabbaketis. Shin enti si7idaba ammanidi ekiboonna gisho enta go77ibeenna. Gidoshin, alamey medhetoosape doomidi Xoossaa oosoy poletidaysa gidikoka, Xoossay,
“Taani ta hanquwan caaqada,
ta shempo bessaa ubbaka gelokona”
gidaysada, nuuni ammanidaysati iya shempo bessaa gelana.1 Laapuntha gallasaaba issi bessan, “Xoossay laapuntha gallasan ba ooso ubbaafe shempis” yaagis.2 Qassika he bessan, “Enti ta shempo bessaa ubbaraka gelokona” yaagis.3 Koyro Wongela si7idaysati kiitetonna ixidi shempo bessaa gelibookona. Yaaniya gisho, ha77ika he shempo bessaa gelana issi issi asati de7oosona. Hessa gisho, Xoossay, “Hachi” gidi xeegishe issi gallas nuus qanxis. Daro wodepe guye Xoossay Dawita baggara,
“Xoossay giyaba hachi hinte si7iya wode,
hinte wozanaa minthofite”
yaagidi odis.4 Iyyasuy entaw shempuwa immidaba gidiyako, Xoossay hara gallasaba guyepe odennashin.5 Hiza, Xoossaa asaas Sambaata shempoy naagetidi de7ees. Xoossaa shempo bessaa geliya oonika, Xoossay ba oosuwape shempidaysada ika ba oosuwape shempana.6 Hessa gisho, oonika he asaa kiitetetha ixuwa kaallidi, kundonaada Xoossaa shempo bessaa gelanaw minnoos.
Xoossaa qaalay de7onne ootheysa. Nam7u baggara qaratida mashshafeka aadhidi oco. I shempo, ayyaana, xaphonne kolize gakanaw kanthidi caddees. Qassi asa wozanan de7iya geemmida qofaanne amuwa shaakidi pirdees. Xoossaa sinthafe qosetiyabay ayba medhetethika baawa. Iya ayfe sinthan ubbabay qoncenne kallo de7ees. Nuuni zaaro immanaw bessey iya sinthana.
Yesuusi Gita Kahine Halaqa
Hiza, salo keyida gita kahine halaqay, Xoossaa na7ay Yesuusi, nuus de7iya gisho, nu ammanuwa minthidi naagoos. Nu kahine halaqay nu daaburiya wode nuus qadhetanaw danda7eysa. I nuuda ubbaban paacetisipe attishin, nagara oothibeenna. Hiza, maarotethaa ekanawunne maade koshshiya wode aadho keehatetha demmanaw aadho keehatethay de7iyasuwa Xoossaa araatako yayyonna shiiqoos.
Source notes (6)
- Cross-reference Maz 95:11.
- Cross-reference Medhe 2:2.
- Cross-reference Maz 95:11.
- Cross-reference Maz 95:7-8.
- Cross-reference Zaare 31:7; Iyya 22:4.
- Cross-reference Medhe 2:2.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.