Hizqeela 19

Isra7eele Kawotas Kessida Zelelsi

1Goday Hizqeelako, Isra7eele halaqatas haysada yaagada zeleela:

2“Hinte aayiya gaammota giddon waanida gaammo!

Yalaga gaammota giddon zin7ada, ba marata dichasu.

3Iya ba maratape issuwa dichin,

I wodala gaammo gidis;

shanka tamaaris; ase muussu doomis.

4Kawotethati ubbay iyabaa si7idosona;

enti bookida ollan gelidi oyketis;

siidhen wodoro aathidi Gibxe biitta efidosona.

5Iya aayiya naagidaysi hanonna ixin,

I ufaysay dhaydaysa be7ida wode,

ba maratape issuwa dichada, wodala gaammo kessasu.

6I wodala gaammo gididi, hara gaammota simeretis;

I shanka tamaaris; ase muussu oykis.

7I enta miixaa mentherethis; katamata dhaysis;

I gudiya wode biittan de7iya asa ubbay dagammees.

8Iya yuushuwan de7iya kawotethati ubbay

iya oykanaw xihe wothidosona;

banta gitiya miccidosona; enta ollan I oyketis;

9Enti iya sidhen wodoro aathidi hoothen yeggidi,

Babiloone kawako efidosona.

I gudeysi zaaridi Isra7eelen si7etonna mela

enti iya qasho keethan yeggidosona.

10Ne aayiya haatha doonan toketida woyne mela;

daro haathi de7iya gisho

woyney daashshaninne ayfen kumidi de7ees.

11Iya tasheti mino gidiya gisho

kawota xam7a gididosona.

Woyney woran de7iya mithatape aadhidi diccis;

ba tashiya darotethaaninne adussatethan

ubbaafe bollara bentis.

12Shin he woyney hanqon shodetidi sa7an yegetis;

doloha carkoy iya ayfiya melisis;

iya mino tashey melin tami mis.

13Ha77i I haathi bayna

mela biittan toketis.

14Tami iya ubbaafe keyidi,

iya ayfiyanne tashiya mis.

Kawota xam7a gidana mino tashey,

iya bolla bentibeenna.

Haysi yeeho zelelsi; haysa zelelsi kessiya wode go7etanaw bessees” yaagis.