Geeshsha Maxaafa
2 Sameela 8
Dawita Xoonota
(1 Taari 18:1-17)
Hessafe guye, kawoy Dawiti Filisxeemeta xoonidi haaris; yaatidi Meteg-Ama katamaa1 Filisxeemeta kushepe ekis.
Dawiti qassi Moo7abeta xoonis. I enta biittan zin7isidi kushen wadhis; entafe nam7u kushiya wodhidi, heedzantho kushiya paxa aggis. Yaatin Moo7abeti Dawitas haaretidi giiridosona.
Rehooba na7ay, Suubba kawoy, Adraazari Efraxiisa shaafa matan de7iya ba zawa zaaranaw bida wode Dawiti iya olidi xoonis. Dawiti iya asaape issi mukulunne laapun xeetu para asatanne laatamu mukulu toho asata di77is. Dawiti gaareta goochanaw xeetu parata ashshidi hara parata ubbaas gaadiya gildayis.
Damasqon de7iya Soore olanchoti Suubba kawa Adraazara maaddanaw yida wode Dawiti entafe laatamanne nam7u mukulu asaa wodhis. Dawiti Soore kawotethan, Damasqon, olanchotas miixa medhis. Yaatin Soore asay Dawitas haaretidi giiridosona. Dawiti bida bessaa ubban Goday iyaw xoono immis.
Adraazara toora moconati oykiya worqa gondalliya Dawiti ekidi Yerusalaame ehis. Bexahanne Beroota geetetiya Adraazara katamatape kawoy Dawiti daro naase birata ekis.
Adraazara olanchota ubbaa Dawiti xoonidaysa Hamaata kawoy To7i si7is. Dawiti Adraazara olidi xoonida wode Hadadizeri To7ara oletishe gam7ida gisho iya hashshu gaanawunne sarothanaw ba na7aa Yoraama Dawitako kiittis. Yoraami worqafe, birapenne naase biratape oosetida imotata Dawitas ehis. Kawoy Dawiti kase giirisiya kawotethata ubbaafe ekida worqanne bira oothidaysada ha imotataka Godaas dummayis. I xoonida kawotethati Edoome, Moo7abe, Amoone, Filisxeemenne Amaaleqa. Hessadaka Rehooba na7aa, Suubba kawa Adraazara ekida di7uwa Godaas dummayis.
Maxine zangaaran tammanne hospun mukulu Edoome2 asata Dawiti wodhidi simmidaape guye iya sunthay keyis. Dawiti Edoome biittan olanchota miixa medhis; he biittay Dawitas haaretis. Dawiti bida bessa ubban Goday iyaw xoono immis.
Dawita Moorinnata
Dawiti Isra7eele ubbaa bolla kawotis; ba asa ubbaa xillotethaninne suure pirdan aysis. Xaruya na7ay Iyo7aabi tora mocona gidishin, Ahiluda na7ay Iyosaafexi taarike xaafe. Ahixuuba na7ay Saadoqinne Abyataara na7ay Abimeleke kahine gidishin, Sarayi qassi xaafe. Yoodahe na7ay Banayasi kawa naageysata3 halaqa gidishin, Dawita adde nayti kawa zoreyisata.4
Source notes (4)
- Footnote Meteg-Ama: 1 Taarike maxaafan xaafetidaysada Gaatenne iya heeran de7iya gutata bessees.
- Footnote Araame woyko Soore guussu.
- Footnote Kawa naageysata: Kertaawetanne Keltaaweta geetetoosona.
- Footnote Kawa zoreyisata: Woyko kahineta
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.