Geeshsha Maxaafa
2 Qorontoosa 3
Nuuni zaaridi nuna sabbinoyee? Woyko hara asada, saba dabdaabiya hintew yeddanaw woyko hintefe ekanaw nuna koshshiyee? Asi ubbay hintena erana melanne nabbabana mela hinte nu wozanan xaafetidi de7iya nu dabdaabe. Hinte qalamen gidonashin, de7o Xoossaa Ayyaanan, shucha bolla gidonashin, asa wozanan xaafetidaysatanne nunan haggaazetida Kiristoosa dabdaabe gideysa bessideta.1
Nu hessa giday, Kiristoosa baggara Xoossan ammanoy nuus de7iya gishosa. Nu hessa oothanaw danda7iday Xoossaa wolqaanape attishin, nuuni nu wolqan aykoka oothanaw danda7oko. Nu ooratha caaquwa oosanchota gidana mela Xoossay nuna danda7isis. He ooratha caaqoy Geeshsha Ayyaanan bentidaysafe attishin, xaafetida higgen gidenna. Higgey wodhees, shin Geeshsha Ayyaanay de7o immees.2
Shucha bolla xaafetida higgey imetiya wode Xoossaa bonchoy qoncis. Muse som7uwan de7iya bonchoy dhayishe biyaba gidikoka, Isra7eele asay iya som7uwa tishshi oothidi xeellanaw danda7ibookona. Hiza, hayqo ehiya higgey hessa mela bonchon qonciko,3 yaatin, Geeshsha Ayyaanan oosetiya oosuwa bonchoy waanidi aadhenee? Asa bolla pirda ehiya higgey boncho gidiko yaatin, ase xillisiya ooratha ogey waanidi aadhidi bonchetennee? Kase boncho gididaysa ha77i aadhiya bonchoy de7eysara gathi be7iya wode bonchoy baynaba gidis. Guutha wodes qoncidi guyepe dhaydaysi haysada bonchetiko, merinaw de7eysi waanidi aadhidi bonchetennee?
Nuus haysa mela ufaysay de7iya gisho, yeellatonna odetoos. Nuuni, Isra7eele asay dhayishe biya bonchuwa wursethaa be7onna mela ba som7uwa kammida Muse mela gidoko.4 Shin enta wozanay doccis. Hachi gakanaw enti gal7a caaquwa nabbabiya wode enta wozanay he kaman kametidi de7ees. He kamay Kiristoosa xalaalan qaaretees. Shin hachi gakanawuka enti Muse maxaafaa nabbabiya wode ubban he kamay enta wozanaa kammees. Shin oonika Godaako simmiya wode awudeka he kamay qaaretees.5 Goday Ayyaana; Godaa Ayyaanay de7iya bessan la77atethi de7ees. Nuuni ubbay kametiboonna som7on Godaa bonchuwa be7ana.6 Nuuni Ayyaana gidida Godaa malaa daananaw bonchofe bonchon laametana.
Source notes (6)
- Cross-reference Kessa 24:12; Ermi 31:33; Hiz 11:19; 36:26.
- Cross-reference Ermi 31:31.
- Cross-reference Kessa 34:29.
- Cross-reference Kessa 34:33.
- Cross-reference Kessa 34:34.
- Footnote Be7ana: Mastooteda zaaridi phoolisana geetetidi birshetanaw danda7ees.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.