ሶሎሞነ 6

የሩሳላመ ጌላኦታ

1ማጫሳ ኡባፈ ሎእያረ፥ ነ ላገይ አዉ ብዴ?

ኑ ኔራ ኮያና መላ እ ብዳ ግና ኑስ ኦዳ።

ጌላእዉ

2ታ ሲቆይ ዶርሳ ዉደ ሄማናዉ፥

ሎኦ ጪሻ ሺሻናዉ፥

ሽቶ ማታይ ደእያ አታክልትያ ግዶ ብስ።

3ታኒ ታ ሲቁዋባ፤ ታ ሲቆይ ታባ፤

እ ሱፈ ጪሻ ግዶን ዉደ ሄሜስ።

ፓን

4ታ ሲቀ፥ ነ ትርሳ ካታሜዳ ሎኣሳ፤

የሩሳላመዳ ዳሮ ሎኣሳ።

ባንድራ ኦይክድ ሳልፕያ፥

ኦላንቾዳ ያሻሳ።

5ኤንቲ ታና ኡንኤዳ ግሾ፥

ሀያና ነ አይፍያ ታፐ ደን።

ነ ብናናይ ጋላዳ ዙማፐ ዎያ፥

ዴሻ ዉደ ዳኔስ።

6ነ አቻይ ሜጨትድ ከይያ፥

ኡባይ መንተ የልያ፥

ኤንታ ግዶን አዉጫየይ ባይና ዶርሳ ዉደ መላ።

7ነ ናምኡ ሻካላይ ጉሉን ግዶራ ፄልያ ዎደ፥

ናምኡ ከስድ ጳልቅዳ ኦሮማነ ዳኖሶና።

8ኡሱፑን ታሙ ማጫ ካዎት፥

ሆስፑን ታሙ ላገት፥

ታይቦይ ባይና ጌላኦት ደኦሶና።

9ሽን ቦረይ ባይና ታ ሆልያ ታዉ ዱማ፤

እያ ባ አየስ እስኖ።

እዮ የልዳ አይያ ኡባፈ አዳ እዮ ዶሳዉሱ፤

ጌላኦት እዮ በእድ፥ “ሀና አንጀትዳሮ” ያጎሶና፤

ማጫ ካዎትነ ላገት እዮ ሳቦሶና።

የሩሳላመ ጌላኦታ

10ሀና ዎንታ ፃልቀዳ ዶልያራ፥

አጌናዳ ፖእያራ፥ ፃልቀዳ ጫድያራ፥

ባንድራ ኦይክድ ሳልፐ ከይዳ፥

ኦላንቾዳ ያሽያራ ሀና ኦኔ?

ፓን

11ታኒ ዛንጋራን ቶከትዳ ምታ በአናዉ፥

ዎይነይ አጭዳኮ ኦሮማነይ አይፍዳኮ ፄላናዉ፥

ዱገ ኦቾሎነ ጋደ ዎስ።

12ታ ቆፖና ደእሽን ታ አሞይ ታና ኤፍድ፥

ካዋ አሳ ፓራ ጋረታ ግዶን ታና ኡትስስ።

የሩሳላመ ጌላኦታ

13ነኖ ሱላማፐ ይዳረ፥ ሃያ፤ ሃ ስማ፤

ኑ ነና ሎይድ ፄላና መላ ሃ ስማ።

ጌላእዉ

ዳሮ አሳ ስንን የፅያ አሳዳ፥

ታና አይስ ፄሌቲ?