ማዝሙረ 94

ፆሳይ ባ አሳ አገና

1ጎዳዉ፥ ኔኒ ሀሎ ከይያ ፆሲ፤

ኩሸ ዛርያ ፆሳዉ፥ ነ ቦንቹዋ በሳ።

2አቤት ሳኣ ፕርድያ ፆሳዉ ደንዳ፤

ኦቶራንቾታስ በሲያ ሴራ እማ።

3ጎዳዉ፥ አዉደ ጋካናዉ ጋምአይ?

ኢታት አዉደ ጋካናዉ ኡፋይታኔ?

4ኢታ ኦይሳት ኦቶሮ ቃላ ሃሳዮሶና፤

ኤንቲ ጮ ጬቀቶሶና።

5ጎዳዉ፥ ኤንቲ ነ አሳ ሊቅሶሶና፤

ኤንቲ ነ ላታ ናቆሶና።

6አምኤታነ በታንቾታ ዎኦሶና፤

አው ባይና ናይታ ሙጮሶና።

7ኤንቲ፥ “ጎዳይ ኑና በኤና፤

ያይቆባ ፆሳይ አኬከና” ያጎሶና።

8ህንተኖ፥ አሳ ግዶፈ ኤያቶ፥ አኬክተ!

ህንተኖ፥ ኤያቶ ህንተ ጭንጫ ግዳናይ አዉዴ?

9ሀይ ኦዳ ፆሳይ ስኤኔ?

አይፈ መዳ ጎዳይ በኤኔ?

10ካዎተታ ሴርያ ፆሳይ ሴረኔ?

አሰ ኤራተ ታማርስያ እ፥ ኤረኔ?

11ጎዳይ አሳ ቆፍ ፓናባነ

ሀዳ ግደይሳ ኤሬስ።

12አቤት ጎዳዉ፥ ኔኒ ሴርያ አስነ

ነ ህግያ ታማርስያ አስ አንጀትዳይሳ።

13ኢታት ኩንድያ ኦላይ ቦከታና ጋካናዉ፥

መቶ ጋላስ ኔኒ እያ ሸምፕሳሳ።

14ፆሳይ ባ አሳ የገና፤

እ ባ ላታ አገና።

15ፕርድ ስሚድ ፅሎተ ቦላ ኤቃና፤

ዎዛና ሱረት ኡባይ ፅሎ ፕርዳ ካላና።

16ማካላንቾታ ቦላ ታ ግሾ ደንደይ ኦኔ?

ኢታ ኦይሳታራ ታ ግሾ ኤቀተይ ኦኔ?

17ጎዳይ ታና ማዶናኮ፥

ታኒ ኤሶን ዱፎ ገላዳ አታናሽን።

18ታኒ፥ “ታ ቶሆይ ሀልፅስ” ግዳ ዎደ፥

ነ ሲቆይ ታና ካትስስ።

19ታ ዎዛናን ኡንኤተ ኩምዳ ዎደ፥

ኔኒ ታና ዎፑ ኦዳ ኡፋይሳሳ።

20ህገ ሻርያ ጌላ ዳይናታራ

ጌላ አሳራ ኔኒ ሃሼታይ?

21ፅሎታ ዎናዉ ኤንቲ ቶቦሶና፤

ሱረታ ቦላ ሀይቆ ፕርዶሶና።

22ግዶሽን ጎዳይ ታ ሚፃ፤

ታ ፆሳይ ታኒ ቆሰታዳ አትያ ዛላ።

23ኤንታ ኢታተ ግሾ እ ኤንታ ሴራና፤

ኤንታ ናጋራ ግሾ እ ኤንታ ይሳና፤

ጎዳይ ኑ ፆሳይ ኤንታ ይሳና።