ማዝሙረ 60

ኑ ሞርከታፐ ኑና አሻ

ማሰጰፆመንነ ሶባላን ደእዳ አራመ አሳራ ኦለትዳ ዎደነ እዮኣብ ጉየ ስሚድ ማፅነ ዛንጋራን ታማነ ናምኡ ሙኩሉ ኤዶመ አሳ ዎዳ ዎደ ዳዊቲ ዛማረታ ሀላቃስ ፃፍዳ ዎሳ

“ጪሻ ጩ” ጌተትያ ማርካተ ዎሳ

1አቤት ፆሳዉ፥ ነ ኑና አጋዳሳ፤

ኑና መንርዳሳ።

ነ ኑና ሀንቀታዳሳ፤

ሽን ሀእ ኑና ዛራ፥ ምን ኤሳ።

2ነ ቢታ ቃዳሳነ ዛእሳዳሳ፤

ቢታይ ኮኮርያ ግሾ፥ ነ እያ ዛኡዋ ኩን።

3ኔኒ ነ አሳ መቶ በሳዳሳ፤

ኑና ጋንድጋርስያ ዎይነ ኡሻዳሳ።

4ነዉ ያየይሳት ባንታ ሞርከ ዶንገፈ

አታና መላ ማላ እማዳሳ። ሳላሀ

5ነ ሲቀይሳት አታና መላ፥

ነ ኡሻቻ ኩሸን

ኑና አሻ፤ ኑና አላ።

6ፆሳይ ባ ጌሻ በሳን ሀይሳዳ ያግስ፤

“ታኒ ፆናዳ ሴከማ ቢታ ሻካና፤

ሱኮታ ዛንጋራ ዋና።

7ጋላድ ታባ፤ ምናሰይካ ታሳ፤

ኤፍሬም ታ ሁጰ አሽያ ብራታ ቆቤ፤

ይሁድ ታ ካዎታ ፃምኣ።

8ሞአበይ ታ ሜጨትያ ከረ፤

ኤዶመይ ታባ ግደይሳ ኤርሳናዉ፥

ታ ጫማ እያ ቦላ ዎይስ፤

ታኒ ፍልስፄመ ፆናዳ ገሬራይስ” ያግስ።

9ግምበትዳ ካታማኮ ታና ኦነ ኤፋናይ?

ኤዶመ ጋካናዉ ታና ኦነ ካለናይ?

10አቤት ፆሳዉ፥ ኑና አግዳይ ነና ግድኪ?

አቤት ፆሳዉ ኔኒ ኑ ኦላንቾታራ ኦላስ ከያካ።

11አሳ ማዶይ ፓና ግሾ፥

ሞርከታራ ኦለታናዉ ነ ኑና ማዳ።

12ፆሳ ዎልቃን ኑ ሞርከታ ፆናና፤

እ ኑ ሞርከታ የና።