ማዝሙረ 33

ኬሀ ፆሳይ ሳበቶ

1ህንተኖ፥ ፅሎቶ ጎዳስ ኡፋይሳን እልልተ፤

ሱረ አሳት እያ ጋላታናዉ በሴስ።

2ማስንቆን ጎዳ ጋላትተ፤

ታሙ ሻያን ዋፀትዳ ዲን የፅተ።

3ኦራ የ እያዉ የፅተ፤

ዲ ሎይድ ዲፅሸ እልልተ።

4ጎዳ ቃላይ ቱማ፤

እያ ኦሶ ኡባይ አማነተይሳ።

5ጎዳይ ፅሎተነ ቱማ ፕርዳ ዶሴስ፤

እያ ማሮታይ ሳኣ ኩምስ።

6ጎዳ ቃላን ሳሎት መትዶሶና፤

እያ ዶናፐ ከይያ ሸምፑዋን

ሳሎን ደእያ መተት የለትዶሶና።

7አባ ሃ እስ በሳን ኤልስስ፤

ጪሞ ሃ ምንጃ ኬን ዎስ።

8ሳአ ኡባይ ጎዳ ያዮ፤

አሳ ኡባይ ጎዳ ቦንቾ።

9እያ ኦዳን ኡባይ ሀንስ፤

እ ኪትን ምንድ ኤቅስ።

10ጎዳይ ካዎተታ ሀልቹዋ ሀዳ ኦስ፤

ኤንታ ቆፋ ላሌስ።

11ጎዳ ሀልቾይ መርናዉ ኤቅድ ደኤስ፤

እያ ዎዛና ቆፋይ የለተ ኡባሳ።

12ፆሳይ ኤንታዉ ጎዳ ግድዳ ካዎተይ፥

እ ባባ ኦድ ዶርዳ አሳይ አንጀትዳይሳታ።

13ጎዳይ ሳሎን ኡትድ ፄሌስ፤

አሳ ኮቸ ኡባ በኤስ።

14ጎዳይ ባ አራታን ኡትድ፥

ሳአን ደእያ ኡባ በኤስ።

15ኤንታ ዎዛና መዳይ እያ፤

ኤንቲ ኦያባ ኡባ እ ኤሬስ።

16ካዎይ ባ ዎታዳረ ዳሮተን አተና፤

ኦላንቾይ ባ ዎልቃ ምኖተን ከስ ኤከና።

17ፓራን ፆናና ግድ ናጎይ ሀዳ፤

እ ባ ምኖተን አሻናዉ ዳንዳኤና።

18ጎዳ አይፈት እያዉ ያያነ

እያ ማሮታን ኡፋይስ ኦያ አሳ በኦሶና።

19ሄስካ ኤንታ ሀይቆፐ አሻናሳነ

ኮሻ ዎደ ኤንታ ናጋናሳ።

20ኑኒ ጎዳ ኡፋይሳን ናጎስ፤

ኑና ማደይነ ኑ ጎንዳለይ እያ።

21እያ ጌሻ ሱንን ኑኒ አማነትያ ግሾ፥

ኑ ዎዛናይ እያን ኡፋይቴስ።

22ጎዳዉ፥ ኑኒ ነናን ኡፋይስ ኦዳይሳዳ፥

ነ ማሮታይ ኑ ቦላ ግዶ።