ማዝሙረ 147

ፆሳይ መቅዳ ዎዛና ኮሌስ

1ጎዳ ጋላትተ!

ኑ ፆሳ ሳቦይ ሎኦ፤

እያ ሳቦይ ኡፋይስያባነ በሲያባ።

2ጎዳይ የሩሳላመ ኦራና፤

እስራኤለፐ ድኤትዳይሳታ ሺሻና።

3ዎዛን መቅዳይሳታ ኮሌስ፤

ኤንታ ማዱን ፓስ።

4እ ፆልንቶታ ታይቡዋ ኤሬስ፤

ኤንታ ኡባ ኤንታ ሱንን ሱንን ፄጌስ።

5ኑ ጎዳይ ግታ፤ እ ዎልቃማ፤

እያ አኬካስ ዛው ባዋ።

6ጎዳይ አዳታ ዘምፕሴስ፤

ሽን ኢታታ ሳአን የጌስ።

7ጎዳስ ጋላታ የ የፅተ፤

ኑ ፆሳስ ዲን የፅተ።

8እ ሳሉዋ ሻራ ማይዜስ፤

ቢታስ እራ እሜስ፤

ዙማታ ቦላ ማታ ዶልሴስ።

9መሄታስ ካ፥

ኮሻትድ ዋስያ ቁሮ ናይታስ

ምያባ እሜስ።

10እ ፓራታ ዎልቃንነ

ቶራንቾታ ምኖተን ኡፋይተና።

11ሽን ጎዳይ ባዉ ያየይሳታንነ

እያ ማሮታን አማነተይሳታን ኡፋይቴስ።

12የሩሳላመ፥ ጎዳ ጋላታ!

ፅዮነ፥ ነ ፆሳ ጋላታ!

13እ ነ ፐንግያ ኮበታ ምንና፤

ነ ግዶን ደእያ ነ አሳ አንጃና።

14እ ነ ዛዋ ሳሮተን ናጋና፤

ነና ሎኦ ግስተን ካልሳና።

15እ ባ ኪታ ቢታስ የዴስ፤

እያ ቃላይ ኤሶን ጋኬስ።

16እ ሻች ቡሉኮዳ ምጬስ፤

ጫጋና ብዶዳ ላሌስ።

17እ ሻቻ ሹቻዳ ሆሌስ፤

እያ ሜጉዋን ኦንካ ኤቃናዉ ዳንዳኤና።

18እ ባ ቃላ ኪትድ ሻቻ ማይሴስ።

እ ጫርኩዋ ኪትን ሃ ጎጌስ።

19እ ባ ቃላ ያይቆባስ፥

ባ ህግያነ ዎጋ

እስራኤለስ አዋጄስ።

20እ ሀራ ካዎተታስ ሄሳ ኦቤና፤

ኤንቲ እያ ህግያ ኤሮኮና።

ጎዳ ጋላትተ!