ማዝሙረ 144

ፆሳይ ታዉ ሚፃ

ዳዊታ ማዝሙረ

1ጎዳይ፥ ታ ዛላይ፥ ጋላተቶ!

ታ ኩሽያ ኦላ ታማርሴስ፤

ታ ብራታ ቶራስ ጊግሴስ።

2እ ታ ሲቆ ፆሳነ ታ ቆሰታ አትያ በሰ፤

ታ ሚፃነ ታና አሸይሳ።

ታ ጎንዳለነ ታኒ ባቃታዳ አትያ በሰ፤

እ ካዎተት ታዉ ሃረታና መላ ኦስ።

3ጎዳዉ፥ ኔኒ እያዉ ቆፓናዉ አስ አይቤ?

ነ ዎዛናን እያዉ በሰ እማናዉ አሳ ናእ አይቤ?

4አስ እስ ቶሆ ጫርክያ ጫርኮ መላ፤

እያ ጋላሳት አያ ኩያ መላ።

5ጎዳዉ፥ ሳሉዋ ጳልቃዳ ዱገ ዎ!

ደረታ ቦቻ፤ ኤንቲ ጩዮ!

6ዎልአን የዳዳ ነ ሞርከታ ላላ፤

ነ ዶንግያ ዪሻን ዱካዳ ኤንታ የደ።

7ቦላራ ነ ኩሽያ የዳዳ፥

ታና ዎልቃማ ሃፈ ጎቻዳ ከሳ፤

አላጋ አሳታ ኩሸፐ ታና ዎስሳ።

8ኤንቲ ቱማ ሃሳይድ ኤሮኮና፤

ባንታ ኡሻቻ ኩሽያ ደንድ

ዎርዶን ጫቆሶና።

9ፆሳዉ ታኒ ነዉ ኦራ ማዝሙረ የፃና፤

ታሙ ሻያን ዋፀትዳ ዲን የፃና።

10ካዎታስ ፆኖ እማሳ፤

ነ አይልያ ዳዊታ አሻሳ።

11ታና ኢታ ማሻፈ አሻ፤

አላጋ አሳታ ኩሸፐ ታና ዎስሳ።

ኤንታ ዶናይ ዎርዶን፥

ኤንታ ኡሻቻ ኩሸይ ጭሞን ኩምስ።

12ኑ አደ ናይት ባንታ ናአተን፥

ሎኦ ድጭያ ም መላ ግዶ።

ኑ ማጫ ናይት ካዎ ጋ አሌቅሳናዉ፥

ኦሰትዳ ቱቀ መላ ግዶ።

13ኑ ሻለት ዱማ ዱማ ካ ቆሞን ኩሞ፤

ሄመትያ በሳን ደእያ ኑ ዶርሳት

ሙኩላንነ ታሙ ሙኩላን የሎ።

14ኑ ሚዛት ብራይሶ፤

አዉጫዮና የለትድ ዳሮ፤

ኑ ኦገታን ዋሶይ ስኤቶፎ።

15ሀ አንጆት ጋክያ አሳት ቱማ አንጀትዳይሳታ፤

ፆሳይ ኤንታዉ ጎዳ ግድዳ አሳት አንጀትዳይሳታ።