ማዝሙረ 103

ታ ሸምፐ ፆሳ ጋላታ

ዳዊታ ማዝሙረ

1ታ ሸምፐ ጎዳ ጋላታ!

ታ ኩመ አሳተዉ፥ እያ ጌሻ ሱን ጋላታ።

2ታ ሸምፐ ጎዳ ጋላታ!

እ ነዉ ኦዳ ኬሀተ ኡባ ዶጎፓ።

3እ ነ ናጋራ ኡባ አቶ ጌስ፤

ነ ሀርገ ኡባፈ ነና ፓስ።

4እ ነና ሀይቆፐ አሼስ፤

ሲቆንነ ማሮታን ነና አንጄስ።

5ነ ያላጋተይ አርጋንዳ ኦራፃና መላ፥

ነ ደኡዋ ሎኦባን ካልሴስ።

6ጎዳይ ቆሄትዳይሳታስ

ፅሎተንነ ሱረን ፕርዴስ።

7እ ባ ኦግያ ሙሰ፥

ባ ኦሱዋ እስራኤለ አሳ ኤርስስ።

8ጎዳይ ቃተይሳነ ማረይሳ፤

ሀንቀታናዉ ኤሶተና፤ እያ ሲቆይ ዳሮ።

9እ ኡባ ዎደ ሴረና፤

መርናዉ ሀንቀተና።

10እ ኑስ ኑ ናጋራዳ ኦና፤

ኑ ኢታተ መላ ዛረና።

11ሳሎይ ሳአፐ ቀይሳዳ፥

ጎዳ ያየይሳታስ እያ ሲቆይ ግታ።

12ዶሎሀፐ ዉሎህ ሃከይሳዳ፥

ጎዳይ ኑ ናጋራ ኑፐ ሃሴስ።

13አው ባ ናይታስ ቃተይሳዳ፥

ጎዳይ ባዉ ያየይሳታስ ቃቴስ።

14ኑኒ አይብፐ መትዳኮ እ ኤሬስ፤

ኑኒ ቢታ ግደይሳ እ አኬከስ።

15አስ ባዉ ማታ መላ፤

እ ባዞ ጪሻዳ ጭዬስ።

16ጫርኮይ እያ ቦላ ጫርክያ ዎደ ዬስ፤

እ ዶልዳ በሳይ ዛሪድ ኤረተና።

17ሽን ጎዳስ ያየይሳታስ

እያ ሲቆይ መርናፐ መርና ጋካናሳ፤

እያ ፅሎተይ ናአ ናአ ጋካናሳ።

18ሄስ ሀነይ እያ ጫቁዋ ናገይሳታነ

እያ ኪታ ፖላናዉ ምነይሳታሳ።

19ጎዳይ ሳሎታን ባ አራታ ኤስስ፤

እያ ካዎተይ ኡባ ሃሬስ።

20ህንተኖ፥ እያ ኪታንቻቶ፥

እያ ኪታ ናግያ ዎልቃማቶ፥

እ ኦድያባ ስኤይሳቶ፥ ጎዳ ጋላትተ!

21ህንተኖ ሳሎን ደእያ ምኖቶ፥

እያ ሸንያ ፖለይሳቶ፥ ጎዳ ጋላትተ!

22ህንተኖ፥ እ ሃርያ በሳ ኡባን፥

ደእያ መተቶ፥ ጎዳ ጋላትተ!

ታ ሸምፐ ጎዳ ጋላታ!