ታይቦ 36

ሰሎጳዳ ማጫ ናይታ ላታ

1ዮሰፋ ኮቻፈ፥ ምናሰ ናኣ ማክራ ናኣ ጋላዳ ኮቻ ሀላቃት ሙሰኮነ እስራኤለ ሀላቃታኮ ይድ 2“ኑ ጎዳዉ፥ እስራኤለ አሳስ ላታ ቢታ ሳማን ሻካዳ እማና መላ ጎዳይ ነና ኪትስ፤ ቃስ ኑ እሻ ሰሎጳዳ ላታ እያ ማጫ ናይታስ እማና መላ ነና ኪትስ። 3ኤንቲ ሀራ ኮቸ ግድዳ እስራኤለ አስ ገልኮ ኤንታ ላታይ ኑ አዋታ ላታፐ ኤከትድ ኤንታ ኤክያ ዘረስ ጉዠቴስ። ሄሳ ግሾ፥ ኑስ ሳማን እመትዳ ላታይ ጉፄስ። 4እስራኤለ አሳስ እሻታማን ላይ ቦንችያ ባለይ ጋክያ ዎደ ኤንታ ላታይ ኤንታ ኤክዳ አሳ ኮቻስ ጉዠቴስ፤ ሄሳ ግድኮ ኤንታ ላታይ ኑ አዋታ ኮቻ ላታፐ ኤከታና” ያግዶሶና።

5ሄሳ ግሾ፥ ሙሰይ ጎዳፐ ኤክዳ ኪታ እስራኤለ አሳስ ሀይሳዳ ያግድ ኦድስ፤ “ዮሰፋ ኮቻይ ግዳይስ ልከ። 6ጎዳይ ሰሎጳዳ ማጫ ናይታባ ኪትዳይስ ሀይሳ፤ ኤንቲ ባንታዉ ዶስዳ አዝና ገላናዉ ዳንዳኦሶና፥ ሽን ኤንታ ኮቻፈ ግዳናዉ ኮሼስ። 7እስራኤለ አሳ ላታይ እስ ኮቻፈ ሀራ ኮቻስ አፎ፤ እስራኤለ አሳይ ባንታ ኮቻ ላታ ቢታ ምንድ ናጎ። 8እስራኤለ አሳ ግዶን ላታ ቢታ ኤክዳ ማጫስ ኦንካ ባ አዋ ኮቸ ግድዳ አዝና ገላናዉ ኮሼስ። ሄሳዳ ኦኮ ኤንታ ኮቻ ላታይ ኤንታ ኩሸን ጋምኤስ። 9ያትኮ፥ ላታይ እስ ኮቻፈ ሀራ ኮቻኮ አና። እስ እስ ኮቻይ ባ ላታ ቢታ ኦይክዳ መላ ዳና” ያግስ።

10ያትን፥ ሰሎጳዳ ማጫ ናይት ጎዳይ ሙሰ ኪትዳይሳዳ ኦዶሶና። 11ሰሎጳዳ ማጫ ናይት፥ ማህሎ፥ ትርፆ፥ ሆግሎ፥ ምልኮነ ኖኦ ጌተተይሳት ባንታ አዋ እሻታ ናይታ ገልዶሶና። 12ኤንቲ ዮሰፋ ናኣ ምናሰ ናይታ ኮቻፈ አዝና ገልዶሶና፤ ኤንታ ላታይ ኤንታ አዋ ኮቻስ ግድስ። 13እያርኮፈ ሄፍንን፥ ዮርዳኖሰ ሻፋ ማታን፥ ደእያ ሞአበ ደንባን ሙሰ ባጋራ፥ ጎዳይ እስራኤለ አሳስ ኪትዳ ህገትነ ዎጋት ሀይሳታ።