ጌሻ ማፃፋ
ሌወታ 9
አሮና ኮይሮ ያርሹዋ
ሆስፑን ጋላስ ሙሰይ አሮና፥ እያ አደ ናይታነ እስራኤለ ጭማታ ፄግስ። አሮናኮ ሀይሳዳ ያግስ፤ ቦረይ ባይና እስ ኮርማ ናጋራ ያርሾስ፥ ቃስ እስ ማራዘ ፁሳ ያርሾስ ጎዳ ስን ሺሻ። ቦረይ ባይና እስ ኮለ ናጋራ ያርሾስ፥ እስ ላይ ኩምዳ ማርነ ዶርሳ ኡርገ ፁሳ ያርሾስ ባንታዉ ኤሀና መላ እስራኤለ አሳስ ኦዳ። ቃስ እስፈተ ያርሾስ እስ ኮርማ፥ እስ ማራዘነ ካ ያርሾስ ዛይተራ ሙኑቀትዳ ለ ኤሀና መላ ኤንታዉ ኦዳ። ሀች ጎዳይ ህንተዉ ቆንጫና ግሾ ሄሳ ኦተ።
ኤንቲ ሙሰይ ኪትዳባ ኡባ ጌሻ ዱንካንያ ስን ኤህዶሶና፤ ማባራ ኡባይ ሺቅድ ጎዳ ስንን ኤቅዶሶና። ሙሰይ ኤንታኮ፥ ጎዳ ቦንቾይ ህንተዉ ቆንጫና መላ ህንተ ኦና መላ ጎዳይ ኪትዳይ ሀይሳ።
ሙሰይ አሮናኮ ሀይሳዳ ያግስ፤ “ያርሾ በሳኮ ሺቃዳ ነ ናጋራ ግሾ ናጋራ ያርሾነ ፁሳ ያርሾ ያርሻ። ጎዳይ ኪትዳይሳዳ አሳ ናጋራ አቶተስ ያርሾ ያርሻ።”
አሮን ያርሾ በሳኮ ይድ፥ ባ ናጋራ ግሾ ያርሸትያ ማራ ሹክስ። አሮና ናይት ሱ ኤክድ እያዉ ኤህዶሶና፤ እ፥ ባ ብራያ ሄ ሱን የድ ኤክድ፥ ያርሾ በሳን ደእያ ካጨታ ትይስ፤ አትዳ ሱ ያርሾ በሳፈ ጋርሳን ጉስስ። ጎዳይ ሙሰ ኪትዳይሳዳ፥ አሹዋፐ ሞዋ፥ ክላሆታነ ትርያ ፄራ ባጋ ኤክድ ያርሾ በሳን ፁግስ። ሽን አትዳ አሹዋነ ጋልባ ጉታፐ ካረ ከስድ ፁግስ።
አሮን ፁሳ ያርሾስ ሺቅዳ መህያ ሹክስ፤ እያ ናይት ሱ ኤክድ እያዉ ኤህዶሶና። እ ያርሾ በሳ ኦይዱ ማዛነታ ቦላ ዉርፅስ። ኤንቲ አሹዋ ቆሞን ቆሞን ከስድ፥ ሁጵያራ ዎላ እያዉ ኤህዶሶና፤ እ ኤክድ ያርሾ በሳን ፁግስ። ኡሎ አሹዋነ ገዳታ ሃን ሜጭድ፥ ያርሾ በሳን ደእያ ፁሳ ያርሹዋ ቦላ ዎድ ፁግስ።
ሄሳፈ ጉየ፥ አሮን አሳ ግሾ ያርሾ ያርሽስ። እ አሳ ናጋራ ግሾ ያርሸትያ ኮልያ ኤክድ ሹክስ፤ እ ካሰ ባ ናጋራ ያርሽዳይሳዳ ኤንታ ናጋራ ግሾ ያርሽስ። ዎጋይ ኪተይሳዳ ፁሳ ያርሾስ ሺቅያ መህያ ኤህድ ያርሽስ። ካ ያርሹዋ ኤህድ፥ እያፐ እስ ኩጫ ኤክድ፥ ዎንታ ዎንታ ፁሳ ያርሹዋ ቦላ ጉጅድ ያርሾ በሳን ፁግስ።
አሮን ኮርማነ ማራዝያ አሳስ እስፈተ ያርሾ ኦድ ሹክስ፤ እያ አደ ናይት ሱ እያዉ ኤህዶሶና፤ እ ሄ ሱ ኤክድ ያርሾ በሳ ኦይዱ ማዛነታ ቦላ ዉርፅስ። ኮርማነ ማራዝያ አሹዋፐ ሞዋ፥ ጎይናፐ ብድ ዞኮ መቀ ጋካናዉ ደእያ ሞዋ፥ ኡሎ አሹዋ ካምዳ ሞዋ፥ ክላሆታነ ትርያ ፄራ ባጋ ኤክድ፥ ኤንቲ አንጋይሱዋ ቦላ ዎን፥ አሮን ያርሾ በሳን ፁግስ። ጎዳይ ሙሰ ኪትዳይሳዳ፥ አሮን አንጋይሱዋነ ኡሻቻ ገዳ ዩሾ ያርሾ ኦድ ጎዳ ስንን ዩሽስ።
ሄሳፈ ጉየ፥ አሮን ባ ኩሽያ አሳኮ ደንድ ኤንታ አንጅስ። እ ናጋራ ያርሹዋ፥ ፁሳ ያርሹዋነ እስፈተ ያርሹዋ ያርሽዳፐ ጉየ ያርሾ በሳፈ ዎስ። ሙሰይነ አሮን ጌሻ ዱንካንያ ግዶ ገልዶሶና፤ ኤንቲ ያፐ ከይድ አሳ አንጅዶሶና። ሄ ዎደ ጎዳ ቦንቾይ አሳ ኡባስ ቆንጭስ። ጎዳ ማታፐ ታም ዎድ፥ ያርሾ በሳን ደእያ ፁሳ ያርሹዋነ ሞዋ ምስ። አሳ ኡባይ ሄሳ በእዳ ዎደ እልልዶሶና፤ ጉፋንድ ቦንችዶሶና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.