ምላልሳ 4

ጌሻ ሹቻት ላለትዶሶና

1ዎርቀይ ጶለይሳ ዋንድ አግዴ?

ጌሻ ዎርቃይ ዋንድ ዳምዴ? ፆሳ ኬይ ግምበትዳ ሹቻይ ኦገ ዶናን ላለትስ።

2ካሰ አልኦ ዎርቃ መላ ቦንቸትዳ ፅዮነ ናይት

ሀእ ቢታፈ መትዳ ኦቶ ግድዶሶና።

3ሀር አቶሽን ዎራካን ባ ማር ንዉሱ፤

ሽን ታ አሳይ ባዞን ደእያ ያንቾዳ፥ ባ ናይታስ ኢታ ግድስ።

4ሳሞ ጋሶን ዮጋ ናይታ እንፃርሳይ ኮቶኖራ ኦይከትስ፤

ናይት ካ ዎሶሶና፤

ሽን ኤንታዉ እምያ ኦንካ ባዋ።

5ካሰ ማልኦ ካ ፃላላ መይሳት

ሀእ ኦገ ዶናን ኮሻን ዉርዶሶና።

ካሰ ሊኖ ማእድ ድጭዳይሳት

ሀእ ብዶ ቦላ ዝንእዶሶና።

6ታ አሳ ናጋራይ፥

ኦደ ኩሸይካ እዮ ቦቾና፥

ቆፖና ሽረትድ ዎዳ ሶዶመ አሳ ናጋራፐ ዳሮ።

7ይሁዳ ሀላቃት ሻቻፈ አዳ ጌሽ፥

ማፈ አዳ ቦ።

ኤንታ አሳተይ ዞኦ እንቆፈ አዳ አርሰ፤

ኤንታ መይ ሳንፓረ አልኦ ሹቻ መላ።

8ሽን ሀእ ኤንታ ሶምኦይ ሻላፐ አድ ካሬፅስ፤

አስ ኦገን ኤንታ በእድ ኤረና፤

ኤንታ ጎጋይ መቀራ ኦይከትድ ምዳ መልስ።

9ምያባ ይድ፥ ኮሻን ሀይቅዳይሳታፐ

ኦላን ሀይቅዳይሳት ሎኦ።

10ታ አሳ ቦላ ይዳ ዩዋ ጋሶን፥

ቃትያ አየት ባንታ ናይታ ዶይስድ ምዶሶና።

11ጎዳ ሀንቆ ፁአይ ኩምስ፤ እ ባ ሱልያ ሸንያ ትግስ።

የሩሳላመ ባሱዋ ታማ ኦይስ።

12ሀ ሳአ ካዎታፐ ዎይኮ ካዎተታን ደእያ አሳፐ ኦንካ

ሞርከይ የሩሳላመ ፐንግያራ ገላና ግድ አማንበና።

13ሽን ሀይስ ሀንዳይ እያ ናበታ ናጋራስነ እያ ካህነት ኦዳ ናቁዋሳ፥

ፅሎታ ሱ እያ ግዶን ጉስዳ ግሾሳ።

14ኤንቲ ቆቀ አሳዳ፥ ኦገ ታታፎሶና፤

ኤንቲ ሱን ቱንዳ ግሾ

ኤንታ ማኡዋ ኦንካ ቦቻናዉ ኮየና።

15ሄሳ ግሾ፥ አሳይ፥ “ክችተ! ህንተ ቱና ግድያ ግሾ፥

ኑና ቦቾፍተ!” ያግድ ኤንታ ቦላ ዋስዶሶና።

ኤንቲ ባቃትድ ቶይላትያ ዎደ፥

ካዎተታን ደእያ አሳይ፥

“ህንተ ኑራ ሀይሳን ዳናዉ ዳንዳኤከታ” ያግዶሶና።

16ጎዳይ ኤንታ ላልስ፤ እ ኤንታባ ዛሪድ ቆፐና፤

ኤንታ ካህነት ቦንቸቶኮና፤

ኤንታ ጭማት ናሸቶኮና።

17ኑ አይፈይ ማዶ ደማናዉ ፄልሸ ጮ ዳቡርስ፤

ኑና አሻናዉ ዳንዳኦና

ካዎተታፐ ማዶ ናግዳ።

18አሳይ ኑ ገዳ ካልያ ግሾ፥

ኑ ካታማ ኦገራ ሄመታናዉ ዳንዳእቦኮ።

ኑ ዉርሰይ ማትስ፤ ኑ ላይይ ዉርስ፤

ኑስ ዮ ዎደይካ ጋክስ።

19ኑና የደይሳት ፕራያ አርጋንፈ አድ ኤሶቶሶና፤

ኤንቲ ኑና ደረ ሁጰራ የደዶሶና፤

ባዞን ሆክድ ኑና ናግዶሶና።

20ጎዳይ ትይዳ ካዎይ፥ ኑ ደኡዋስ ሸምፖይ፥

ኤንታ ፅህያን ኦይከትስ።

ኑ እያ ኩያ ጋርሳን ኡትድ፥

ካዎተታ ግዶን ዳና ግድ ቆፕዳ።

21ህንተኖ፥ ኡፃ ቢታን ደእያ ኤዶመ አሳዉ፥

ኡፋይትተ፤ ሀሹ ጊተ።

ሽን ፁአይ ህንተ ቦላ ያና፤

ህንተ ማትድ ካሎ አታና።

22ህንተኖ፥ ፅዮነ አሳዉ፥ ህንተ ሴራይ ግዳና፤

እ ህዛፐ ህንተና ድኦ ቢታን ዎና።

ሽን ኤዶመ አሳዉ፥ ህንተ ሴረታና፤

ህንተ ናጋራይካ ቆንጫና።