ጌሻ ማፃፋ
አይሰይሳታ 16
ሳምሶናነ ዳልላ
እስ ጋላስ ሳምሶን ፍልስፄመ ካታማ ግድዳ ጋዛ ካታማ ብስ፤ ያን እስ ላይማ ማጫስ በእድ ኢራ አቃናዉ እ ሶ ገልስ። ጋዛ ካታማ አሳይ ሳምሶን ኤንታ ካታማ ይዳይሳ ስእድ ኬ ተቅድ ቃማ ኩመ ናግሸ ካታማ ፐንግያን አቅዶሶና። ሳእ ዎንትኮ ዎና ግድ ናግሸ ዶና ጱቆና አቅዶሶና። ሽን ሳምሶን ያን ግድ ብላሄ ጋካናዉ ጋምእስ። ብላሄ ደንድድ ካታማ ድርሳ ፐንግያ፥ ፐንግያ ኦይክያ ናምኡ ቱሳታነ ኮበ ብራታታ እስፈ ሾድስ። ሄ ኡባ ሀሸን ቶክድ ከብሮናፐ ስን ባጋራ ደእያ ዙማ ሁጰ ከስስ።
ጉ ዎደፐ ጉየ ሳምሶን ሶረቃ ዛንጋራን ደእያ እስ ዳልሎ ጌተትያ ማጫስዉ ዶስስ። ፍልስፄመ ሀላቃት ኢኮ ብድ፥ “ኔኒ እያ ጭማዳ፥ ሄ ዎልቃ ኡባ እ አዉፐ ደምያኮነ ኑኒ እያ ዋት ፆንድ ቃቻናዉ ዳንዳእያኮ ኦይቻ። ኑኒ እሶይ እሶይ ነዉ ታማነ እስ ክሎ ግራመ ብራ ሳንትመ እማና” ያግዶሶና።
ሄሳ ግሾ ዳልላ ሳምሶናኮ፥ “ሀይሳ መላ ምኖተ ነ አዉፐ ደምዳኮ፥ ሀያና ታዉ ኦዳርኪ። አስ ነና ቃችድ ዋትድ ነ ዎልቃ ዳቡርሳናዉ ዳንዳኢ?” ያጋሱ።
ሳምሶን፥ “ታና ላፑን እርፃ ዳፎራ አስ ቃችኮ ዳቡራዳ ሀራ አሳዳ ሀናና” ያግድ ዛርስ።
ፍልስፄመ ሀላቃት ዳልላስ ላፑን እርፃ ዳፎታ ኤህን እያ ሳምሶና ቃቻሱ። ቆልአን አሰ ቆታ ዎዳ፥ “ሳምሶና፥ ፍልስፄመት ይዶሶና” ጋዳ ፄጋሱ። ሽን ሻሎይ ታም ኦይክን ዱፀረተይሳዳ ዳፎታ ዱሰረ የግስ። ሀእካ እያ ምኖተ ፁራይ ኤረትቤና።
ዳልላ ሳምሶናኮ፥ “ኔኒ ታና ኤያ ኦሳ፤ ነ ታዉ ዎርዶ ኦዳዳሳ። ሀእካ ነና ዋት ቃቻናዉ ዳንዳኤትያኮ ሀያና ታዉ ኦዳ” ያጋሱ።
እ ዛሪድ፥ “አስ ጎኤትቦና ኦራ ዎዶሮን ታና ቃችኮ ዳቡራዳ ሀራ አሳዳ ሀናና” ያግስ።
ዳልላ ኦራ ዎዶሮ ኤካዳ ሳምሶና ቃቻሱ። ቆልአን አሰ ቆታ ዎዳ፥ “ሳምሶና፥ ፍልስፄመት ይዶሶና” ያጋሱ። ሽን እ ዎዶሩዋ ባ ቀስያፐ ሻሎዳ ዱሰረ የግስ።
ዳልላ ሳምሶናኮ፥ “ሀእ ጋካናዉ ነ ታና ጭማሳ፤ ኔኒ ታዉ ዎርዶ ኦዳዳሳ። ሀእካ ነና ዋትድ ቃቻናዉ ዳንዳኤትያኮ ሀያና ታዉ ኦዳ” ያጋሱ።
እ ዛሪድ፥ “ታ ሁጵያ ላፑን ብናና ዳታ ቃጭናራ ጋዳ፥ ቁፃራዳ ዳድኮ፥ ታኒ ዳቡራዳ ሀራ አሳዳ ሀናና” ያግስ።
ሄሳፈ ጉየ፥ ሳምሶን ስክዳሽን፥ ዳልላ እያ ሁጵያ ላፑን ብናና ዳታ ቃጭናራ ጋዳ ዶቃሱ። ሄሳፈ ጉየ፥ “ሳምሶና፥ ፍልስፄመት ይዶሶና” ያጋሱ። እ ስኮፈ ባርክድ፥ ባ ብናናይ ዶቀትድ ቶለትዳ በሳፈ ሾድ ኤክስ።
ያትን እያ፥ “ነ ዎዛናይ ታራ ዴና፥ ‘ዎይጋዳ ታ ነና ዶሳይስ’ ጋይ? ሄ ቶሆ ታና ጭማዳሳ። ኔኒ ሀ ምኖተ አዉፐ ደምያኮ ታዉ ኦዳ” ያጋሱ። ጋላስ ጋላስ ኦይቻዳ እ ሀይቆ አሞታና ጋካናዉ እያ ዋይሳሱ።
ዉርሰን ሳምሶን፥ “ታ አየ ኡሎፐ ዶምን ታኒ ፆሳስ ዱማትዳ ናዝራወ ግድዳ ግሾ፥ ታ ሁጰ ብናናይ ሜደትድ ኤረና። ታ ብናናይ ሜደትኮ፥ ታ ዎልቃይ ታፐ ኤከትን፥ ታኒ ዳቡራዳ ሀራ አሳዳ ሀናና” ያግድ፥ ባ ፁራ ኡባ እዉ ኦድስ።
ባ ዎዛናን ደእያባ ኡባ እ ኦድዳይሳ ዳልላ በእዳ ዎደ፥ “ባ ዎዛናን ደእያባ ኡባ ታዉ ኦድዳ ግሾ፥ አነ እስ ቶሆ ስሚድ ዪተ” ያጋዳ ፍልስፄመ ሀላቃታስ ኪታ የድን ኤንቲ ብራ ኤክድ ኢኮ ይዶሶና። ዳልላ ሳምሶና ባ ዎድረ ቦላ ስክሳዳ እስ አስ ፄግን ይድ፥ እያ ሁጵያ ላፑን ዳ ብናና ሜድን እያ ዎልቃይ እያፐ ይስ። ሄሳፈ ጉየ፥ እያ ዋይሶ ዶማሱ። እያ፥ “ሳምሶና፥ ፍልስፄመት ይዶሶና” ያጋሱ።
እ ስኮፈ ባርክድ፥ ካሰይሳዳ ዱሰረዳ ባና ያግድ ቆፕስ፤ ሽን ጎዳይ እያፐ ሻከትዳይሳ ኤርቤና።
ፍልስፄመት እያ ኦይክዳፐ ጉየ፥ እያ ናምኡ አይፈታ ዎጭ ከስዶሶና። ጋዛ ካታማ ኤፍድ ናሰ ብራታ ሳንላታን ቃችድ ቃሾ ኬን ካ ጋጭስዶሶና። ኤንቲ እያ ሁጵያ ብናና ሜድዳፐ ጉየ፥ ብናናይ ስሚድ ዶሎ ዶምስ።
ሳምሶና ሀይቁዋ
ፍልስፄመ ሀላቃት፥ “ኑ ፆሳይ ኑ ሞርክያ ሳምሶና ኑ ኩሸን አድ እሚስ” ያግድ ባንታ ፆሳ ዳጎናስ ያርሾ ያርሻናዉነ ኡፋይታናዉ እስፈ ሺቅዶሶና።
አስ ኡባይ እያ በእዳ ዎደ፥ “ኑ ቢታ ይስዳነ ኑፐ ዳሮታ ዎዳ ኑ ሞርክያ፥ ኑ ፆሳይ ኑ ኩሸን አድ እሚስ” ያግድ ባንታ ፆሳ ጋላትዶሶና። ኤንቲ ዳሮ ኡፋይትዳ ግሾ፥ “ዱርድ ኑና ኡፋይሳና መላ ሳምሶና ፄግተ” ያግዶሶና። ሳምሶና ቃሾ ኬፈ ፄግድ ኤህን፥ እ ኤንታ ስንን ዱርዳፐ ጉየ ቱሳታፐ ግዶን ኤስዶሶና።
ሳምሶን ባ ኩሽያ ኦይክድ ካለያ ናኣኮ፥ “ታኒ ኤንታን ዘምፓዳ ኤቃና መላ ኬ ቶክዳ ቱሳታ ታና ኦይ” ያግስ። ኬ ግዶን አደይነ ማጫስ፥ ሄሳዳካ ፍልስፄመ ሀላቃት ኡባይ ኩምድ ደኦሶና። ሳምሶን ዱርሽን፥ ፖቅያ ቦላ ኡትድ በእያ ሄ ሙኩሉ ግድያ አደይነ ማጫስ በኦሶና።
ሄ ዎደ ሳምሶን፥ “አቤት ኡባ ሃርያ ጎዳዉ፥ ታና ቆፓርክ። አቤት ፆሳዉ፥ ፍልስፄመት ታ ናምኡ አይፈታ ከስዳ ግሾ፥ ሀሎ ከያና መላ ታና እስ ቶሆ ምንርክ!” ያግድ ጎዳ ዎስስ። ሳምሶን ኬ ቶክዳ ግዶ ቱሳታ ናምኣካ ኦይክስ። እሱዋ ኡሻቻ ኩሸን፥ እሱዋ፥ ሀድርሳ ኩሸን ኦይክዳፐ ጉየ፥ “ታኒ ፍልስፄመታራ እስፈ ሀይቃና” ያግድ ዋስስ። ባዉ ደእያ ዎልቃ ኡባን ሱግን፥ ኬይ ሀላቃታ ቦላነ ጋርሳን ደእያ አሳ ኡባ ቦላ ኩንድስ። ሳምሶን ፓፃ ደእሸ ዎዳ አሳፐ ሀይቅሸ ዎዳ አሳይ ዳሮ።
እያ እሻትነ እያ ዳቦት ኡባይ ይድ፥ እያ አሀ ኤክዶሶና። ፆርአፈነ ኤሽታኦላፐ ግዶን እያ አዋ ማኑሄ ዱፉዋን ሞግዶሶና። ሳምሶን እስራኤለ ላታሙ ላይ አይስስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.