ጌሻ ማፃፋ
እዮባ 3
እዮባ ሃሳያ
ሄሳፈ ጉየ፥ እዮብ ባ ዶና ዶይድ፥ ባ የለትዳ ጋላሳ ሀይሳዳ ያግድ ባድስ።
“ታኒ ቃንትዳ ቃማይነ
የለትዳ ጋላሳይ ባደትዳባ ግዶ!
ሄ ጋላሳይ ማን ላመቶ!
ሳሎ ፆሳይ ሄ ጋላሳ ቆፖፎ፤
እያ ቦላ ፖኦይካ ፖኦፖ።
ሳካና ምነ ጫጋን እያ ጎዞ፤
እያ ሻሪ ካሞ፤
እያ ፖኡዋ ም ቆሶ።
ሄ ጋላሳ ቃማ ሳካና ም ኦይኮ።
ላይ ግዶን ደእያ ጋላሳታን ታይበቶፎ፤
አጌናታ ታይቦንካ ገሎፖ።
ሄ ቃማይ ማይኖ፤
ኡፋይሳ እልልስ እያን ስኤቶፎ።
ሌዋታነ1 ደንናዉ ዳንዳኤይሳትነ
ጋላሳታ ባደይሳት ሄ ጋላሳ ባዶ።
ሄ ቃማን ባካል ፖኦፖ፤
ፖኦ ናግድ ደሞፎ፤
ዎንታ ፃልቀይ እያዉ ዶሎፖ።
ሄ ጋላሳይ ታኒ ታ አየ ኡሎን ቃንቶና መላነ
ሀ ዋይያ በኦና መላ አሽቦና ግሾ ባደትዳይሳ ግዶ።
“ታኒ ታ አየ ኡሎን ሃ ግድዳ ግዳርክና!
ታ አየ ኡሎፐ የለታ ዎዳ መላ ሀይቅዳ ግዳርክና!
ታ አይያ ታና አይስ ባ ክኦን ኤካደሻ?
ባ ንካ ታና አይስ ንደሻ?
ሄ ዎደ ታኒ ሀይቅዳባ ግድያኮ፥
ሀእ ታኒ ሸምፓዳ ስካና ሽን!
ሀእ ላለትዳ በሳታ ባንታዉ ኬፅዳ፥
ሀ ሳኣ ካዎታራነ ዞረይሳታራ፥
ኤንታ ኬን ዎርቃይነ ብራይ ኩምዳ ሀላቃታራ
እስፈ ዱፎን ዝንአናሽን!
ዎይኮ ቦሻ ግድድ የለትዳ ናአዳ፥
ጋላሳ ፖኦ በእቦና ዮጋ ናአዳ ቢታ ግዶን አይስ ቆሰታብክና?
ዱፎን ኢታት ባንታ ኢታ ኦሶ አጎሶና፤
ያን ዳቡራንቾት ሸምፖሶና።
ሄ በሳን ቃሾ አሳት ሸምፕድ ኡፋይቶሶና፤
ኤንታ ኡንኤይሳታ ዋሱዋ ያን ስኦኮና።
ግትነ ጉ ያን ደኤስ፤
አይለትካ አይለተፈ ያን ላአ ከዮሶና።
“መቶን ደኤይሳታስ፥
ሸምፖይ ጫመትዳይሳታስ፥
ፖኦይ አይስ እመትዴ?
ሀይቆ አሞትድ ደሞናይሳታስ፥
ቆትድ ዎዳ ሻሎፐ አድ ኮየይሳታስ፥
ደኦይ አይስ እመትዴ?
ዱፎ ጋክያ ዎደ ኡፋይተይሳታስ፥
ደኦይ አይስ እመትዴ?
ኦገይ ይዳ ኡራስ፥
ፆሳይ እያ ዩሹዋ ድርዳ ኡራስ፥
ፖኦይ አይስ እመትዴ?
ኦለይ ታዉ ካ ግድስ፤
ታ ዋሶይ ጎግያ ሃ ግድስ።
ታኒ ያይዳባይ ታ ቦላ ጋክስ፤
ታኒ ዳጋምዳባይ ታዉ ሀንስ።
ታዉ መቶፐ አትሽን፥
ሳሮይ፥ ዎፕነ ሸምፖይ ባዋ” ያግስ።
Source notes (1)
- Footnote ሌዋታነ፦ ሃን ደእያ ዎልቃማ ዶአ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.