እሳያሳ 64

1አቤት ጎዳዉ፥ ሳሎታ ዳካዳ ዱገ ዎ፤

ደረት ነ ስንን ኮኮሮ።

2ታም ኤፅድ ሃ ፐንትሰይሳዳ ዱገ ዎዳ፥

ነ ሱን ነ ሞርከታ ኤርሳ፤

ካዎተታካ ነ ስንን ኮኮርሳ።

3ካሰ ኑኒ ናግቦና ማላታታ

ኔኒ ኦዳ ዎደ ዎዳሳ፤

ደረት ነ ስንን ኮኮርዶሶና።

4በንፐ ዶምድ፥ ነና አማነትድ፥

ናገይሳታስ ማላታታ ኦዳይ ኔፐ አትሽን፥

ሀራ ፆሲ፥ አሳ ሀይ ስእቤና፤

አሳ አይፈይ በእቤና።

5ኡፋይትድ ፅሎተ ኦይሳታነ

ነ ኦግያ ቆፐይሳታ ኔኒ ማዳዳሳ።

ሽን ኑኒ ናጋራ ኦሶ አጎና እፅዳ ዎደ

ኔኒ ሀንቀታዳሳ፤ ኑኒ ዋንድ አታኔ?

6ኑኒ ኡባይ ቱና አስ ግድዳ፤

ኑ ፅሎተ ኦሶ ኡባይ ቱና ጩርቃ መላ።

ኑ ኡባይ ቦንጮዳ ቆለትዳ፤

ኑ ናጋራይ ኑና ጫርኮዳ ፕትድ ኤፍስ።

7ኔኒ ነ ስን ኑፐ ገንዳሳ፤

ኑ ናጋራይ ኑና ይሳና መላ አጋዳሳ።

ነ ሱን ፄገይ ዴና፤

ነና ምንድ ኦይካናዉ ኮየይ ባዋ።

8ግዶሽን፥ አቤት ጎዳዉ፥ ኔኒ ኑ አዋ፤

ኑኒ ኡርቃ፤ ነ ኡርቃ መዳሳ፤

ኑኒ ኡባይ ነ ኩሸን መትዳ።

9አቤት ጎዳዉ፥ ዳሮ ሀንቀቶፋ፤

ኑ ናጋራ መርናዉ ቆፖፋ።

ኑኒ ኡባይ ነ አሰ ግድያ ግሾ፥

ኑና በአ።

10ነ ጌሻ ካታማት መላ ቢታ ግድዶሶና፤

ፅዮነ ካታማይ መላ ቢታ፥

የሩሳላመይ ባይሳ ግድስ።

11ኑ አዋት እያን ነና ጋላትዳ ጌሽነ

ሎኦ ግድዳ ኑ ፆሳ ኬይ ታማን ፁገትስ፤

ኑ ሎኦ በሳ ኡባይ ላለትስ።

12አቤት ጎዳዉ፥ ኔኒ ሀይሳ ኡባ በአሸ ስእ ጋኔ?

ሀ ኡባይ ሀንን፥ ኑኮ ስምኪ?

ኔኒ ስእ ጋዳ ዛው ባይና ሴራኔ?