እሳያሳ 26

ፆኖ ማዝሙረ

1ሄ ጋላስ ይሁዳ ቢታን ሀ ማዝሙረይ የፀታና።

ኑስ ምኖ ካታም ደኤስ፤

ፆሳይ አቶተ

እያ ዩሹዋን ግምበነ ሚፃ ኦስ።

2ባ አማኑዋ ናግያ ፅሎ ደረይ፥

ገላና መላ ካረታ ዶይተ።

3እ ነናን አማነትዳ ግሾ፥

ባ ዎዛና ነናን ዎዳ ኡራ፥

ኔኒ ፖሎ ሳሮተን ናጋሳ።

4ጎዳይ መርና ዛላ ግድያ ግሾ፥

ጎዳን መርናዉ አማነታ።

5ቃን ደኤይሳታ ዝቅ ኦስ፤

ቁ ግዳ ካታማ ካዉሽስ።

እያ ሳአን ዱገ የግስ፤

ቢታ ባናን ሆልስ።

6ማንቆት እያ የና

ኡንኤትዳይሳት እያ ቦላራ ሄመታና።

7ፅሎታ ኦገይ ሱረ፤

አቤት ፅሉዋዉ፥ ኔኒ ፅሎታ ኦግያ ጊግሳሳ።

8አቤት ጎዳዉ፥ ኑኒ ነ ህግያ ናጋናዉ አሞቶስ፤

ነ ሱን ቦንቾይነ ነ ቴማይ ኑ ዎዛና አሞ።

9ቃማ ታኒ ነና ላሞታስ፤

ዎንታ ታ አያናይ ነና ምንድ ኮዬስ።

ነ ቢታ ፕርዳናዉ ያ ዎደ፥

ሳአን ደእያ አሳይ ፅሎተ ታማሬስ።

10ኢታ አሳስ ኬሀተ ኦሰትኮካ፥

እ ፅሎተ ታማረና።

ሱረ ቢታን ኢታባ ኦስ፤

ጎዳ ግታተ ኤረና።

11አቤት ጎዳዉ፥ ነ ኩሸይ ቁ ግስ፤

ሽን ኤንቲ በኦኮና።

ነ አሳስ ኔኒ ምሸትያ ምሻ

በእድ ዬላቶ።

ኔኒ ነ ሞርከታስ ጊግስዳ ታማይ

ኤንታ ምድ ይሶ።1

12አቤት ጎዳዉ፥ ኑስ ሳሮተ እማዳሳ፤

ኑ ኦሶ ኡባ ነ ኦዳሳ።

13አቤት ጎዳዉ፥ ኑ ፆሳዉ፥

ሀራ ጎዳት ኑና ሃርዶሶና፤

ሽን ኑኒ ነ ሱን ፃላላ ቦንቾስ።

14ኤንቲ ሀይቅዶሶና፤ ስሚድ ደኦን ዶኮና።

ነ ሴርን ይዳ ግሾ፥ ዛሪድ ደንዶኮና።

ኤንታ ቆፍሱዋ ኡባ ቁቻዳ ይሳዳሳ።

15አቤት ጎዳዉ፥ ኔኒ ካዎተ ዳርሳዳሳ፤

ካዎተ ዳርሳዳ ኔኒ ቦንቸታዳሳ፤

ቢታ ዛዋ ኡባ ዳልግሳዳሳ።

16አቤት ጎዳዉ፥ መቶ ዎደ ኤንቲ ነና ኮይዶሶና።

ነ ኤንታ ሴርዳ ዎደ ነና ካልካሽድ ዎስዶሶና።

17አቤት ጎዳዉ፥ ቃንትዳ ማጫስ፥

የሎ ዎደይ ጋክን ኡንኤታዳ ዋሰይሳዳ፥

ኑኒ ነ ስንን ሄሳዳ ሀንዳ።

18ኑኒ ቃንትዳ፤ እቀትዳ፤

ሽን ጫርኮ የልዳ።

ኑኒ ሳኣስ አቶተ ኤህቦኮ፤

ቢታን ደእያ አሳ የልቦኮ።

19ሀይቅዳ ነ አሳይ ፓፃና፤

ኤንታ አሀይ ደንዳና።

ህንተኖ፥ ቢታ ጋርሳን ደኤይሳቶ፥

ደንድድ ኡፋይሳ ማዝሙረ የፅተ።

ህንተ አካይ ዎንታ አካ መላ፤

ቢትያ ሀይቅዳይሳታ ዛራዳ እማና።2

20ታ አሳዉ፥ ብድ ህንተ ሶ ገልድ፥

ካርያ ህንተ ቦላ ጎርድተ።

ጎዳ ሀንቆይ አና ጋካናዉ፥

ጉ ዎደስ ህንተና ቆስተ።

21ቢታ ቦላ ደእያ አሳ፥

ኤንታ ናጋራ ግሾ ሴራናዉ፥

ጎዳይ ባ ደእያ በሳፈ ከይድ ዬስ።

ቢትያ ባ ቦላ ጉክዳ ሱ ቆንጭሳና፤

ሀይቅዳይሳታ ዛራዳ ገንኩ።