እሳያሳ 1

1ኦዝያን፥ እዮአታም፥ አካዝነ ህዝቅያስ ይሁዳን ካል ካልድ ካዎትዳ ዎደ አሞፀ ናአይ እሳያስ ይሁዳባነ የሩሳላመባ በእዳ ቆንጨይ ሀይሳ።1

ስኦና ደረ

2ሳሎቶ ስእተ፤ ሳአዉ ሀይዛ ስአ፤

ጎዳይ ሀይሳዳ ያጌስ፤

“ታ ናይታ የላዳ ድቻስ፤

ሽን ኤንቲ ታዉ ማካልዶሶና።

3ቦር ባ ጎዳ ኤሬስ፤

ሀረይካ ባና ሃርዳይሳ ዛዳሉዋ ኤሬስ።

ሽን እስራኤለይ ኤረና፤

ታ አሳይ አኬከና።

4ህንተኖ፥ ናጋራንቾ ካዎተቶ፥

ባላ ኦሶን ዴፅዳይሳቶ፥

ኢታ ኦያ የለተቶ፥

ቱና ኦሶስ እመትዳ ናይቶ፥

ጎዳ አግዳይሳቶ፥

ህንተና አየ!

እስራኤለ ጌሻ ካደታ፤

እያዉ ዞኮ ዛርደታ።

5ማካላ ቦላ ማካላ አይስ ጉጄቲ?

አይስ ዛር ዛር ሾጨቴቲ?

ህንተ ሁጰይ ሀርገትስ፤

ህንተ ዎዛናይ ዳቡርስ።

6ሁጰ ብናናፐ ቶሆ ፁጉን ጋካናዉ ፓያተ ባዋ፤

ማዱን፥ ክፅነ ስ ማእስ።

ኤንቲ ጊይቦኮና፥ ዎይኮ ሜጨትድ ቃሸትቦኮና

ዎይኮ ዛይተን ትየትድ ሎፅክቦኮና።

7“ህንተ ቢታይ ኦፅስ፤

ህንተ ካታማት ታማን ፁገትዶሶና።

ህንተ በእሽን ህንተ ጎሻ አላጋት ኤካና፤

እማ አሳት ህንተ ቢታ ቁኤ ከሳና።

8የሩሳላመይ ዎይነ ጋደን ደእያ ሻቃራዳ፥

ሌሄ ግዶን ደእያ ጋባዳነ

ሞርከን ተቀትዳ ካታማዳ ሀናዳ አታና።

9ኡባፈ ዎልቃማ ጎዳይ ኑስ ጉ ኮቸ አሾናኮ

ኑኒ ሶዶመነ ጋሞራ ካታማዳ ሀናናሽን”2 ያግስ።

10ህንተኖ፥ ሶዶመ ሀላቃቶ፥ ጎዳ ቃላ ስእተ!

ህንተኖ፥ ጋሞራ አሳዉ፥ ኑ ፆሳ ህግያ ስእተ!

11“ህንተ ያርሾ ዳሮይ ታዉ አይ ኦ?

ሀኖ ጋካናዉ ህንተ ታዉ ሺሽዳ ኡርገ ዶርሳነ

ሞ መሄ ፁሳ ያርሾይ ታዉ ግዳና።

ታኒ ኮርማታ፥ ዶርሳ ኡርገታነ

ዴሻታ ሱን ኡፋይትከ።

12ህንተ ታ ስንን በንታናዉ ያ ዎደ

ታ ኬ ዳባባ ህንተ የና መላ ኦነ ኦይችዳይ?

13ሀዳ ያርሹዋ ኤሄይሳ አግተ!

ህንተ ጩይስያ እፃነይ ታና ሻቴስ።

አጌና ፄሮን ህንተ ቦንችያ ጋላሳ፥

ሳምባታነ ኢታተን ህንተ ሺቅያ ሺቁዋ ታኒ እፃይስ።

14አጌና ፄሮን ህንተ ቦንችያ ጋላሳነ

ህንተ ባኣለ ጋላሳታ ታኒ እፃስ፤

ኤንቲ ታዉ ቶሆ ግድዶሶና፤

ታኒ ኤንታ ቶካናዉ ዳንዳእከ።

15ህንተ ኩሸ ምጭድ ታና ዎስያ ዎደ

ታኒ ታ አይፍያ ህንተፈ ገንና።

ህንተ ኩሸይ ሱን ኩምዳ ግሾ

ህንተ ዳርስ ዎስኮካ ታኒ ስእከ።

16ሜጨትተ፤ ህንተና ጌሽተ፤

ህንተ ኢታ ኦሱዋ ታ ስንፈ ድግተ፤

ገነ ሀኑዋ አግተ።

17ሎኦባ ኦሶ ታማርተ፤

ፅሎ ፕርዳ ኮይተ።

ኡንኤትዳይሳታ አሽተ፤ ይኦታስ ኤቅተ፤

አምኤታስ ሞተትተ”

ያጌስ ጎዳይ።

18“ሃይተ፤ አነ ዎል አማንስ። ህንተ ናጋራይ ባራ ቢታዳ ዞእኮካ፥ ሻቻዳ ቦፃና፤ ሱዳ ዞእኮካ ፑቶዳ ቦፃና። 19ህንተ ኤሮ ግድ ታዉ ኪተትኮ ቢታ አንጁዋ ማና። 20ሽን ህንተ እፃስ ግድ ማካልኮ፥ ማሻን ሜተታና” ያጌስ ጎዳይ ባ ዶናን።

21አማነትዳ ካታምያ ዋናዳ ላይማ ግዳዴ? ካሰ ሱረተነ ፅሎተ እ ግዶን ኩምስ፥ ሽን ሀእ ሸምፖ ዎይሳት እ ግዶን ደኤስ። 22ነ ብራይ ባልትስ፤ ነ ማልኦ ዎይነይ ሃን የለትስ። 23ህንተ ሀላቃት ማካላንቾታነ ካይሶ ላገ ግድዶሶና፤ ኤንቲ ኡባይ ዎፈ ዶሰይሳታነ ኩሸ ፄለይሳታ። ይኦታስ ሱረ ፕርዶኮና፤ አምኤታ ዋሱዋ ስኦኮና።

24ሄሳ ግሾ፥ ጎዳይ፥ ኡባፈ ዎልቃማ ፆሳይ፥ እስራኤለ ዎልቃማይ፥ ሀይሳዳ ያጌስ፤ “ሀእ ታኒ ታ ሞርከታ ቦላ ታ ሀንቁዋ ጉሳና፤ ታራ ኤቀተይሳታ ሀሎ ከያና። 25ታኒ ታ ኩሽያ ነ ቦላ ዛራና፤ ነ ባልተ ጌሻና፤ ነ ቱናተ ኡባ ኔፐ ድጋና። 26ታኒ በንይሳዳ ነ ሀላቃታ፥ ኮይሮይሳዳ ነ ዞራንቾታ ደንና። ሄሳፈ ጉየ፥ ኔኒ አማነትዳ ቢታ፤ ፅሎተ ካታማ ጌተታና” ያጌስ።

27ፅዮነይ ሱረ ፕርዳን፥ ባንታ ናጋራ ፓፀይሳትካ ፅሎተን ዎዘታና። 28ሽን ማካላንቾትነ ናጋራንቾት እስፈ መቃና፤ ጎዳ አገይሳት ያና። 29ህንተ ኡፋይትዳ ያርሾ ዎላን ዬላታና፤ ህንተ ዶርዳ ኮራን ካዉያና። 30ህንተ ሀይ ቆቆፈትድ ዉርዳ ዎላዳነ ሃ ይዳ አታክልተ በሳዳ ግዳና። 31ባና ምኖ ገይ ቡፃ ግዳና፤ እያ ኦሶይካ ፖልኡ ግድ ቶእያ ታማ ግዳና፤ ኤንቲ እስፈ ፁገታና፤ ሄ ታማ ቶይሳና አስ ባዋ።