እብራወ 9

ሳአ ፆሳ ኬን ደእያ ጎይኖ

1ኮይሮ ጫቁዋስ ፆሳ ጎይንያ ዎጋይነ ሳአ ፆሳ ኬይ ደኤስ። 2ዱንካነይ ኤቅስ። እያን ፆምፐ ዎያ ኮጫይ፥ ፃርጴዛይነ ጎዳ ስንን ዎያ ኡይይ ደኤስ፤ ሄ በሳይ ጌሻ በሳ ጌተቴስ።1 3ናምአን ማጋራጁዋፈ ጉየ ባጋራ ደእያ በሳይ ኡባፈ ጌሻ በሳ ጌተቴስ።2 4እያ ግዶን እፃነ ጩይስያ ዎርቃ ሳፅነይነ ዎርቃን ሜሸትዳ ጫቆ ታቦተይ ደኤስ። ሄ ጫቆ ታቦትያን ማናይ ደእያ ዎርቃ ፃሮይ፥ አጭዳ አሮና ፃምአይነ ሙሰ ህገይ ፃፈትዳ ናምኡ ሎቸ ሹቻት ደኦሶና።3 5ሄ ታቦትያፐ ቦላ ባጋራ አቶተ ካማ ባንታ ቀፍያን ገንያ ቦንቾ ክሩበት ደኦሶና። ሽን ሀእ ሄ ኡባ ቆንጭስድ ኦዳናዉ ዳንዳኦኮ።4

6ሀ ኡባይ ሀይሳዳ ጊግዳፐ ጉየ፥ ካህነት ኡባ ዎደ ባንታ ኦሱዋ ኦናዉ ዱንካንያስ ኮይሮ ክፍልያ ገሎሶና።5 7ሽን ካህነ ሀላቃ ፃላል ዱንካንያስ ናምአን ክፍልያ ላይፈ እስ ቶሆ ገሌስ። እ ያ ገልሸ ባ ናጋራ ግሾነ አሳይ ኤሮና ኦዳ ናጋራ ግሾ ሱ ያርሾ ኤኮና ገለና።6 8ኮይሮ ዱንካነይ ኤቅድ ደእሽን፥ ኡባፈ ጌሻ በሳ ኤፍያ ኦገይ ቡሮ ዶየትቦናይሳ ጌሻ አያናይ ሄሳን ኤርሴስ።

9ሄስ ሀ ዎድያስ ሌምሶ፤ ፆሳስ እመትያ እሞይነ ያርሾይ ጎይንያ ኡራ ካሀ ጌሻናዉ ዳንዳኦናይሳ ሀይስ በሴስ። 10ሄሳት ሙሳባ፥ ኡሻባነ ዱማ ዱማ ሜቻ ዎጋታ ኦደይሳታ። ኤንቲ ኦራ ዎጋይ ያና ጋካናዉ ኦሰትያ ካረ ባጋ ዎጋታ።

11ሽን ክርስቶስ ሀእ ኑ ደምዳ ሎኦባታስ ካህነ ሀላቃ ግድድ ይስ። እ ገልዳ ዱንካነይ ግታነ ፖሎ ግድዳይሳ። ሄ ዱንካነይ አሳ ኩሸን ኦሰትቤና ቃስ ሀ አላምያባ ግደና። 12ክርስቶስ ኡባፈ ጌሻ በሳ ገልያ ዎደ ዴሻ ሱነ ማር ሱ ኤክድ ገልቤና። ሽን መርና አቶተ እማናዉ ባ ሱ ኤክድ ዛረና ኦገን እስ ቶሆ ገልስ። 13ዴሻ ሱይነ ኮርማ ሱይ፥ ፁገትዳ ኡሳ ብዶይ፥ ቱንዳ አሳ ቦላ ርጨትድ ኤንታና ጌሽያባ ግድኮ፥7 14መርና ጌሻ አያና ባጋራ ቦረይ ባይና ያርሾ ኦድ፥ ፆሳስ ባና እምዳ ክርስቶሳ ሱይ፥ ደኦ ፆሳ ጎይናና መላ ሀይቆ ካለያ ኦሱዋፐ ኑ ካሀ ዋት አድ ጌሸኔ?

15ሄሳ ግሾ፥ ፄገትዳይሳት ፆሳይ እምዳ መርና ላታ ኤካና መላ ክርስቶስ ኦራ ጫቁዋስ ግዶ ግድድ ስገይሳ ግድስ። ሄስ ሀንዳይ አሳይ ኮይሮ ጫቁዋፐ ጋርሳን ደእያ ዎደ ኦዳ ናጋራፐ ኤንታና ዎዛናዉ እ ሀይቅዳይሳና።

16ህዛ፥ ኬከይ ደእኮ፥ ሄ ኬክዳ ኡራ ሀይቆይ ኤረታናዉ ኮሼስ። 17ኬክዳ ኡራይ ሀይቅኮ እያ ኬከይ ምኔስ። ኬክዳ ኡራይ ሀይቆና አትኮ እያ ኬከይ ኦና።

18ሀር አቶሽን፥ ኮይሮ ጫቆይካ ሱ ባይና ምንቤና። 19ሙሰይ ህገ ኪታ ኡባ አሳስ ኦድዳፐ ጉየ ማራ ሱነ ዴሻ ሱ ሃራ ዋላክድ፥ ዞኦ ዶርሳ እክሰነ ህሶጰ ውርጮ ኤክድ፥ ማፃፋ ቦላነ አሳ ቦላ ዉርፅስ።8 20ሙሰይ አሳኮ፥ “ህንተ ናጋና መላ ፆሳይ ኪትዳ ሱ ጫቆይ ሀይሳ” ያግስ። 21ሄሳዳካ፥ ዱንካንያ ቦላነ ኦያ ሚሸ ኡባ ቦላ ሱ ዉርፅስ።9 22ቱማካ ህገይ ገይሳዳ ጉባታፐ አትሽን፥ ኡባባይ ሱን ጌዬስ። ሱ ጉኮናሽን አቶተ ባዋ።10

የሱሲ ፖሎ ያርሸትስ

23ሳሉዋባስ ሌምሶ ግድዳይሳት ኡባይ መሄ ያርሾን ጌያናዉ ኮሼስ። ሽን ሳሎባት ባንታ ሁጰን ሄሳፈ አያ ያርሹዋን ጌያናዉ ኮሼስ።

24ክርስቶስ ቱማ ፆሳ ኬስ ሌምሶ ግድዳ፥ አሳ ኩሸን ኦሰትዳ ኡባፈ ጌሻ በሳ ገልቤና። ሽን እ ሀእ ኑ ግሾ፥ ፆሳ ስንን በንታናዉ ሳሉዋ ገልስ። 25ካህነ ሀላቃይ ላይን ላይን ባ ሱ ግዶናይሳ ኤክድ፥ ኡባፈ ጌሻ በሳ ገሌስ። ሽን ክርስቶስ ዳሮ ቶሆ ባና ያርሻናዉ ሳሎ ገልቤና። 26ሄሳዳ ሀንዳባ ግድያኮ፥ ክርስቶስ አላመይ መቶሳፐ ዶምድ ዳሮ ቶሆ ዋየታናዉ ኮሼስ። ሽን ሀእ ዎድያ ዉርሰን ናጋራ ድጋናዉ ባና ያርሽድ ዛረና ኦገን እስ ቶሆ በንትስ።

27አስ ኡባይ እስ ቶሆ ሀይቃናዉ ሄሳፈ ጉየ ፕርደታናዉ በሴስ። 28ሄሳዳካ፥ ክርስቶስ ዳሮ አሳ ናጋራ ድጋናዉ እስ ቶሆ ያርሸትስ። ሽን እ ናጋራ ቶካናዉ ግዶናሽን፥ ባና ናገይሳታ አሻናዉ ናምአን ቆንጫና።11