እብራወ 6

1ህዛ፥ ክርስቶሳባ ታማርስያ ኮይሮ ትምርትያ አግድ ክርስቶሳን ካሃማተኮ ቦስ። ሀይቆ ኦሶፐ ስሞባነ ፆሳ አማኖባ ኮይሮ ትምርትያኮ ጉየ ስሞኮ። 2ሄሳዳካ፥ ፅንቃተታባ፥1 ኩሸ ዎሶባ፥ ሀይቆፐ ደንዶባነ መርና ፕርዳባ ዛር ታማሮኮ። 3ፆሳይ ጊኮ ኑ ሄሳ ኦና።

4እስ ቶሆ ፖኦይ ፖእዳይሳታ፥ ሳሎ እሞታ ኤክዳይሳታ፥ ጌሻ አያናን ሻከትዳይሳታ፥ 5ሎኦ ፆሳ ቃላነ ስንፈ ያና አላምያ ዎልቃ በእዳይሳታ፥ 6ጉየፐ ካድዳይሳታ ናጋራፐ ናምአን ዛራናዉ ዳንዳኤተና። አይስ ጊኮ፥ ኤንቲ ባንታ ዩዋስ ፆሳ ናኣ ዛር ካቅያ መላ ማስቃልያ ቦላ እያ ካቆሶናነ አሳ ስንን ካዉሾሶና።

7ኡባ ዎደ እ ቦላ ቡክያ እራ ኡያዳ፥ ጎይዳ ኡራ ማድያ ካ እምያ ቢትያ ፆሳን አንጀትዳሮ። 8ሽን አጉንነ ክንቾተ ዶልያ ቢትያ አይብባካ ማዱኩ፤ እዉ ባደይ ማታትስ፤ ዉርሰን ፁገታና።2

9ኑ ሲቆ እሻቶ፥ ኑኒ ሀይሳዳ ኦድያባ ግድኮካ፥ ህንተና አቶተኮ ካለያ ሎኦባይ ህንተዉ ደኤይሳ ኤሮስ። 10ፆሳይ ሱረ ፕርደይሳ። ፆሳይ፥ ህንተ ኦዳ ኦሱዋነ ካሰ ግድን ሀእካ አማነይሳታ ማድድ፥ እያዉ ደእያ ሲቁዋ በስዳይሳ ዶገና። 11ህንተ ኡባይ ኡፋይሳን ናገይሳ ደማና ጋካናዉ ሀ ምኖተ ዉርሰ ጋካናዉ በሳና መላ ኑ አሞቶስ። 12ህንተ አማኖንነ ዳንዳአን ናግያ ኡፋይሳ ላትያ አሳ ዳናና መላፐ አትሽን፥ አዛላ ግዳና መላ ኮዮኮ።

ፆሳ ኡፋይሳ ቃላይ ስሰና

13ፆሳይ አብራሃመስ እማና ግድ ጫቅዳ ዎደ ባፐ አያ ሀር ግት ባይና ግሾ ባ ሁጰን ጫቅስ። 14እያኮ፥ “ታኒ ነና አንጃና፤ ነ ዘረካ ዳርሳና” ያግስ።3 15አብራሃመይ ዳንዳአን ናግድ ፆሳይ እማና ግዳ ኡፋይሳ ኤክስ።

16አስ ጫቅሸ ባፐ ግታትያ ኡራን ጫቄስ፤ ሄ ጫቆይ ጌተትዳባ ምንድ፥ ፓላማ ኡባ ተቄስ። 17ሄሳ ግሾ፥ ፆሳይ ባ ላመቶና ቆፋ ኡፋይሳ ቃላ ላተይሳታስ ቆንጭሳናዉ ኮይዳ ግሾ ጫቆን ምንስ። 18ፆሳይ ዎርዶተና። እያ ኡፋይሳ ቃላይነ ጫቆይ፥ ናምአይካ ላመቶኮና። ሀ ናምኡባታን ኑ ስንን ደእያ ኡፋይሳ ኦይካናዉ ዳንዳአና መላ ገሸ ደማናዉ እያኮ ባቃትዳ ኑኒ፥ ዎልቃማ ምን ደማና።

19ሀ ኡፋይሳይ ኑ ሸምፑዋ፥ ማርካበይ ቃፆናዳ ምን ኦይክያ ብራታ መላ። ሄ ኡፋይሳይ ማጋራጁዋፈ ጉየ ባጋን ደእያ ጌሻ በሳ ገልስ።4 20የሱሲ ማልከፃደቃ ሹማተዳ መርናዉ ካህነ ሀላቃ ግድድ፥ ኑ ግሾ ኑፐ ስንትድ ሄ በሳ ገልስ።5