መተ 23

ሳር ሀይቁዋ

1ሳራ ፄታነ ላታማነ ላፑን ላይ ደአሱ። 2ሄሳፈ ጉየ፥ እያ ካናነ ቢታን ደእያ ቅርያት-አርባ (ከብሮና) ካታማን ሀይቃሱ። አብራሃመይ ሳርስ ዬክስነ ካዮትስ።

3ዬክ ስሚድ፥ አብራሃመይ ባ ማቸ አሀ ማታፐ ደንድድ ብድ፥ ህተታ ሀይሳዳ ያግስ፤ 4“ታኒ ህንተ ግዶን እማ፤ ታ ማቸ አሀ ሞጋናዉ ታዉ ህንተ ጋድያፐ ዱፎ በሲ ባይዘርከት” ያግስ።

5-6ህተት አብራሃመ፥ “ጎዳዉ፥ ኑኒ ኦደይሳ ስአ፤ ኔኒ ኑ ግዶን ዎልቃማ ሀላቃ፤ ኔኒ ነ ማቸ አሀ ኑ ዱፉዋፐ ነና ሎእዳሶን ሞጋ፤ ኔኒ ነ ማቸ አሀ ሞጋናዉ ባ ዱፉዋ ኦንካ ነና ድገና” ያግ ዛርዶሶና።

7አብራሃመይ ደንድ ኤቅድ፥ ህተታ ስንን ዝግስ። 8-9እ ኤንታኮ፥ “ህንተ ታና፥ ‘ነ ማቸ አሀ ሞጋ’ ጊኮ፥ ታኒ ግያባ ስእተ። ዞሃራ ናአ ኤፍሮናስ እያ ጋድያ ጋፃን ደእያ ማክፌላ ጌተትያ ጎንጎሉዋ ታ ዱፎ ኦናዉ ባይዛና መላ ኩመ ጋተን ኑና ዛልእሰርከት” ያግስ።

10ህተ አድያ ኤፍሮን ሄ ዎደ ካታማ ፐንገን ሺቅዳ ባ አሳ ግዶን ኡትስ። ህተት ኡባይ ስእሽን፥ አብራሃመኮ ያግስ፤ 11“ሄሳዳ ግደና፤ ታ ጎዳዉ፥ ታ ኦደይሳ ስአ፤ ታኒ ጋድያካ እያ ግዶን ደእያ ጎንጎሉዋካ ነዉ እማይስ፤ ታኒ ነዉ እያ ታ አሳ ስንን እማይስ፤ ኔኒ ነ ማቸ አሀ ሞጋ” ያግስ።

12አብራሃመይ ሄ ቢታ አሳ ስንን ዛር ዝግድ፥ 13አሳይ ስእሽን ኤፍሮና፥ “ታ ኦደይሳ ስአርክ! ታኒ ሄ ጋድያ ጋተ ቃንፃና፤ ኔኒ ታፐ ኤካርክ። ሄሳን ታኒ ታ ማቸ አሀ ሞጋና” ያግስ።

14-15ኤፍሮን አብራሃመኮ ዛሪድ፥ “ታ ጎዳዉ፥ ታኒ ኦደይሳ ስአ፤ ጋደይ ኦይዱ ፄቱ ብራ ሳንትመ1 ከሳና፤ ሽን ሄስ ነ ግዶንነ ታ ግዶን አይብካ ግደና፤ ነ ማቸ አሀ ሞጋ” ያግስ። 16አብራሃመይ ህተት ስእሽን፥ ኤፍሮን ግዳ ጋትያ ኤክስ፤ ሄ ዎደ ሚሸን ኦይዱ ፄቱ ብራ ሳንትመ ኤፍሮናስ እሚስ።

17ያት ስሚድ፥ ማምረ ካታማ ማታን ማክፌላን ደእያ ኤፍሮና ጋደይ፥ ያን ደእያ ጎንጎሎይነ ሄ ጋድያን ደእያ ም ኡባይ፥ 18ካታማ ፐንገን ሺቅዳ ህተታ ኡባ ስንን ዎጋ አብራሃመ ጋደ ግድስ።

19ሄሳፈ ጉየ፥ አብራሃመይ ባ ማችዉ ሳራ ካናነ ቢታን (ከብሮና) ጌተትያ ማምረ ካታማ ማታን ደእያ ማክፌላ ጌተትያ ጋደ ጎንጎሉዋን ሞግስ። 20ሄሳ ግሾ፥ ሄ ጋደይነ ያን ደእያ ጎንጎሎይ ህተታ ስንን ህግያን አብራሃመስ ዱፎ ግድስ።