ጌሻ ማፃፋ
ህዝቄላ 43
ቦንቾይ ፆሳ ኬ ስምስ
ሄ ኡራይ ታና ዶሎሀ ባጋ ፐንግያኮ ኤህስ። ታኒ እስራኤለ ፆሳ ቦንቾይ ዶሎሀ ባጋፈ የይሳ በአስ። እያ ዩሳ ግርሳይ ክፃ ሃ ጉን መላ፤ ቢታይ እያ ቦንቹዋን ፖእስ። ታ በእዳ ቆንጨይ ካሰ ጎዳይ የሩሳላመ ካታማ ይሳናዉ ይዳ ዎደ በእዳ ቆንጨ ዳኔስ። ኮቦራ ሻፋ ማታን ታኒ በእዳ ቆንጨ ዳኔስ። ሄ ዎደ ታ ሶምኡዋ ሳአ ጋዳ ጉፋናስ። ጎዳ ቦንቾይ ዶሎሀ ፐንግያራ ፆሳ ኬ ግዶ ገልስ። ሄ ዎደ ጎዳ አያናይ ታና ደንድ፥ ግዶ ዳባባ ገልስን፥ ሄኮ፥ ጎዳ ቦንቾይ ፆሳ ኬ ኩምስ።
ያን ሄ ኡራይ ታ ማታን ኤቅዳሽን፥ ፆሳ ኬ ግዶፈ ጎዳይ ታዉ ኦድሽን ስአስ። እ ታኮ፥ “አሳ ናአዉ፥ ሀይስ ታ አራታይ ኡትያነ ታ ቶሆይ የያ በሰ። ታ እስራኤለ አሳ ግዶን መርናዉ ዳና። ህዛፐ ጉየ እስራኤለ አሳ ግድን፥ ኤንታ ካዎታ ግድን፥ ኤቃ ጎይንድ ዎይኮ ባንታ ካዎታ ሀዉልተ ጎይንሸ ታ ጌሻ ሱን ቱንሶኮና። እስ ጎዳ ፃላል ታናነ ኤንታ ሻክን፥ ባንታ ፐንግያ ታ ፐንግያ ማታን፥ ባንታ ፐንገ ዝዝግያ ታ ፐንገ ም ማታን ኤስዶሶና። ባንታ እፀትዳ ኦሱዋን ታ ጌሻ ሱን ቱንስዶሶና። ሄሳ ግሾ፥ ታኒ ታ ሀንቁዋን ኤንታ ይሳስ። ህዛ ኤቃ ጎይኖ አጎ፤ ባንታ ካዎታ ሀዉልተ ታ ማታፐ ድጎ። ያትኮ፥ ታ ኤንታ ግዶን መርናዉ ዳና።”
ዛሪድ ጎዳይ ታኮ፥ “አሳ ናአዉ፥ ታ ነና በስዳ ፆሳ ኬ ኦሱዋ እስራኤለ አሳስ ኦዳ፤ ኤንቲ ባንታ ኦዳ ናጋራን ዬላታና መላ እያ መዋባ ኤንታዉ ኦዳ። ኤንቲ ባንታ ኦዳባን ዬላትያባ ግድኮ፥ ፆሳ ኬ ማላ፥ እ ኬፀትዳ ሀኖታ፥ ከይያ ደታ፥ ገልያ ፐንገታነ እያ ኩመ ምስልያ ኤንታዉ ቆንጭሳ። ሄሳዳካ፥ እያ ዎጋ፥ እያ ህግያ ኡባ ኤንታ ኤርሳ። ሄ ኬ ሀኖታ ካላና መላ እያ ህግያነ ዎጋ ናጋና መላ ኤንቲ ፄልሽን ፃፋ። ፆሳ ኬ ህገይ ሀይሳ፥ ዙማ ሁጰን፥ ፆሳ ኬ ዩሹዋን ደእያ በሳ ኡባይ ኡባፈ ጌሽ ግዳና።”
ያርሾ በሳ
ያርሾ በሳይ ካሰ ፆሳ ኬ ዋዳይሳዳ፥ እስ ዋነ ኦይዱ ብራ ጉጅድ ዋትስ። ያርሾ በሳ ባሱዋ ዩሾን እስ ዋ ዝቃነ እስ ዋ ዳልግያ ኦል ደኤስ፤ ሄ ኦላይ ካረ ባጋራ እስ ታካ ቄስ፤ ሄስ ያርሾ በሳ ቃተ። ባሱዋፐ ብድ፥ ኮይሮ ደ ጋካናዉ ቃተይ ናምኡ ዋ፤ ጎምፓይ እስ ዋ። ጉ ደፈ ብድ ግታ ደ ጋካናዉ ቃተይ ኦይዱ ዋ፤ ቃስ ጎምፓይ እስ ዋ። ያርሾይ ፁሳ ጮጨይ ደእያ ዉርሰ ደይ ኦይዱ ዋ ቃ። እ ኦይዱ ማዛነ ግድድ፥ ኦይዱ ማዛንያ ቦላ እስ እስ ካጨይ ደኤስ፤ ታማይ ኤፅያ ጮጨይ ኦይዱ ማዛነ ግድድ፥ አዱሳተይነ ዳልጋተይ ታማነ ናምኡ ዋ። ናምአን ደይ ሄሳ መላ ኦይዱ ማዛነ ግድድ፥ አዱሳተይነ ዳልጋተይ ታማነ ኦይዱ ዋ። ሄ ደ ካረ ባጋ ጋፃይ እስ ታካ ቄስ፤ ዩሾን እስ ዋ ኦል ደኤስ። ያርሾ በሳ ፑደ ኤፍያ ደት ዶሎሀ ባጋን ደኦሶና።
ኡባ ሃርያ ጎዳይ ታኮ፥ “አሳ ናአዉ፥ ፁሳ ያርሾ ያርሻናዉነ ሱ ዉርፃናዉ፥ ያርሾ በሳ ግምብድ ዉርስያ ጋላስ ኦሰታና ዎጋይ ሀይሳ። ታ ስንን ኤቅድ ኦያ ሳዶቃ ያራፐ የለትዳ ሌወ ኮቸ ግድዳ ካህነታስ ናጋራ ያርሾ ኦዳ እስ ዎፋኖ እማ” ያጌስ ኡባ ሃርያ ጎዳይ። ኔኒ ሄ ሱፈ ኤካዳ፥ ኦይዱ ካጨታ፥ ናምአን ደ ኦይዱ ማዛነታነ ሄ ደ ጋፃ ትያ። ሄሳዳ ኦዳ፥ ያርሾ በሳ ጌሻ። ናጋራ ያርሾስ እመትዳ ኮርማ ኤካዳ፥ ፆሳ ኬስ ተቀትዳ ጌሻ በሳፈ ካረ ባጋራ እያዉ ጊግዳ በሳን ፁጋ።
ዎንተ ጋላስ ቦረይ ባይና እስ ኮለ ኤካዳ፥ ናጋራ ያርሾ ኦዳ ያርሻ። ካሰ ኮርማ ሱን ጌሽዳይሳዳ ሄ ኮልያ ሱን ያርሾ በሳ ጌሻ። ጌሻ ስማዳ ቦረይ ባይና እስ ዎፋኖነ እስ ማራዘ ኤካዳ፥ ናምኣካ ጎዳ ስን ሺሻ። ካህነት ኤንታ ቦላ ማፅነ ላልድ፥ ጎዳስ ፁሳ ያርሾ ኦድ ያርሾ።
“ላፑን ጋላስ ኩመ፥ እስ እስ ጋላስ፥ እስ ኮለ፥ እስ ዎፋኖነ እስ ማራዘ ናጋራ ያርሾ ኦዳ ያርሻ። ካህነት ላፑን ጋላስ ኩመ ያርሾ በሳ ጌሽድ ጎዳስ ዱማዮ። ሀ ጋላሳት ዉርያ ዎደ፥ ሆስፑን ጋላሳፐ ዶምድ፥ ካህነት ፁሳ ያርሾነ እስፈተ ያርሾ ሺሾ። ሄ ዎደ ታ ህንተናን ኡፋይታና” ያጌስ ኡባ ሃርያ ጎዳይ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.