ህዝቄላ 25

አሞነ ቦላ ኦደትዳ ትንብተ

1ጎዳ ቃላይ ሀይሳዳ ያግሸ ታኮ ይስ። 2“አሳ ናአዉ፥ ነ ሶምኡዋ አሞነኮ ዛራዳ፥ ኤንታ ቦላ ትንብተ ኦዳ። 3ኡባ ሃርያ ጎዳይ ኦድያ ቃላ ስእተ። ህንተ ታ ኬ ቱንስያ ዎደ፥ እስራኤለ ቢታይ ባይሳ አትያ ዎደነ ይሁዳ አሳይ ድኤትያ ዎደ ሀሹ ግደታ። 4ታኒ ህንተና ዶሎሀ ባጋ ቢታ አሳስ ላታ ኦዳ እማና። ኤንቲ ህንተ ግዶን ካምበ ኬፅድ ዳና። ህንተ ም አይፍያ ኤንቲ ማና፤ ህንተ ማ ኤንቲ ኡያና። 5ታኒ ራባ ካታማ ግማለት ሄመትያ በሲ ከሳና፤ አሞነታ ቢታ ዶርሳ ዉደይ ፔእያ በሲ ኦና። ታኒ ጎዳ ግደይሳ ህንተ ሄ ዎደ ኤራና። 6ኡባ ሃርያ ጎዳይ ሀይሳዳ ያጌስ፦ ‘ህንተ እስራኤለ ዩዋን ኩሸ ባቅዳ ግሾ፥ ጉፕዳ ግሾነ ኡፋይትድ ቀልቅስዳ ግሾ፥ 7ታኒ ህንተ ቦላ ታ ኩሽያ ደንስ። ህንተና ካዎተታስ ድኦ ኦዳ እማና። ታ ህንተና አሳፐ ሾዳና፤ ካዎተታ ግዶፈ ይሳና። ታኒ ጎዳ ግደይሳ ህንተ ሄ ዎደን ኤራና’ ” ያጌስ።

ሞአበ ቦላ ኦደትዳ ትንብተ

8ኡባ ሃርያ ጎዳይ ሀይሳዳ ያጌስ፦ “ሞአበይነ ሳይረ፥ ‘ይሁድ ሀራ ካዎተታ ኡባ መላ’ ያግዳ ግሾ፥ 9ታኒ ሞአበ ቢታ ተቃና፤ እያ ዛዋ ናግያ፥ ኤረትዳ ቤት-ያሽሞታ፥ ባኣል-ማኦናነ ቅራታይማ ካታማታ ይሳና። 10ህዛፐ ጉየ አሞነታ ጉጃዳ፥ ኤንቲ ካዎተታ ግዶን ሀሳየቶና መላ ኤንታ ዶሎሀ ባጋ ቢታፈ ይዳ አሳስ አዳ እማና። 11ታኒ ሞአበ ፕርዳና፤ ታኒ ጎዳ ግደይሳ ኤንቲ ሄ ዎደ ኤራና” ያጌስ።

ኤዶመ ቦላ ኦደትዳ ትንብተ

12ኡባ ሃርያ ጎዳይ ሀይሳዳ ያጌስ፤ “ኤዶመይ ይሁዳ ቦላ ሀሎ ከይዳ ግሾነ ቆህዳ ግሾ፥ 13ታኒ ኩሽያ ኤዶመ ቦላ ደንና። ያን ደእያ አሳነ መህያ ኩመ ይሳዳ ባይሳ ከሳና። ተማናፐ ብድ፥ ደዳና ካታማ ጋካናዉ ኤንቲ ማሻን ዉራና። 14ታኒ እስራኤለ ባጋራ ኤዶመ ቦላ ሀሎ ከያና። እስራኤለት ኤንታ ቦላ ታ ይሉዋ መላ ኦና። ታኒ ሀሎ ከይዳይሳ ኤዶመይ ኤራና” ያጌስ ኡባ ሃርያ ጎዳይ።

ፍልስፄመ ቦላ ኦደትዳ ትንብተ

15ኡባ ሃርያ ጎዳይ ሀይሳዳ ያጌስ፦ “ፍልስፄመት ባንታ ዎዛና ኢታተን ሀሎ ከይዳ ግሾነ አቅዳ ሞርከን ይሁዳ ካድ ይሳናዉ ኮይዳ ግሾ፥ 16ታኒ ታ ኩሽያ ፍልስፄመታ ቦላ ደንና። ታኒ ከልታወታ ቃንፃና፤ አባ ዶናን አትዳይሳታ ኡባ ይሳና። 17ታ ኤንታ ቦላ ግታ ሀሎ ከያና፤ ታ ሀንቁዋን ኤንታ ሴራና። ታኒ ኤንታ ቦላ ሀሎ ከይያ ዎደ፥ ታኒ ጎዳ ግደይሳ ኤንቲ ሄ ዎደ ኤራና” ያጌስ።