ህዝቄላ 2

ህዝቄላ ፄገተ

1እ ታኮ፥ “አሳ ናአዉ፥ ደንዳ ኤቃ። ታ ኔራ ኦደታናዉ ኮያይስ” ያግስ። 2እ ታራ ኦደትያ ዎደ ፆሳ አያን ታ ግዶ ገልድ፥ ታና ታ ቶሁዋን ኤስስ፤ እ ታዉ ኦደይሳ ስአስ።

3“አሳ ናአዉ፥ ታ ነና እስራኤለ አሳኮ፥ ታ ቦላ ማካልዳ ደርያኮ ኪታይስ። ኤንትነ ኤንታ ማይዛት ሀች ጋካናዉ ታ ቦላ ማካልዳ መላ ደኦሶና። 4ኤንቲ ዎዛና ሙመነ ዬል ባይናይሳታ ግድያ ግሾ፥ ታ ነና ኤንታኮ ኪታይስ። ታኒ፥ ኡባ ሃርያ ጎዳይ ሀይሳዳ ያጋይስ። 5ሀ ማካላንቾ አሳይ ስእን፥ ስኦና እፅን፥ ናበይ ኤንታ ግዶን ደኤይሳ ኤንቲ ኤራና። 6አሳ ናአዉ፥ ኤንታዉነ ኤንታ ቃላስ ያዮፋ! ክንቾተይነ ፁንዱቀይ ነ ዩሾን ደእኮካ፥ ቃስ ኮርነታ ግዶን ነ ኡትኮካ ያዮፋ። ኤንቲ ማካላንቾ ኮቸ ግድያ ግሾ ኤንታዉ ዎይኮ ኤንታ ቃላስ ያዮፋ። 7ኤንቲ ማካላንቾ ኮቸ ግድያ ግሾ ኤንቲ ስእን፥ ስኦና እፅን ታ ቃላ ኤንታዉ ኦዳ። 8ሽን፥ አሳ ናአዉ፥ ታ ነዉ ኦደይሳ ስአ። ሀ ማካላንቾ አሳዳ ነካ ማካላንቾ ግዶፓ፤ ነ ዶና ዶያዳ ታ ነዉ እመይሳ ማ” ያግስ።

9ታ ፄልያ ዎደ፥ ሄኮ፥ ታኮ ምጨትዳ ኩሸ በአስ፤ ሄ ኩሽያን ፃ ማፃፍ ደኤስ። 10እ ታ ስንን ሄ ፃ ማፃፋ ብልስ፤ ሄ ማፃፋስ ናምኡ ባጋራ ዬሆይ፥ አዛኖይነ ዘለልስ ሁጰ ቆፋ ግድድ ፃፈትስ።