ጌሻ ማፃፋ
ህዝቄላ 12
ድኤትድ ቡሳ ሌምሰትሦ
ጎዳ ቃላይ ታኮ ሀይሳዳ ያግድ ይስ፤ “ነኖ አሳ ናአዉ፥ ኔኒ ጌላ አሳ ግዶን ደኣሳ። ኤንቲ ጌላ አስ ግድያ ግሾ ኤንታዉ አይፈይ ደኤስ፥ ሽን ደሞኮና፤ ሀይ ደኤስ፥ ሽን ስኦኮና። ሄሳ ግሾ፥ አሳ ናአዉ፥ ድኦን ብያ አሳዳ፥ ኔኒ ኤፋናዉ ዳንዳእያባ ኡባ ሺሻ ቃቻዳ፥ ጋላስ ኤንቲ በእሽን ከያዳ፥ ነ ደእያ በሳፈ ሀራ በሲ ባ። ኦን ኤር ኤንቲ ጌላ አስ ግድኮካ አኬካና። ጋላስ ኤንቲ ፄልሽን፥ ድኦ ብያ አሳዳ፥ ነ ቃችዳባ ካረ ከሳ፤ ኦማርስ ኤንቲ ፄልሽን፥ ድኤትድ ብያ አሳዳ ከያ። ኤንቲ ፄልሽን፥ ነ ኬ ጎዳ ሉካዳ ፆእያራ ከያ። ነ ከስዳ ሚሽያ ኤንቲ ፄልሽን፥ ነ ሀሸን ቶካዳ፥ ለምእሽን ደንዳዳ ባ። ነ አዉ ብያኮ በኦና መላ ነ ሶምኡዋ ካማ። ነ ሀንያባይ እስራኤለ አሳስ ማላ ግዳና” ያግስ።
ታኒ እ ታና ኪትዳይሳዳ ኦስ። ድኤትድ ብያ አሳዳ፥ ጋላስ ታ ቃችዳባ ካረ ከሳስ። ኦማርስ ታ ኬ ጎዳ ታ ኩሸን ሉካዳ ከያስ፤ ታ ከስዳ ሚሽያ ኤንቲ ፄልሽን፥ ታ ሀሸን ቶካዳ፥ ለምእሽን ባስ።
ዎንታ ጉራ ጎዳ ቃላይ ታኮ ሀይሳዳ ያግድ ይስ። “ነኖ አሳ ናአዉ፥ ጌላ እስራኤለ አሳይ፥ ‘ነ ኦያባይ አይቤ?’ ግድ ነና ኦይችቦኮና? ኤንታዉ ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ሀ ትንብተይ የሩሳላመን ደእያ ሀላቃባነ እስራኤለ አሳባ ኦዴስ።’ ነ ሀንያባይ ኤንታዉ ማላ ግደይሳ ኦዳ፤ ኤንቲ ድኤትድ ሀራ ቢታ ባና። ኤንታ ግዶን ደእያ ሀላቃይ ጎዳ ሉክድ ባ ሚሽያ ባ ሀሸን ቶክድ፥ ለምእሽን ባና፤ ቢታ በኦና መላ ባ ሶምኡዋ ካማና። ታ ግተ እያ ስንን የጋዳ ኦይካና። ታኒ እያ ካልዳወታ ቢታ ባብሎነ ካታማ ኤሀና፤ ሽን እ ሄ ካታማ በኦና ሀይቃና። እያ ዩሾን ደእያ እያ ማደይሳታነ እያ ኦላንቾታ ኡባ ታ ኡባ በሲ ፕስክ ኦና፤ ታ ኤንታ ማሻን የደና።
“ኤንታ ታ ሀራ ቢታታነ ካዎተታ ግዶ ላልያ ዎደ ታ ጎዳ ግደይሳ ኤንቲ ሄ ዎደ ኤራና። ኤንቲ ቢያ ካዎተታ ግዶን ባንታ ቱና ኦሶ ፓፃና መላ ኤንታፈ ጉታ ኦላፐ፥ ኮሻፐነ ሀርገፐ አትዲ አከካናዳ ኦና። ታ ጎዳ ግደይሳ ኤንቲ ሄ ዎደ ኤራና” ያግስ። ጎዳ ቃላይ ታኮ ሀይሳዳ ያግድ ይስ፤ “ነኖ አሳ ናአዉ፥ ነ ካ ዳጋማን ማ፤ ነ ሃ ያሻን ኮኮራሸ ኡያ። ቢታን ደእያ አሳኮ ሀይሳዳ ያጋ። ኡባ ሃርያ ጎዳይ እስራኤለ ቢታን ደእያ የሩሳላመ አሳባ ሀይሳዳ ያጌስ፦ ‘ቢታን ደእያ አሳ ኡባይ ገነ ኦያ ግሾ ኤንታ ቢታይ ካሎ አታና፥ ኤንቲ ባንታ ኡይ ህርጋን ማና፤ ባንታ ሃ ዳጋማን ኡያና። ሀእ አስ ኩምዳ ካታማት ያና፤ ቢታይ ባይሳ ግዳና። ታኒ ጎዳ ግደይሳ ኤንቲ ሄ ዎደ ኤራና’ ” ያጌስ።
ጎዳ ቃላይ ታኮ ሀይሳዳ ያግድ ይስ፤ “ነኖ አሳ ናአዉ፥ ህንተ እስራኤለ ቢታን፥ ዎደ አዱቅስ ቆንጨ ኡባይ ሀዳ ግድስ አስ ያግድ ሌምሰይ እ አይቤ? ኡባ ሃርያ ጎዳይ ሀይሳዳ ያጌስ፤ ‘ታኒ ሀ ሌምሶይ ናምአን ኦደቶና መላ ኦና፤ ኤንቲ ዛሪድ፥ እስራኤለ ቢታን ሌምሶኮና’ ያጌስ። ‘ጋላሳይ ማታትስ፤ ቆንጨ ኡባይ ፖለታና ሀኔስ’ ያጋ። ህዛፐ ጉየ እስራኤለ አሳ ግዶን ዎርዶ ቆንጨነ ሙሩኖ ዴና። ታ ጎዳይ ኦዳናዉ ኮይዳባ ኦዳና፤ ሄስካ ጋምኦና ፖለታና። ህንተኖ፥ ጌላቶ፥ ታ ኦድያባ ኡባ ህንተ ላይን ፖላና” ያጌስ ኡባ ሃርያ ጎዳይ።
ቃስካ ጎዳ ቃላይ ታኮ ሀይሳዳ ያግድ ይስ። “ነኖ አሳ ናአዉ፥ እስራኤለ አሳይ፥ ‘እ በእዳ ቆንጨይነ እ ኦድያ ትንብተይ ዳሮ ላይፈ ጉየ ሀናናባ’ ያግድ ኦዶሶና። ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ ‘ታ ኦድያ ቃላይ ፖለታናፐ አትሽን፥ እሶይካ ጋምኤና’ ” ያጌስ ኡባ ሃርያ ጎዳይ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.