ጌሻ ማፃፋ
ከሳ 23
ሱረ ፕርዳ
“ዎርዶ ኦዳ ጋሰፋ፤ ዎርዶ ማርካታዳ ባላ አስ ማዶፋ። ኢታባ ኦናዉ ዳሮ አሳ ካሎፋ። ፕርዳ ዎብሳናዉ ዳሮ አሳራ እስፋዳ ማርካቶፋ። ማንቆይ ፕርዳስ ሺቅያ ዎደ እያ ማንቆተ በአዳ ማዶፋ።
“ነ ሞርክያ ቦራይ ዎይኮ ሀረይ ይን ደምኮ፥ ዛራዳ እያዉ ኤፋ። ነና እፅያ ኡራ ሀረይ ጫናራ ኩንድን በአዳ፥ ኡራ ማዳዳ ደንና አጋዳ አፋ።1
“ፕርዳ ዳባባን ማንቆይ ፕርዳስ ሺቅያ ዎደ እያ ፕርዳ ዎቢሶፓ። ኦናካ ማልተን ሞቶፓ፤ ፅሉዋ ዎፓ። ሄሳ መላባ ኦዳይሳ ታኒ ፕርዶና አግከ። ዎፈ ኤኮፋ፤ ዎፈይ ሱረ ፄልያ አሳ አይፈ ቆቅሴስ፥ ፅሎታ ፕርዳ ምርቄስ።
“በታንቹዋ ናቆፋ። ህንተ ግብፀ ቢታን በተ አስ ግድድ ደእዳ ግሾ፥ አሳ ጋደ አስ ግዶይ አይ መላ ስኤትያኮ ኤሬታ።
ላፑን ላይነ ላፑን ጋላስ
“ኔኒ ነ ጋድያ ኡሱፑን ላይ ጎያዳ ማ። ላፑን ላይን ጋድያ ጎዮና ሻቻ፤ እያን ዶልድ ካፅያባ ሺሾፓ። ነ አሳ ግዶን ደእያ ማንቆት እያፐ ሞ፤ ቃስ ኤንታፈ አትዳይሳ ዶአት ሞ። ነ ዎይነ ጋድያነ ነ ሻማሆ ጋድያ ሄሳዳ ኦ።
“ኔኒ ኡሱፑን ጋላስ ኦሶ ኦ። ነ ቦራይነ ነ ሀረይ ሸምፓና መላነ ነ ሶን የለትዳ አይለይነ በተ አስ ሸምፓና መላ ላፑን ጋላሳን ኦሶ ኦፋ። ታኒ ህንተዉ ኦድዳባ ኡባ ምንድ ኦተ። ሀራ ፆሳታ ሱን ፄግድ ዎሶፍተ፤ ኤንታ ሱን ደንፍተ።
ግታ ባኣለ ጋላሳታ
(ከሳ 34:18-26፤ ዛረ 16:1-17)
“ታና ቦንቻናዉ ላይን ሄ ባኣለ ጋላሳት ህንተዉ ደኦ። ህንተ ግብፀፈ ከይዳ አቢባ ጌተትያ አጌናን፥ ታኒ ህንተና ኪትዳይሳዳ ኡይ ባኣለ ቦንችተ። ላፑን ጋላስ እርሾ የግድ ኡክዳ ኡይ ሞፕተ። ታና ጎይናናዉ ይሸ መላ ኩሸ ዮፕተ።
“ቃስ ህንተ፥ ህንተ ጋደን ዘርን፥ ኮይሮ ጋክዳ ካ ጫክያ ዎደ ካ ጫኮ ባኣለ ቦንችተ።
“ላይ ዉርሰን፥ ዎይንያነ ሄሳ መላ ምታ አይፍያ ህንተ ጋደፐ ማፅያ ዎደ ሻቃራ ባኣለ ቦንችተ። ላይን ላይን ቦንቸትያ ሀ ሄ ባለታን አደ ኡባይ ታና፥ ህንተ ጎዳ ጎይናናዉ ዮ።
“ኔኒ ታዉ መሄ ያርሽያ ዎደ እርሾ የግድ ኡክዳ ኡይራ ታዉ ያርሾፋ። ባኣለ ቦንችያ ጋላስ ያርሸትዳ ሞዋፈ ዎንታስ አይብካ አቶፎ። ህንተ ጋደን ባይራ ካፅዳ ካ ኡባፈ ሎኡዋ ጎዳ፥ ህንተ ፆሳ ሶ ኤህተ። ዴሻ ማር ዎይኮ ዶርሳ ማር እያ አየ ማን ዶይሶፓ።
ኡፋይሳ ቃላታነ ዎጋታ
“ነ ኦግያን ነና ናጋና ማላነ ታኒ ነዉ ጊግስዳ በሳ ነና ኤፋና መላ ታኒ ኪታንቾ ነ ስንን ኪታና። እ ኦድያባ ስአዳ እያዉ ኪተታ፤ እያ ቦላ ማካሎፋ። ታ እያዉ ማታ እምዳ ግሾ፥ ህንተ ናጋራ ኦያባ ግድኮ፥ ህንተ ናጋራ ማረና። ህንተ እያዉ ኪተትኮነ ታ ኪታ ኡባ ፖልኮ፥ ህንተ ሞርከታ ኡባ ሞርካና፤ ህንተራ ኤቀተይሳታ ታኒ ኦላና። ታ ኪታንቾይ ህንተ ስንን ብድ፥ ህንተና አሞረታ፥ ህተታ፥ ፓርዘታ፥ ካናነታ፥ ህወታነ ያቡሰታ ቢታ ኤሀና። ታኒ ኤንታ ይሳና። ኤንታ ፆሳታስ ዝጎፍተ ዎይኮ ጎይኖፍተ፥ ዎይኮ ኤንታ አማኖ ዎጋ ካሎፍተ። ኤንታ ፆሳታ ይስተ፥ ኤንታ ኤቃ ሹቻታ መንረተ። ጎዳ፥ ህንተ ፆሳ ታና፥ ጎይንተ። ሄሳዳ ህንተ ኦኮ፥ ታኒ ህንተ ካነ ህንተ ሃ አንጃና፤ ሀርግያካ ህንተ ግዶፈ ድጋና። ህንተ ቢታን ማጫሳይ ቦሸተና፤ ማይነና። ታኒ ህንተ ላይ አዱሳና።
“ታኒ ነ ሞርከታ ቦላ ታ ያሻ የዳና። ህንተራ ኤቀትያ ካዎተታ ኡባ ዳጋንና። ህንተ ሞርከት ኡባይ ህንተዉ ዞኮ ዛሪድ ባቃታና መላ ኦና። ታኒ ህንተ ሞርከታ ቦላ ካዠ የዳዳ ህወታ፥ ካናነታነ ህተታ ህንተ ስንፈ ጎዳ ከሳና። ሽን ቢታይ መላ አቶናዳነ ባዞ ዶእ ህንተና ዋይሶናዳ እስ ላይን ኤንታ ጎድከ። ሽን ህንተ ታይቦን ዳርድ፥ ምንድ፥ ሄ ቢታ ላታና ጋካናዉ ኤንታ ጉራ ጉራ ጎዳ ከሳና። ታኒ ህንተ ዛዋ ዞኦ አባፈ ፍልስፄመ አባ፥ መላ ቢታፈ ብድ ኤፍራፂሳ ሻፋ ጋካናዉ ዳልግሳና። ሄ ቢታን ደእያ ኡባ ታኒ ህንተ ኩሸን አዳ እማና፤ ህንተካ ኤንታ ጎድድ ከሳና። ኤንታራ ዎይኮ ኤንታ ፆሳታራ ጫቆ ኦፍተ። ኤንታ ህንተ ቢታን ዎፍተ። ሀንኮደ ኤንቲ ህንተና ታ ቦላ ናጋራ ኦስሳና። ኤንታ ፆሳታ ህንተ ጎይንኮ ህንተዉ ፅሄ ግዳና” ያግስ።
Source notes (1)
- Cross-reference ዛረ 22:1-4.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.