ጌሻ ማፃፋ
ኤራታ 2
ባና ዶሶይ ሀዳ
ታኒ ታኮ፥ “ሃያ፥ ታ ነና ኡፋይስ አይበኮ ኤርሳናዉ ሎኦባ በሳና” ያጋስ፤ ሽን ሄስካ ሀዳ። ሚች ኤያተ ግደይሳ፥ ቃስ ሚኮይነ ኡፋይስ አይኮካ ጎኦናይሳ አኬካስ። ሀእካ ታ ዎዛናይ ጭንጫተን ታና ካለሽን፥ ታና ዎይነ ኡሻን ኡፋይሳናዉ፥ ኤያካ ግዳናዉ ፓጫስ። አስ ባ ቃን ዎደን ሳሎፐ ጋርሳን ደእያባ ቦላ አይ ኦኮ ጎአነኮ ኤራናዉ ኮያስ።
እስ ግታባ ኦስ፤ ታ ዳና ኬታ ኬፃስ፤ ዎይነ ቶካስ። ዱማ ዱማ አታክልትያነ አይፈ አይፍያ ምታ ቶካስ፤ አስ ሸምፕያ በሳ ጊግሳስ። ሄ በሳን ዱማ ዱማ አይፈ አይፍያ ምታ ቶካስ። ሄ ምታ ኡሻናዉ፥ ሃ ዳጋያ በሲ ዜራዳ ጊግሳስ። አደነ ማጫ አይለታ ሻማስ፤ ቃስ ታ ሶን የለትዳ ሀራ አይለትካ ታዉ ደኦሶና። ታፐ ካሰ የሩሳላመን ደእዳ አሳፐ አያ መሄ፥ ዴሸነ ዶርሰ ሃራስ። ታ ሃርያ ዱማ ዱማ ቢታታፐነ ካዎታፐ ቦንቸትዳ ቡቁራ ኤህሳዳ፥ ዳሮ ዎርቃነ ብራ ታዉ ዳጋያስ። ቃስ፥ ታና ሳቢድ የፅያ አደነ ማጫ ሺሻስ፤ ሄሳ ቦላ፥ አሳስ ኡፋይስ እምያ ዳሮ ማጫሳታ ሺሻስ።
ታኒ ካሰ የሩሳላመን ደእዳ ኦደፈካ አዳ ግታ አስ ግዳስ። ታ ጭንጫተይካ ታራ ዉርሰ ጋካናዉ ደእስ። ታ አይፈይ ፄልዳባነ ታ ዎዛናይ አሞትዳባ ኡባ ደማስ፤ ታ አሳተይ ኮይያ ኡፋይስ ኡባ ድጋብከ። ታኒ ኦዳ ኦሶ ኡባን ኡፋይታስ፤ ታ ዳቡራ ዎይ ሄሳ። ግዶሽን፥ ሄሳ ኡባ ኦ ስማዳ ታኒ አኬክያ ዎደ፥ ዳሮ ታኒ እያዉ ዳቡርዳ ኡባይ ሀዳ ግደይሳ በአስ። ሳሎፐ ጋርሳን ጎእያባይ አይኮይ ባዋ፤ ኡባይ ጫርኮ ኦይካናዉ የደያ መላ።
ጭንጫተነ ኤያተ ሀዳ
ሄሳፈ ጉየ፥ ታኒ ጭንጫተ፥ ኤያተነ ጎሻተ አይበኮ ፓጫዳ ኤራናዉ ቆፋ ዶማስ። አዉደ ግድንካ ካዎይ ኦናዉ ዳንዳኤይ እያፐ ካሰ ካዎትዳ ካዎይ ኦዳይሳፈ ሀራባይ አይብ ደኢ? ፖኦይ ማፐ፥ ጭንጫተ ኤያተፈ ሎኦ ግደይሳ ታኒ በአስ። ጭንጫ አሳ አይፈት እያ ሁጵያ ግዶን ደኦሶና፤ ሽን ኤያት ማን ሄመቶሶና። ግዶሽን፥ ኤንታ ናምኣ ዉርሰይ እስኖ ግደይሳ አኬካስ።
ታኒ ታኮ፥ “ኤያ ጋከያ ቃዳይ ታናካ ጋኬስ፤ ያትን፥ ታኒ ጭንጫ ግደይስ ታና አይ ማዲ?” ያጋዳ ቆፓስ። ቃስ ታኒ ታ ዎዛናን፥ “ሀይስካ ሀዳ” ያጋስ። ኤያ ግድን ጭንጫ፥ ሀይቆፐ ጉየ፥ እያ ሀሳየይ ባዋ፤ ስንፈ ያ ላይን ኑኒ ኡባይ ዶገትድ አታና። ኤያይ ሀይቀይሳዳ፥ ጭንጫይካ ሀይቄስ።
ኦሶን ዳቡር ሀዳ
መቶፐ አትሽን፥ ጎእያባይ ባይና ግሾ፥ ሀ ደኦይ ታና ሻትስ። ሄስካ ሀዳ፤ ጫርኮ ኦይካናዉ የደያ መላ። ሳሎፐ ጋርሳን ታኒ ዳሮ ዳቡራዳ ደምዳ ታ ሻሉዋ ኡባ ታፐ ጉየራ ያ ኡራስ አጋዳ ብያ ግሾ፥ ታኒ ዳቡርዳ ኡባይ ታና ሻትስ። ታፐ ጉየራ ያ አደይ ጭንጨኮ ኤየኮ ኦን ኤሪ? ሽን እ ኦና ግድንካ፥ ታኒ ዳሮ ዳቡርዳባነ ታ ጭንጫተን ደምዳባ ኡባ ባዉ ኤክድ፥ ጎዳ ግዳና፤ ሄስካ ሀዳ።
ሄሳ ግሾ፥ ሳሎፐ ጋርሳን ታ ዳቡርዳባ ቦላ ታ ዎዛናይ ኡፋይስ ቃንፅስ። አስ ባ ደእዳ ላይን ባዉ ደእዳ ጭንጫተን፥ ኤራንነ ሂላን ዳቡርድ ደምዳባ ኡባ አይኮካ ዳቡሮናይሳስ የግድ ቤስ። ሄስካ ሀዳነ ግታ ቆሆ። ያትን፥ ሳሎፐ ጋርሳን አስ ዳሮ ዳቡርድ ኦዳባ ኡባፈ አይ ጎአ ደሚ? እ ባ ደኦ ላይን ዳቡርያ ዳቡር ኡባይ አዛኖፐነ ሙደፈ አትሽን፥ ሀር አይብካ እያዉ ጉጀና፤ ሀር አቶሽን ቃማካ እያ ሁጰይ ቆፋፐ ሸምፐና፤ ሄ ኡባይካ ሀዳ።
ህዛ አሳስ ጎአ ግድያባይ አይበ ጊኮ፥ አስ ምድ ኡይድ ባ ዳቡራን ኡፋይታናይሳ። ሄ ኡፋይሳይ ቃስ ፆሳ ኩሽያፐ እመትዳባ ግደይሳ ታኒ አኬካስ።1 እያ ሸነ ግዶና፥ ምን ኡይን አሳስ ኡፋይስ አዉን ደኢ? ፆሳ ኡፋይስያ ኡራስ ፆሳይ ጭንጫተ፥ ኤራተነ ኡፋይስ እሜስ፤ ናጋራንቹዋስ እ ዳቡርድ ሺሻና መላ፥ ዳቡራ እሜስ። ሽን እ ሺሽዳይሳ ፆሳይ ኤክድ፥ ባዉ ያይያ ሀራስ እሜስ። ሄሳ ግሾ፥ ሀ ኡባይ ሀዳነ ጫርኮ ኦይካናዉ የደ መላ።2
Source notes (2)
- Cross-reference ኤራ 3:13፤ 5:18፤ 9:7፤ ሉቃ 12:19፤ 1 ቆሮ 15:32.
- Cross-reference እዮ 32:8፤ ሌም 2:6.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.