ኤራታ 10

1ሀይቅዳ ኡዱንፀት ሳውያ ሽቱዋ ፅንቅሶሶና፤ ሄሳዳካ፥ ጉ ኤያተ ጭንጫተነ ግታ ቦንቹዋ ኢሴስ።

2ጭንጫ አሳ ዎዛናይ እያ ኡሻች ካለስ፤ ሽን ኤያ አሳ ዎዛን ሀድርስ ካለስ። 3ኤያ አስ ኦገ ሄመትያ ዎደ እያዉ አኬክ ባዋ፤ እ ኤያ ግደይሳ አስ ኡባይ ኤሬስ።

4ነ ሀላቃይ ነ ቦላ ሀንቀትኮ ነ በሳ የዶፋ፤ ስእ ግድ ዳንዳኦይ ግታ ናጋራ አቶ ጊሴስ።

5ሳሎፐ ጋርሳን ታኒ በእዳ ሀራ ኢታባይ ደኤስ። ሄስካ ደርያ ሃረይሳት ኦያ ናቁዋ። 6ኤያት ዳሮ ቃ ሹማተ ኦይክድ ደእያ ዎደ ዱረት ዝቃ በሳን ኡትዶሶና። 7ታኒ አይለት ሃረይሳታዳ ፓራ ቶግድ ብሽን ቃስ ሃረይሳት አይለታዳ ቶሆን ሄመትሽን በአስ።

8ኦላ ቦክያ አስ ሄ ኦላን ኩንዴስ፤ ግምበ ድርስ ላልያ ኡራ ሾሽ ዱኬስ። 9ሹቹ ደንያ አስ ሄ ሹቻን፥ ም ቀርያ አስ ሄ ምን ደሸቴስ።

10ዱንእዳ ካልታ ሌፎና ቀርኮ ዳሮ ዎልቃ ዉርሴስ፤ ሽን ጭንጫተን ኦያ ኦሱዋስ አይፈይ ደኤስ።

11ሾሽ ዱክ አግን ሾሹ ዶቅያ ለ ዎይስ ሄ ኡራ አይኮካ ማደና።

12ጭንጫ አሳ ኦድ እያዉ ቦንቾ እምሴስ፤ ሽን ኤያይ ባ ዶናፐ ከይዳ ቃላን ባዉ መቶን ገሌስ።

13ኤያይ ባ ሃሳያ ኤያ ቃላን ዶምድ፥ ኢታተንነ ጎሻተን ፖሌስ።

14ኤያ አስ ዳሮባ ኦደቴስ። ግዶሽን፥ ስንፈ ሀናናዉ ደእያባ ኦንካ ኤረና። አስ ሀይቅ አግን፥ ሀንያባ እያዉ ኦዳናዉ ዳንዳኤይ ባዋ።

15ኤያ አስ ባ ኦሶን ዳቡሬስ፤ እ ባ ሶ ብያ ኦግያ ኤረና።

16ናአ ግድዳ ካዎይነ ዎንታ ጉራ ግብራ ምያ ሀላቃት ደእያ ቢተ ነና አየ! 17ቦንቸትዳ ካዎይነ ማታናዉ ግዶናሽን ዎልቃነ ምኖተ ደማናዉ ማራን ምያነ ኡያ ሀላቃት ደእያ ቢትያ አንጀትዳሮ።

18አደይ አዛላ ግድኮ እያ ካራይ ዎዴስ፤ እያ ኩሸይ ኦናባ ግድኮ፥ እያ ኬይ ፆኬስ።

19ካ ሙሳንነ ዎይነ ኡሻን ኡፋይስ በንቴስ፤ ሽን ሚሸይ ኡባባ ሻሜስ።

20ስእያ አስ ባዋ ጋዳ ነ ዎዛናን ካዎ ጫዮፓ፤ ዎይኮ ነ ዝንእያ ክፍልያን ዱረ ኡራ ባዶፋ። ነ ግዳይሳ ሳሎ ካፎይ ብድ ኤንታዉ ኦዳናዉ ዳንዳኤስ።