ዛረ 34

ሙሰ ሀይቁዋ

1ሙሰይ ሞአበ ደምባፈ ደንድድ፥ ናቦ ዙማ ሁጵያ፥ ቃስ እያርኮፈ ዶሎሀ ባጋራ ደእያ ፕስጋ ዙማ ሁጵያ ጋክስ። ያን ጎዳይ ዳነ ጋካናዉ ደእያ ጋላዳ ቢታ፥ 2ንፍታለመ ቢታ ኡባ፥ ኤፍሬመነ ምናሰ ቢታ፥ ዉሎሀ ባጋራ ብድ መደትራነ አባ ጋካናዉ ደእያ ይሁዳ ቢታነ 3ዱገሀ ባጋራ ዞኣረፐ ደንድድ፥ ዛምብ ደእያ እያርኮ ካታማ፥ ዛንጋራን ደእያ ደምባ ኡባ በስስ። 4ጎዳይ ሙሰኮ፥ “ታኒ ህንተ ሼሻስ እማና ጋዳ አብራሃመስ፥ ይሳቃስነ ያይቆባስ፥ ጫቅዳ ቢታይ ሀይሳ። ሀእ ኔኒ ነ አይፈን በአና መላ ኦስ፥ ሽን ኔኒ ያ ፕናካ” ያግስ።

5ጎዳ አይለይ፥ ሙሰይ፥ ጎዳይ ግዳይሳዳ፥ ያን ሞአበ ቢታን ሀይቅስ። 6ጎዳይ ቤት-ፓኦራ ካታማፐ ስን ባጋን ሞአበ ዛንጋራን እያ ሞግስ። ሽን ሀች ጋካናዉ እ ሞገትዳ ዱፉዋ ኤርያ አስ ባዋ። 7ሙሰይ ሀይቅያ ዎደ እያዉ ላይ ፄታነ ላታማ፤ ሽን እያ አይፈይ እፅቤና፤ እያ ዎልቃይ ዳቡርቤና። 8እስራኤለ አሳይ ሞአበ ደንባን ሀስታሙ ጋላስ ሙሰስ ዬክዶሶና። ሄሳፈ ጉየ፥ ባለይ ደንድን፥ ዬሆ ዎደይ ዉርስ።

9ሙሰይ፥ ባ በሳን ኦና መላ፥ እያ ቦላ ባ ኩሽያ ዎዳ ግሾ፥ ናወ ናአይ እያሱይ ጭንጫተ አያናን ኩምስ። እስራኤለ አሳይ እያሱስ ኪተትዶሶና፤ ጎዳይ ሙሰ ባጋራ እምዳ ኪታ ናግዶሶና።

10ጎዳ ሶምኦን ኦድስዳ፥ ሙሰ መላ ናበይ፥ እስራኤለ ቢታን ደንድቤና። 11ጎዳይ ሙሰ ግብፀ ካዋኮ፥ እያራ ኦያ ሞርናታኮነ ኩመ አሳኮ የድድ፥ እያ ባጋራ ማላታታነ ማላልስያባታ ኡባ ኦዳ፥ ሙሰ መላ ሀራ ናበይ ኦንካ ባዋ። 12እስራኤለ ኡባ ስንን ግታ ዎልቃን ማላልስያባ ኦዳ፥ ሙሰ መላ አስ ኦንካ ባዋ።