ጌሻ ማፃፋ
ዳነላ 3
ዎርቃ ምስለነ እቶነ ታማ
ካዎይ ናቡካዳናፆር አዱሳተይ ኡሱፑን ታሙ ዋ፥ ጎምፓይ ኡሱፑን ዋ ግድያ ምስለ ዎርቃፈ መድ፥ ባብሎነ ቢታን ዱራ ደምባን ኤስስ። ሄ ምስልያ አንጅሳናዉ ያና መላ፥ ካዎ ሞርናታ፥ ሹማታ፥ ቢታ አይሰይሳታ፥ ካዋ ዞረይሳታ፥ ሚሸ ኬን ኦይሳታ፥ ፕርዳ ዳይናታ፥ ህገ ኤራንቾታነ አዉራጃ ሹማታ ፄግስ። ሄ ዎደ ካዎ ሞርናት፥ ሹማት፥ ቢታ አይሰይሳት፥ ካዋ ዞረይሳት፥ ሚሸ ኬን ኦይሳት፥ ፕርዳ ዳይናት፥ ህገ ኤራንቾትነ አዉራጃ ሹማት ሺቅድ፥ ካዎይ ናቡካዳናፆር ኤስዳ ምስልያ ስንን ኤቅዶሶና። ሄ ዎደ አዋጅያ አደይ ባ ቃላ ቁ ኦድ፥ ሀይሳዳ ያግስ፦ “ህንተኖ፥ አሳዉ፥ ካዎተቶ፥ ዱማ ዱማ ዶና ኦደተይሳቶ፥ ኡባይ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ዎደ፥ ካዎይ ናቡካዳናፆር ኤስዳ ዎርቃ ምስልያስ ጉፋንድ ጎይንተ። ምስልያ ስንን ጉፋንድ ጎይኖና ኦንካ፥ ሄ ሳትያን ኤፅያ እቶነ ታማን ሆለታና” ያግስ።
ሄሳ ግሾ፥ አሳይ፥ ካዎተትነ ዱማ ዱማ ዶና ኦደትያ ኡባይ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእዳ ዎደ ቢታን ጉፋንድ፥ ካዎይ ናቡካዳናፆር ኤስዳ ዎርቃ ምስልያስ ጎይንዶሶና።
ሄ ዎደ ባብሎነ አሳታፐ እሶት እሶት አይሁደታ ሞትዶሶና። ኤንቲ ካዋ ናቡካዳናፆራኮ ሀይሳዳ ያግዶሶና፤ “ካዋዉ፥ መርናዉ ካዎታ። ካዋዉ፥ ነ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ኦንካ ጉፋንድ፥ ዎርቃ ምስልያስ ጎይናና መላ፥ ቢታን ጉፋንድ ጎይኖና አስ ደእኮ፥ እቶነ ታማን ሆለታና መላ አዋጆ ከሳዳሳ። ሽን ካዋዉ፥ ኔኒ ባብሎነ ቢታን ሹምዳ አይሁደት፥ ስድራቅ፥ ምሳቅነ አብዳናጎይ ነ ኪታ እፅዶሶና። ነ ፆሳታስ ኦኮና፤ ቃስ ነ ኤስዳ ዎርቃ ምስልያካ ጎይኖኮና” ያግዶሶና። ናቡካዳናፆር ሄሳ ስእዳ ዎደ፥ ይሎ ኤፅድ፥ ስድራቃ፥ ምሳቃነ አብዳናጎ ኤሀና መላ ኪትስ፤ ኤንታ ካዋ ስን ኤህዶሶና። ናቡካዳናፆር ኤንታ ሀይሳዳ ያግስ፦ “ስድራቃ፥ ምሳቃ፥ አብዳናጎ፥ ህንተ ታ ፆሳታስ ኦቦናይስነ ታ ኤስዳ ዎርቃ ምስልያ ጎይንቦናይስ ቱሜ? ሀእ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ዎደ ታ ኤስዳ ምስልያስ ጉፋንድ ጎይንኮ ሎኦ። ሽን ህንተ ጎይኖና እፅኮ፥ ኤለስድ ኤፅያ እቶነ ታማን ሆለታና። አይ ፆስካ ህንተና ታ ኩሸፐ አሸና” ያግስ።
ስድራቅ፥ ምሳቅነ አብዳናጎይ ዛሪድ፥ “ካዋዉ፥ ናቡካዳናፆራ፥ ሀይሳስ ኑ ነዉ ዛሮ እማናዉ በሰና። ካዋዉ፥ ኑ ኤፅያ እቶነ ታማን ሆለትያኮካ፥ ኑ እያዉ ኦያ ፆሳይ ታማፐ ኑና አሻናዉ ዳንዳኤስ። ቃስ ካዋዉ፥ እ ኑና ነ ኩሸፐ አሻና። ሽን ካዋዉ፥ እ ኑና አሾና እፅኮካ፥ ኑኒ ነ ፆሳታስ ኦናይሳነ ነ ኤስዳ ዎርቃ ምስልያ ጎይናናይሳ ኤራ” ያግዶሶና።
ሄ ዎደ ናቡካዳናፆር ስድራቃ፥ ምሳቃነ አብዳናጎ ቦላ ይሎ ኤፅን፥ እያ ሶምኦይ ላመትስ። ታማይ ካሰ ኤፀይሳፈ ላፑን ኩሸ አድ ኤፃና መላ ኪትስ። ስድራቃ፥ ምሳቃነ አብዳናጎ ቃችድ፥ ኤፅያ እቶነ ታማን ሆላና መላ፥ ባ ኦላንቾታ ግዶፈ ምኖ አሳታ ኪትስ። ኤንቲ ባንታ አፍላራ፥ ሱርያራ፥ ሁጰ ፃራነ ሀራ ማኦ ኡባራ ደእሽን፥ ኤፅያ እቶነ ታማን ሆልዶሶና። ካዋ ኪታይ ዳሮ ኤሶ ግድዳ ግሾነ እቶነ ታማይ ካሰፐ አድ ኤፅያ ግሾ፥ ስድራቃ፥ ምሳቃነ፥ አብዳናጎ ታማን ሆልዳ፥ ምኖ አሳታ ታማ ላጮይ ዎስ። ሀ ሄ ቃሸትዳ አሳት፥ ስድራቅ፥ ምሳቅነ አብዳናጎይ፥ ኤፅያ እቶነ ታማን ዎዶሶና።
ሄሳፈ ጉየ፥ ካዎይ ናቡካዳናፆር ማላለትድ፥ ኤሶን ደንድ ኤቅድ፥ “ኑ ቃችድ ኤፅያ እቶነ ታማን የግዳ አሳት ሄ ግዶኮናዬ?” ያግድ ባና ዞረይሳታ ኦይችስ።
ኤንቲ፥ “ካዋዉ፥ ኤ፥ ቱማ ሄ” ያግድ ዛርዶሶና።
ካዎይ ዛሪድ፥ “ቃሾፐ ብርሸትድ፥ ታማ ግዶን ያነ ሃነ ሄመትያ፥ ታማይ አይኮካ ቦቾና ኦይዱ አሳታ በአይስ፤ ኦይዳንይ ፆሳታ ናአ ዳኔስ” ያግስ።
ናቡካዳናፆር ኤፅያ እቶነ ታማ ማታ ሺቅድ፥ ባ ቃላ ቁ ኦድ፥ “ኡባፈ ቃ ፆሳ ኦሳንቾቶ፥ ስድራቃ፥ ምሳቃ፥ አብዳናጎ፥ ከይድ ሃ ዪተ!” ያግድ ፄግስ። ስድራቅ፥ ምሳቅነ አብዳናጎይ ታማ ግዶፈ ከይዶሶና። ካዉዋፐ ጋርሳራ ቢታ አይሰይሳት፥ ሞርናት፥ ሹማትነ ካዋ ዞረይሳት ኤንታኮ ሺቅዶሶና። ታማይ ኤንታ አሳተ ቦችቦናይሳ፥ ኤንታ ሁጰ ብናናፐ እሶይካ ፁገትቦናይሳ፥ ኤንታ ማኦይካ ሜተትቦናይሳነ ታማ ፔኖይ ኤንታ ቦላ ባይናይሳ በእዶሶና።
ሄሳፈ ጉየ፥ ናቡካዳናፆር ሀይሳዳ ያግስ፦ “ስድራቃ፥ ምሳቃነ አብዳናጎ ፆሳይ ጋላተቶ። እ፥ ባ ኪታንቹዋ ኪትድ፥ ባናን አማነትዳ፥ ባ አይለታ አሽስ። ኤንቲ ካዋ ኪታ እፅድ፥ ባንታ ፆሳፈ አትሽን፥ ሀራ ፆሰ ጎይናናፐ ሀይቃናዉ ዶስዶሶና። ሄሳ ግሾ፥ ሀራ አይ ፆስካ ሀይሳዳ ኦድ አሰ አሾና ግሾ፥ ስድራቃ፥ ምሳቃነ አብዳናጎ ፆሳ ቶችድ ኦደትያ አይ አስካ፥ ዎይኮ አይ ካዎተካ፥ ዎይኮ ዱማ ዱማ ዶናን ኦደትያ አይ ኮቻይካ ቃንፀታና መላ ኤንታ ኬይካ ላለትድ፥ ፕቶ ዶረ ግዳና መላ ታኒ ኪታስ” ያግስ።
ካዎይ ስድራቃ፥ ምሳቃነ አብዳናጎ ባብሎነ ቢታን ቁ ቁ ኦድ ሹምስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.