አሞፀ 8

ቴራ አይፈይ ኩምዳ ዳቾ

1ኡባ ሃርያ ጎዳይ ታና ሀራ ቆንጨ በስስ፤ ሄስካ፥ ቴራ አይፈይ ኩምዳ ዳቾ በስስ። 2እ ታኮ፥ “አሞፀ፥ ኔኒ አይ በአይ?” ያግድ ኦይችስ።

ታኒ፥ “ቴራ አይፈይ ኩምዳ ዳቾ በአይስ” ያጋስ።

ጎዳይ ታኮ፥ “ታ አሳ እስራኤለ ዉርሰይ ጋክስ፤ ህዛፐ ጉየ ታኒ ኤንታ ሴሮና አግከ” ያግስ።

3ኡባ ሃርያ ጎዳይ፥ “ሄ ጋላስ ካዎ ኬን የፅያ የይ ዬሆን ላመታና፤ አሳ አህ ዱማ ዱማ በሳን ዎና፤ ዬሆይ ዋሶይ ባይና ስእ ግድ የገታና” ያጌስ።

4ህንተኖ፥ መቶታንቾታ ኡንኤይሳቶ፥ ቢታን ደእያ ማንቆታ ይሳናዉ ኮየይሳቶ፥ ሀይሳ ስእተ! 5ህንተ፥ “ኑኒ ካ ባይዛናዉ አጌና ፄሮ ባለይ አዉደ አነ! ቃስ ኑኒ ኑ ዛልእያ ዶማናዉ ሳምባት አዉደ አነ! ኑኒ ካ ጉባን ማክድ፥ ዳሮ ሚሸን ባይዛና። ቃስ ዎርዶ ምዛነን አሳ ጭማና። 6ማንቁዋ ብራን፥ መቶታንቹዋ ዋ ጫማን ሻማና፤ ቃስ ሀርቆ ግስተ ሙሩቶ ግስተ ጋተን ባይዛና” ያጌታ።

7ያይቆብ እያ ሱንን ጬቀትያ ጎዳይ፥ ፆሳይ፥ ሀይሳዳ ያግድ ባ ሁጰን ጫቅስ፦ “ታኒ ኤንቲ ኦዳ ኢታ ኦሶ ኡባ ዶግከ። 8ሄሳ ጋሶን ቢታይ ያርኬስ፤ አሳ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎና” ያግስ።

9ኡባ ሃርያ ጎዳይ፥ “ሄ ጋላስ ታኒ አዋ ሴታ ጋላስ ዉልሳና፤ ጋላሳ ቃምሳና። 10ታኒ ህንተ ኡፋይሳ ባልያ አዛኖን፥ ህንተ የ ዬሆን ላማና። ፐፅ እስ ናእ ሀይቅን ዬክያ አሳዳ፥ ህንተ ህንተ ሁጵያ ሜደትድ ካዮ ማኦ ማአናዳ፥ ህንተና ኦና። ሄ ጋላሳ ዉርሰይ ዳሮ ጫሞ ግዳና” ያጌስ።

11ኡባ ሃርያ ጎዳይ፥ “ሄኮ፥ ታኒ ቢታ ኡባ ቦላ ኮሻ የድያ ዎደይ ያና። ሄ ኮሻይ ካ ዎይኮ ሃ ኮሻ ግዶናሽን፥ ስአናዉ ጎዳ ቃላ ዮ ኮሻ ግዳና። 12አሳይ ዶሎሀፐ ዉሎሀ ጋካናዉ፥ ፑደሀፐ ዱገሀ ጋካናዉ ዎፀረታና። ኤንቲ ጎዳ ቃላ ኮያናዉ ያነ ሃነ ዎፃና፥ ሽን ደሞኮና። 13ሄ ጋላስ የገልሳ ጌላኦትነ ዎልቃማ ፓንት ሳሞን ፕቅ ጋና። 14ሳማረ ኤቃታራ ጫቅዳይሳት፥ ‘ዳና ፆሳይ ኤሮ!’ ያገይሳት፥ ‘በርሳበ ፆሳይ ኤሮ’ ያገይሳት ኩንዳና። ኤንቲ ዛር ደንዶኮና” ያጌስ።