አሞፀ 5

እስራኤለይ ስማና መላ ኦይሸትስ

1እስራኤለ አሳዉ፥ ታኒ ህንተዉ ዘሌልያ ዘለልሳ ስእተ!

2“ጌላእያ፥ እስራኤለይ ኩንዳሱ፤

ዛራዳ ደንዱኩ።

እያ ሳአን የገታሱ፤

እዮ ደንያ ኦንካ ባዋ” ያጋስ።

3“እስራኤለ ካታማፐ ሙኩሉ ኦላንቾታ ኦላስ የድኮ፥ ፄቱ ኦላንቾታ ፃላል አታና፤ ካታማፐ ፄቱ ኦላንቾታ ኦላስ የድኮ፥ ታሙ ኦላንቾታ ፃላል አታና” ያጌስ ኡባ ሃርያ ጎዳይ።

4“ታና ኮይተ፤ ህንተ ደኦን ዳና። 5ሽን ጋልጋል ድኤታና፤ ቤተለይ ያና ግሾ፥ ቤተለ ኮዮፕተ፤ ጋልጋላ ገሎፕተ። በርሳበ ፕኖፍተ” ያጌስ ጎዳይ።

6ጎዳ ኮይተ፤ ህንተ ደኦን ዳና። ሄሳ እፅኮ፥ እ ዮሰፋ ኮቻ ታማዳ ፁጋና፤ ቤተለን ደእያ አሳ ታም ማና። ሄ ታማ ቶይሳና አስ ባዋ።

7ህንተኖ፥ ሱረ ፕርዳ ምርቀይሳቶ፥ ፅሎተ ሳአን የገይሳቶ፥ ስእተ።

8ፕልያድሳ ጌተትያ ላፑን ፆልንቶታ ኦዳይ፥

ኦርዮና ጌተትያ ፆልንቶ ኮጫታ መዳይ፥

ማ ፖኦን፥ ጋላሳ ቃማን ላመይ፥

አባን ደእያ ሃታ ሳሎ ፑደ ፄግድ፥

ሳአ ምጨ ቦላ ዱገ ትገይ፥ እያ ሱንይ ጎዳ። 9እ ሚፃታ ላላናዉ ዎልቃማታ ቦላ ጋዶ ኤሄስ።

10ህንተና ፕርዳ ዳባባን ሴረይሳ እፄታ፤ ቱማ ኦደይሳ ካታ። 11ህንተ ማንቆታ የድ፥ ኤንታ ካ ቦንቄታ። ያትድ ሹቻ ኬታ ግምብደታ፤ ሽን ህንተ እያን ደኤከታ። ሎኦ ዎይነ ቶክደታ፤ ሽን ህንተ ሄ ዎይነ ኡሻ ኡየከታ። 12ህንተ ናቆይ አይ መላ ዳሮኮ፥ ህንተ ናጋራይ አይ መላ ግቴኮ ታኒ ኤራይስ። ህንተ ፅሎታ ናቀታ፤ ዎፈ ኤኬታ፤ ቃስ ዳባባን ማንቆታ ፕርዳ ናቀታ። 13ሄሳ ግሾ፥ ዎደይ ኢታ ግድያ ግሾ፥ ሄሳ መላ ዎደን ጭንጫ አስ ስእ ጌስ።

14ሎኦ ዶስተ፤ ኢታ እፅተ፤ ህንተ ደኦን ዳና። ሄሳ ኦኮ፥ ህንተ ገይሳዳ፥ ጎዳይ፥ ኡባፈ ዎልቃማ ፆሳይ ህንተራ ግዳና። 15ኢታባ እፅተ፤ ሎኦባ ዶስተ። ፕርዳ በሳን ሱረ ፕርዳ ፕርድተ። ኦን ኤር ጎዳይ፥ ኡባፈ ዎልቃማ ፆሳይ ዮሰፋ ኮቻፈ አትዳ ጉታስ ቃቶና አገና።

16ሄሳ ግሾ፥ ጎዳይ፥ ኡባፈ ዎልቃማ ፆሳይ፥ “ዳባባ ኡባን ዋሶይ ስኤታና፤ ኦገ ኡባን ዘለልስ ዳራና። ጎሻንቾት ዬሆ፥ ዘሌልድ ዬክያ አሳይ ዘለልሳስ ፄገታና። 17ታኒ ህንተና ሴራናዉ ህንተ ግዶራ አያ ግሾ፥ ዎይነ ጋደ ኡባን ዬሆይ ዳና” ያጌስ።

ጎዳ ጋላሳ

18ህንተኖ፥ ጎዳ ጋላሳይ ያና መላ አሞተይሳቶ፥ ህንተና አየ! ጎዳ ጋላሳ አይስ አሞቴቲ? ሄ ጋላሳይ ፖኦ ግዶናሽን ማ ግዳና። 19ሄ ጋላሳይ አስ ጋሞፈ ባቃትድ አትያ ዎደ ማሄይ ጋከይሳ መላ ቃስ ባ ሶ ገልድ፥ ባ ኩሽያ ጎዳ ቦላ ዘምፕስያ ዎደ ሾሽ ዱክያ አሳ መላ ግዳና። 20ጎዳ ጋላሳይ ማ ግዳናፐ አትሽን፥ ፖኦ ግደና፤ ሄ ጋላሳይ ሳካና ማ ግዳናፐ አትሽን፥ ፖኦይ ባይና ጋላስ ግዳና።

21“ታኒ ህንተ ቦንችያ ባለታ እፃይስነ ሻተታይስ፤ ህንተ ጌሻ ሺቆት ታና ኡፋይሶኮና። 22ህንተ ታዉ ፁሳ ያርሾነ ካ ያርሾ ሺሽያ ዎደ ታኒ ኤክከ። ቃስ ህንተ ታዉ እስፈተ ያርሾስ ኤህያ ዶረትዳ ሞ መሄታ በእከ። 23ህንተ ማዝሙረ ጫንጨ ታ ማታፐ ሃስተ፤ ህንተ ዲፅያ ዲ ስእከ። 24ሽን ሱረ ፕርድ ፑልቶ ሃዳ፥ ፅሎተ መሎና ሻፋ ሃዳ ጎጎ።

25“ህንተኖ፥ እስራኤለ አሳዉ፥ ታኒ ህንተና መላ ቢታን ኦይታሙ ላይ ካለያ ዎደ፥ ታዉ ያርሾ ሺሽደቲ? ዎይኮ እሞታ እምደቲ? 26ሄ ዎደ ህንተ፥ ህንተ ኩሸን መዳ፥ ‘ካዋ ሳኩታ’ ጌተትያ ኤቃነ ‘ከዋና’ ጌተትያ ፆልንቶ ኤቃ ፆሳታ ቶክደታ። 27ሄሳ ግሾ፥ ታኒ ህንተና ድእሳዳ ዳማስቆ ካታማፐ አዳ ሃሆ በሲ የዳና” ያጌስ እያ ሱንይ፥ ኡባፈ ዎልቃማ ፆሳ ጌተትያ ጎዳይ።