2 ታሰሎንቀ 2

ጌላ ኡራ

1ኑ እሻቶ፥ ኑ ጎዳ የሱስ ክርስቶሳ ዩሳባነ ኑ እያራ ጋሄታናዉ ሺቃናባስ ኑ ህንተና ዎሶስ።1 2ትንብተን ዎይኮ ሀራ አሳፐ ስእዳ ቃላን ዎይኮ ኑፐ ኤክዳ ኪታዳ ኦድ፥ “ጎዳ ጋላሳይ ጋክስ” ግድ ህንተ ዎዛናይ ዳጋሞፎነ ዋባቆፖ። 3ህንተና ኦንካ አይ ኦገንካ ባለፎ። ካሰትድ ጌላተይ ቆንጮናነ ዮይ በሲያ ጌላ ኡራይ ዮና ደእሽን፥ ጎዳ ጋላሳይ ጋከና። 4አስ ጎይንያባነ ፆሳያባ ኡባ እ እፃናነ ባና ቁ ኦና። ሀር አቶሽን፥ ፆሳ ኬ ገል ኡትድ፥ “ታኒ ፆሰ” ጋና።2

5ታኒ ህንተራ ደአሸ ህንተዉ ኦድዳይሳ አኬከከቲ? 6እ ባ ጋላሳን ያናፐ አትሽን፥ ሀእ ያናይሳ አይብ እያ ተቅያኮ ህንተ ኤሬታ።

7አሳስ ቆንጭቦና ጌላተ ፁራ ዎልቃይ ሀእካ ኦስ፥ ሽን ሀእ እያ ተቀይስ ደኤስ። እያ ተቀይስ ኦገፐ ክቻና ጋካናዉ እ ቆንጨና። 8ሄሳፈ ጉየ፥ ጌላ ኡራይ ቆንጫና፥ ሽን ጎዳ የሱሲ ባ ዶናፐ ከይያ ሸምፑዋን፥ ባ ቦንቾ ዩሳን እያ ዎና።3 9ጌላ ኡራይ፥ ፃላሄ ዎልቃን ይድ ዎርዶ ማላታታነ ማላልስያባታ ኦና።4 10ሄሳዳካ፥ ዮስ ደእያ አሳታ ዱማ ዱማ ጭምያ ኢታ ኦሶን ባለና። ኤንቲ ይዳይ አሽያ ቱማ ዶስድ ኤኮና እፅዳ ግሾሳ። 11ሄሳ ግሾ፥ ኤንቲ ዎርዶ ግድያባ አማናና መላ ፆሳይ ዎልቃማ ባለሶ ኤንታ ቦላ የዳና። 12ሄስካ፥ ቱማ አማኖና አሳት፥ ናጋራ ኦሶን ኡፋይተይሳት ኡባይ ፕርደታና መላሳ።

አማንያ አስ ግዳ

13ጎዳይ ዶስያ ኑ እሻቶ፥ ኑኒ ፆሳ ህንተ ግሾ፥ ኡባ ዎደ ጋላታናዉ በሴስ። ህንተ አታና መላ ፆሳይ ጌሻ አያና ዎልቃን ህንተና ጌሽዳይሳነ ህንተካ ቱማ አማንዳይሳን እ ህንተና ባይራዳ ዶርስ። 14ፆሳይ፥ ኑ ህንተዉ ኦድዳ ዎንገላ ባጋራ ህንተና ፄግዳይ፥ ህንተ ኑ ጎዳ የሱስ ክርስቶሳራ እስፈ ቦንቸታናሳ። 15ህዛ፥ ኑ እሻቶ፥ ምንድ ኤቅተ። ኑኒ ህንተና ኑ ዶናን ግድን ዎይኮ ዳብዳብያን ግድን ታማርስዳ ትምርትያ ኦይክተ።

16-17ፆሳይ ኑ አዋይ ኑና ዶሴስ። እ ኑስ ኬሀ፤ እ መርና ምንነ ሎኦ ኡፋይሳ ኑስ እሚስ። ህንተ ኡባ ዎደ ሎኦባ ኦናዉነ ኦደታናዉ ምንና መላነ ማዳና መላ ኑ ጎዳ የሱስ ክርስቶሳነ ፆሳ ኑ አዋ ዎሶስ።