ጌሻ ማፃፋ
2 ሳሜላ 2
ዳዊቲ ይሁዳ ቦላ ካዎትስ
ሄሳፈ ጉየ፥ ዳዊቲ፥ “ይሁዳ ካታማታፐ እሱዋ ቦ?” ያግድ ጎዳ ኦይችስ።
ጎዳይ፥ “ኤ፥ ባ” ያግስ።
ዳዊቲ፥ “አዉ ቦ” ያግድ ኦይችስ።
ጎዳይ፥ “ከብሮና ባ” ያግድ ዛርስ።
ዳዊቲ ባ ናምኡ ማቸታ፥ እዝራኤለ አክናሆማነ ካሰ ናባላ ማችዉ ቃርመሎሳ አብግያ ኤክድ ከብሮና ካታማ ብስ። ዳዊቲ ባራ ደእያ አሳታነ ኤንታ ሶ አሳ ኡባ ኤህን፥ ከብሮናንነ እያ ሄራን ደእያ ካታማታን ደእዶሶና። ይሁዳ አሳት ከብሮና ካታማ ይድ፥ ዳዊታ ትይድ ይሁዳ ቦላ ካዎዶሶና።
ዳዊቲ ያበሳ ጋላዳ አሳይ ሳኦላ ሞግዳይሳ ስእዳ ዎደ፥ እ አሰ ኪትድ፥ “ህንተ ህንተ ጎዳ ሳኦላ ሞግዳ ግሾ ሄ ኬሀተስ ጎዳይ ህንተና አንጆ። ጎዳይ ሲቁዋነ ቱማተ ህንተዉ ቆንጭሶ፤ ታንካ ሀ ኬሀተ ግሾ ህንተዉ ሎኦ ኩሸ ዛራና። ህዛ ምንተ፤ ፃልተ፤ ህንተ ጎዳይ ሳኦል ሀይቅስ። ይሁዳ አሳይ ታና ትይድ፥ ባንታ ቦላ ካዎዶሶና” ያግስ።
ናምኡ ኬታ ግዶን ደእያ ኦላ
ሳኦላ ቶራ ሞጮናይ ኔራ ናአይ አበኔር ሳኦላ ናኣ እያቡስተ ኤክድ፥ ማህናይማ ጌተትያ በሳ ኤፍስ። እያ ጋላዳን፥ አሴራን፥ እዝራኤላን፥ ኤፍሬማን፥ ብንያመንነ እስራኤለ ቢታ ኡባን ካዎስ። ሳኦላ ናአይ፥ እያቡስተይ እስራኤለ ቦላ ካዎትያ ዎደ እያዉ ኦይታሙ ላይ፤ እ ናምኡ ላይ ካዎትስ። ግዶሽን፥ ይሁዳ አሳይ ዳዊታ ካልዶሶና። ዳዊቲ ከብሮናን ይሁዳ ቦላ ላፑን ላይነ ባጋ ካዎትስ።
ኔራ ናአይ አበኔርነ ሳኦላ ናአይ እያቡስተ አሳይ ማህናይማፐ ጋባኦና ብዶሶና። ፃሩያ ናአይ እዮኣብነ ዳዊታ አሳይ ጋባኦና ኦላ ሃ ማታን ኤንታራ ጋሄትዶሶና። እስ ጩጋይ ኦላ ሃፈ ሄፍንን ኡትን፥ እስ ጩጋይ ሀፍንን ኡትስ። አበኔር እዮኣባኮ፥ “አነ ህንተፈነ ኑፐ ፓንት ደንድድ፥ ኑ ስንን ኦለቶ” ያግስ።
እዮኣብ፥ “ኤሮ፥ ደንድድ ኦለቶ” ያግስ። ሄሳ ግሾ፥ ብንያመፐ ሳኦላ ናኣ እያቡስተስ ታማነ ናምኡ አሳት ከይድ፥ ዳዊታስ ኤቅዳ ታማነ ናምኡ አሳታራ ኦላ ጋሄትዶሶና። እሶይ እሶይ ባ ሞርክያ ሁጵያ ኦይክድ፥ ማሻን ምየን ጫድስ፤ ሄሳዳ ሀንድ ላታማነ ኦይዳይ ሀይቅዶሶና። ሄሳ ግሾ ጋባኦናን ደእያ ሄ በሳይ ማሻ ቢታ ጌተትስ። ሄ ጋላስ ዎልቃማ ኦላ ኦለትድ፥ ዳዊታ አሳይ አበኔራነ እስራኤለ አሳ ፆንስ።
ፃሩያ ናይት ሄይ እዮኣብ፥ አብስነ አሳሄል ሄ በሳን ደኦሶና፤ አሳሄል ዎሽኤዳ ኤሶን ዎፅድ፥ አሳሄል አበኔራ ኡሻች ዎይኮ ሀድርስ ጎና የደስ። አበኔር ጉየ ስሚድ፥ “አሳሄላ፥ ነኔ?” ያግድ ኦይችስ።
አሳሄል፥ “ኤ ታና” ያግስ።
አበኔር፥ “ኡሻች ዎይኮ ሀድርስ ስማዳ፥ አሳታፐ እሱዋ ኦይካዳ እያ ኦላ ሚሽያ ኤካ” ያግስ። ሽን አሳሄል እያ የደይሳ አጎና እፅስ።
ቃስካ አበኔር፥ “ታኒ ነና ሳአራ ጋዳ ኦይና ደእሽን፥ ታና የደይሳ አጋ! ነና ዎዳ ታኒ ነ እሻ እዮኣባ ሶምኡዋ ዋታዳ ፄላኔ?” ያግድ ዋስስ። ሽን አሳሄል እያ የደይሳ አጎና እፅስ። ሄሳ ግሾ፥ አበኔር ቶራ ጉየ የድድ፥ አሳሄላ ኡሉዋ ጫድን ቶራይ ዞኮራ ካንድ ከይስ። አሳሄል ሄ በሳን ኩንድድ ሀይቅስ፤ አሳሄል ሀይቅዳ በሳ ጋክዳ አሳ ኡባይ ያን ኤቅስ።
ሽን እዮኣብነ አብስ አበኔራ ጎድዶሶና፤ አው ዉልያ ዎደ ጋባኦና መላ ቢታኮ ኤፍያ ኦግያን ጋዳፐ ስን ባጋራ ደእያ አማ ዙማኮ ጋክዶሶና። ብንያመ አሳይ አበኔራኮ ሺቅዶሶና፤ እስ ጩጋ መድ እስ ዙማ ቦላ ኤቅዶሶና። አበኔር እዮኣባ ፄግድ፥ “መርናዉ ኦለትሸ ዳነዬ? ሀይሳ ዉርሰይ ጫሞ ግዳናይሳ ኔኒ ኤርኪ? ነ አሳይ፥ ባንታ እሻታ ጎደይሳ አጋና መላ አይስ ኦድኪ?” ያግስ።
እዮኣብ፥ “ደኦ ፆሳይ ኤሮ! ኔኒ ኦዶናባ ግድያኮ ታ አሳይ ባ እሻታ ሳእ ዎንታና ጋካናዉ ጎዳ አጎኮና” ያግስ። እዮኣብ ሞይዘ ፑንን አሳ ኡባይ ኤስስ። እስራኤለታ ዛር ጎድቦኮና ዎይኮ ኦልቦኮና። አበኔርነ እያ አሳይ ሄ ቃማ ኩመ ሄመትድ አራባ ጋ ጋክዶሶና። ዮርዳኖሰ ሻፋ ፕንድ፥ በትሮና ካንድ ማህናይመ ይዶሶና።
እዮኣብ አበኔራ ጎደይሳ አግድ፥ ባ አሳ ኡባ እስ በሲ ሺሽድ ፄልያ ዎደ፥ አሳሄላ ጉጆና ዳዊታ አሳፐ ታማነ ኡዱፉን አስ ፓጭስ። ሽን ዳዊታ አሳይ አበኔራራ ደእያ ብንያመ ኮቻታፐ ሄ ፄታነ ኡሱፑን ታሙ አስ ዎዶሶና። አሳሄላ አሀ ኤክድ፥ ቤተለመ ካታማን ደእያ እያ አዋ ዱፎን ሞግዶሶና። እዮኣብነ እያ አሳይ ቃማ ኩመ ሄመትድ ሳእ ዎንትያ ዎደ ከብሮና ጋክዶሶና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.