2 ካዎታ 24

1እዮአቄማ ዎደ ባብሎነ ካዎይ ናቡካዳናፆር ይሁዳ ቦላ ደንድስ። እዮአቄም እያዉ ሄ ላይ ሃረትዳፐ ጉየ፥ ናቡካዳናፆራ ቦላ ማካልስ።1 2ጎዳይ ካልዳወታ ፓኖታ፥ ሶረ ፓኖታ፥ ሞአበ ፓኖታነ አሞነ ፓኖታ እዮአቄማ ቦላ የድስ፤ ባ አይለታ ናበታ ባጋራ ጎዳይ ካሰ ኦድዳይሳዳ፥ ይሁዳ ቢታ ይሳናዳ ሀይሳታ የድስ። 3ካዎይ ምናሰይ ኦዳ ናጋራ ጋሶን ጎዳይ ይሁዳ አሳ ባ ስንፈ ድጋናዉ ሀ ዩዋ የድስ። 4እ ፅሎ አሳ ሱ ጉስድ፥ የሩሳላመን ኩንዳ ግሾ፥ ጎዳይ ምናሰስ ሄ ናጋራ አቶ ጋናዉ ኮይቤና።

5እዮአቄም ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 6እዮአቄም ሀይቅድ፥ ባ ማይዛታ ጋክስ፤ እያ በሳን እያ ናአይ ዮአክን ካዎትስ። 7ግብፀ ካዎይ ናምአን ባ ቢታፈ ደንድድ፥ ኦላስ ይቤና፤ ግብፀ ሻፋፐ ዶምድ፥ ብድ ኤፍራፂሳ ሻፋ ጋካናዉ፥ ግብፀ ካዎይ ሃርዳ ቢታ ኡባ ባብሎነ ካዎይ ኤክስ።

ይሁዳ ካዋ ዮአክና

(2 ታር 36:9-10)

8ዮአክን ካዎትያ ዎደ ላይ እያዉ ታማነ ሆስፑና፤ ዮአክን፥ የሩሳላመን ሄ አጌና ካዎትስ። እያ አየ ሱንይ ናስታ፤ እያ የሩሳላመ አድያ ኤልናታና ናአ። 9ዮአክን ባ አዋይ ኦዳይሳዳ፥ ጎዳ ስንን ኢታባ ኦስ።

10ሄ ዎደ ባብሎነ ካዋ ናቡካዳናፆራ ኦላንቾት የሩሳላመ ይድ፥ ካታማ ተቅዶሶና። 11ባብሎነ ካዎይ ናቡካዳናፆር ሄ ካታማ ይስ። 12ይሁዳ ካዎይ እዮአክና፥ እያ አይያ፥ እያ አይለት፥ እያ ሀላቃትነ ካዎ ጋ ሹማት ኡባይ ባብሎነ ካዋስ ኩሸ እምዶሶና።2

ዮአክን ካዎትዳ ሆስፑን ላይን፥ ባብሎነ ካዎይ ዮአክና ቃችስ። 13ፆሳ ኬነ ካዎ ጋን ደእያ ሻሉዋ ኡባ ሄ በሳፈ ደንድ ኤፍስ። ጎዳይ ካሰ ኦድዳይሳዳ ካዎይ ሶሎሞነይ ፆሳ ኬን ጊግስዳ ዎርቃ ሚሸታ ኡባ ባብሎነ ካዎይ ቃንፀረስ። 14ናቡካዳናፆር የሩሳላመ አሳ፥ ሀላቃታ ኡባ፥ ኦላንቾታ ኡባ፥ ኩሸ ሂላንቾታነ ብራታ ቆፀይሳታ ኡባ፥ 10,000 አሳ የሩሳላመፐ ድእድ ኤፍን፥ ቢታን ማንቆ አሳ ፃላል አትስ።

15ናቡካዳናፆር እዮአክና ድእድ፥ እያ አይዉ፥ እያ ማቸታ፥ እያ ሞርናትነ ቢታን ደእያ ግታ አሳ ኡባ ባብሎነ ኤፍስ።3 16ሄ አሳፐ 7,000 አሳት ኦላንቾታ፤ 1,000 አሳት ዱማ ዱማ ኩሸ ሂላንቾታ፤ ኤንቲ ኡባይ ምኖነ ኦላ ኦለታናዉ ዳንዳኤይሳታ። 17ሄሳፈ ጉየ፥ ባብሎነ ካዎይ ዮአክና በሳን እያ አዋ እሻ ማታና ካዎስ፤ እያ ሱን ሰደቅያሳ ያግድ ላምስ።4

ይሁዳ ካዋ ሰደቅያሳ

(2 ታር 36:11-12፤ ኤርም 52:1-3)

18ሰደቅያስ ካዎትያ ዎደ፥ ላይ እያዉ ላታማነ እስኖ፤ እ ታማነ እስ ላይ የሩሳላመን ካዎትስ። እያ አየ ሱንይ አምፃሎ፤ እያ ልባና ካታማን ደእያ ኤርምያሳ ናአ።5 19እዮአቄም ኦዳይሳዳ፥ ሰደቅያስ ጎዳ ስንን ኢታባ ኦስ። 20ጎዳይ ሀንቀትዳ ግሾ፥ የሩሳላመ አሳ ቦላነ ይሁዳ አሳ ቦላ ሀይስ ሀንስ፤ ዉርሰን ኤንታ እ ባ ስንፈ ድግስ።

ሰደቅያስ ባብሎነ ካዋ ቦላ ማካልስ።6