2 ካዎታ 22

ይሁዳ ካዋ እዮስያሳ

(2 ታር 34:1-2)

1እዮስያስ ካዎትያ ዎደ፥ እያዉ ላይ ሆስፑና፤ እ የሩሳላመን ሀስታማነ እስ ላይ ካዎትስ። እያ አየ ሱንይ ይድዳ፤ እያ ባፁሮታ አድያ አዳያ ናአ።1 2እዮስያስ ጎዳ ስንን ሱረባ ኦስ፤ ኡሻች ሀድርስ ጎና ባ ማይዛ ዳዊታ ኦግያን ሄመትስ።

ህገ ማፃፋይ በንትስ

(2 ታር 34:8-28)

3ካዎይ እዮስያስ ባ ካዎትዳ ታማነ ሆስፑን ላይን፥ ማሱላማ ናኣ ናኣ፥ ኤዛላሳ ናኣ፥ ዋና ፃፍያ ሳፋና፥ ፆሳ ኬን ሀይሳዳ ያግድ ኪትስ። 4“አሳይ ፆሳ ኬ ኤህን፥ ፆሳ ኬ ፐንግያ ናገይሳት አሳፐ ሺሽዳ ሚሽያ ታይባናዳ፥ ካህነ ሀላቃ ካልቀኮ ባ። 5ካህነ ሀላቃይ ሚሽያ ፆሳ ኬ ኦራናዉ ሀላቃታስ እማና መላ ኦዳ። ኤንትካ ፆሳ ኬ ኦራያ ኦሳንቾታስ፥ 6አናፀታስ፥ ግምበይሳትስነ ሹቹ ማሰይሳታስ ቃንፆ። ቃስ ፆሳ ኬ ኦራናዉ፥ ምነ ቆኤትዳ ሹቹ ሻመይሳታስ ቃንፆ። 7ኦሱዋ አዋተን ፄለይሳት አማንያ አስ ግድያ ግሾ፥ ኤንታ ኩሸን ገልዳ ሚሽያን አይ አይ ኦዳኮ፥ ኤንታ ኦይቻናዉ ኮሸና”2 ያግስ።

8ሄሳፈ ጉየ፥ ካህነ ሀላቃይ ካልቀይ ዋና ፃፍያ ሳፋናኮ፥ “ህገ ማፃፋ ፆሳ ኬን ደማስ” ያግስ። ማፃፋ ሳፋናስ እምን ሳፋን ኤክድ ናባብስ።

9ዋና ፃፈይ ሳፋን ካዋኮ ብድ፥ “ፆሳ ኬን ደእያ ሚሽያ ነ ሹማት ኤክድ፥ ፆሳ ኬ ኦራናዉ ሀላቃታስ እምዶሶና” ያግስ። 10ካልድ፥ ዋና ፃፈይ ሳፋን፥ “ካህነይ ካልቀይ ታዉ እምዳ ማፃፋ ሀይሳ በአ” ያግድ ካዋ ስንን ማፃፋ ናባብስ።

11ናባብን ካዎይ ህገ ማፃፋን ደእያ ቃላ ስእዳ ዎደ፥ አዛንድ ባ ማኡዋ ዳክስ። 12ካዎይ፥ ካህንያ ካልቀ፥ ሳፋና ናኣ አክቃማ፥ ምክያሳ ናኣ አክቦራ፥ ዋና ፃፍያ ሳፋናነ ካዋ ኦሳንቹዋ አሳያ ሀይሳዳ ያግድ ኪትስ። 13“ብድ፥ ታ ግሾ፥ ሀ አሳ ግሾነ ይሁዳ ኡባ ግሾ፥ ሀ በንትዳ ማፃፋ ቃላባ አነ ጎዳ ኦይችተ። ኑኒ ፃፈትዳ ኡባባ ኦናዉ፥ ኑ ማይዛት ሀ ማፃፋ ቃላስ ኪተትቦና ግሾ፥ ኑ ቦላ ሱልዳ ጎዳ ሀንቆይ ዳሮ” ያግስ።

14ያግን ካህነይ ካልቅያስ፥ አክቃም፥ አክቦር፥ ሳፋንነ አሳይ ማጫ ናብዉ ህልዳና ኦይቻናዉ ብዶሶና። ህልዳና ሀርሃሳ ናኣ ትቅዋ ናአ፥ ፆሳ ኬ ማኡዋ ናግያ ሳሌማ ማቾ። እያ የሩሳላመን ናምአን ጉታን ደአውሱ። ሄ ብዳ አሳት ኢራ ኦደትዶሶና።

15ህልዳና፥ “ጎዳይ እስራኤለ ፆሳይ ሀይሳዳ ያጌስ፤ ህንተና ታኮ ኪትዳ አድያስ ኦድተ። 16ጎዳይ ሀይሳዳ ያጌስ፤ ‘ይሁዳ ካዎይ ናባብዳ ማፃፋን ፃፈትዳ ኢታ ቃላ ኡባ ታኒ ሀ በሳኒኔ ኢያን ደእያ አሳ ቦላ ኤሀና ሀናይስ። 17ኤንቲ ታና አግድ፥ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦዳባ ኡባን ታና ሀንቀዶሶና። ሄሳ ግሾ፥ ታ ሀንቆይ ሀ በሳ ቦላ ኤፅስ፤ ቶአናዉ ዳንዳኤና’ ያጌስ። 18ጎዳ ኦይቻናዉ ህንተና ኪትዳ ካዋኮ ሀይሳዳ ያግተ፤ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ። 19ታኒ ሀ በሳኒኔ ኢያን ደእያ አሳ ባደስነ ዮስ አዳ እማና ግዳ ቃላ ስእዳ ዎደ፥ ነ ዎዛናይ ሹግን፥ ታ ስንን ነና ካዉሽዳ ግሾነ ነ ማኡዋ ዳካዳ፥ ታ ስንን ዬክዳ ግሾ፥ ታኒ ነ ዎሳ ስአስ። 20ሄሳ ግሾ፥ ታኒ ነና ሳሮን ነ ማይዛታን ጋና፤ ኔኒ ሳሮ ሞገታና። ታኒ ሀ በሳኒኔ ኢያን ደእያ አሳ ቦላ ኤሀና ኢታባ ነ አይፈይ በኤና’ ያጌስ” ያጋሱ። ኤንቲ ብድ፥ ሀ ኦደትዳባ ካዋስ ኦድዶሶና።