2 ታርከ 15

ካዎይ አስ ኤህዳ ላመ

1ኦዴዳ ናኣ አዛርያሳ ቦላ ፆሳ አያናይ ዎስ። 2ካዋ አሳራ ጋሄታናዉ አዛርያስ ብድ፥ “አሳ፥ ይሁዳ አሳዉነ ብንያመ አሳዉ ስእተ! ህንተ ጎዳራ ግድኮ እካ ህንተራ ግዳና። ህንተ እያ ኮይኮ እ ህንተዉ በንታና፤ ሽን ህንተ እያ አግኮ እ ህንተና አጋና። 3እስራኤለ አሳይ ቱማ ፆሲ ባይና፥ ታማርስያ ካህነይነ ህገይ ባይና ዳሮ ዎደ ደእዶሶና። 4ሽን ባንታና መቶይ ጋክዳ ዎደ ኤንቲ ጎዳኮ፥ እስራኤለ ፆሳኮ ስሚድ እያ ኮይን እ ኤንታዉ በንትስ። 5ሄ ዎደ ቢታን ደእያ አሳ ኡባይ ዳጋማን ደእያ ግሾ ሳሮተን ከይድ ገልያ ኦንካ ባዋ። 6ፆሳይ ኤንታ ዱማ ዱማ መቶን የግዳ ግሾ ደረይ ደርያ፥ ካታማይ ካታማ ኡንኤስ። 7ግዶሽን፥ ህንተ፥ ህንተ ኦሱዋስ ዎይቶይ ደእያ ግሾ ምንተ፤ ጉየ ጎፕተ!” ያግስ።

8ካዎይ አስ ሀ ቃላነ ኦዴዳ ናአይ ናበይ አዛርያስ ኦድዳ ቃላ ስእዳ ዎደ ምንስ። አስ ይሁዳነ ብንያመ ቢታ ኡባፈነ እ ኦይክዳ ደረይ ዳርያ ኤፍሬማ ቢታን ደእያ እፀትዳ ኤቃ ምስለታ ይስስ። ፆሳ ኬ ስንን ደእያ ጎዳ ያርሾ በሳ ኦራስ።

9እያ ጎዳይ ፆሳይ እያራ ደኤይሳ በእዳ ግሾ ዳሮ አሳይ እስራኤለፐ እያኮ ይዶሶና። ይሁዳ አሳነ ብንያመ አሳ ኡባ፥ ኤንታራ ደእያ ኤፍሬማ ኮቻታ፥ ምናሰ ኮቻታነ ስሞና ኮቻታ አስ ሺሽስ። 10አስ ካዎትዳ ታማነ እቻሻን ላይን፥ ሄን አጌናን አሳይ የሩሳላመን ሺቅዶሶና። 11ሄ ጋላስ ኤንቲ ድእድ ኤህዳባፐ ላፑን ፄቱ ኮርማታነ ላፑን ሙኩሉ ዶርሳታ ጎዳስ ያርሽዶሶና። 12ጎዳ ባንታ አዋታ ፆሳ ባንታ ኩመ ዎዛናንነ ባንታ ኩመ ሸምፑዋን ኮያናዉ ጫቅዶሶና። 13ጎዳ እስራኤለ ፆሳ ኮዮና አስ፥ ናአ ግድን ጭም፥ አደ ግድን ማጭ ሀይቆ። 14ሄሳ ግታ ዋሶን፥ እልልሳን፥ ሞይዘንነ ዛየን ባንታ ጎዳስ ጫቅዶሶና። 15ይሁዳ አሳ ኡባይ ባንታ ኩመ ዎዛናን ሀ ጫቁዋ ጫቅዳ ግሾ ኡፋይትዶሶና። ጎዳ ኤንቲ ምንድ ኮይን እ ኤንታዉ በንትስ። ጎዳይ ኤንታዉ ኡባ ባጋራ ዎፓ እሚስ።

16ቃስ፥ ካዎይ አስ ባ አዋ አይያ ማእካ አሼራ ጌተትያ ማጫ ፆሴ ኤቃ ምስለ ኦዳ ግሾ ካዋ አይዉ ጌተትያ ቦንቹዋፈ እዮ ድግስ። አስ ሄ ኤቃ ምስልያ ቃንፀረድ ቀድሮና ዛንጋራን ፁግስ። 17ቃ ጎይኖ በሳታ እስራኤለ ቢታፈ ይሶና እፅኮካ አስ ባ ደእዳ ላይ ኡባን ጎዳስ አማነትዳ አስ ግድድ ደእስ። 18እነ እያ አዋይ ጎዳስ ዱማይዳ ብራ፥ ዎርቃነ ሀራ ሚሸታ ኤህድ ፆሳ ኬን ዎስ። 19አስ ካዎትዳ ሀስታማነ እቻሻን ላይ ጋካናዉ ኦል ባዋ።