ጌሻ ማፃፋ
1 ሳሜላ 26
ዳዊቲ ዛርድካ ሳኦላ ዎና አግስ
ዚፋ አሳይ ሳኦላኮ ግብአ ብድ፥ “ዳዊቲ ያስሞና ስንን ደእያ ሀክላ ዙማን ቆሰትስ?” ያግዶሶና። ሳኦል፥ እስራኤለታፐ ዶረትዳ ሄ ሙኩሉ አስ ኤክድ፥ ዳዊታ ኮያናዉ ዚፋ መላ ቢታ ብስ። ሳኦል ያስሞና ስንን ደእያ ሀክላ ዙማ ቦላ ደእያ ኦግያ ማታን ዱንካንስ፤ ሽን ዳዊቲ ሄ መላ ቢታን ኡትስ። ሳኦል እያ ካልድ ይዳይሳ ዳዊቲ ኤርዳ ዎደ፥ ዎችያ አስ የድድ፥ ሳኦል ቱማ ሄ በሳ ጋክዳይሳ ሻክድ ኤርስ። ዳዊቲ ደንድድ፥ ሳኦል ዱንካንዳ በሳ ብድ ሳኦልነ ቶራ ሞጮናይ ኔራ ናአይ አበኔር ዝንእዳ በሳ በእስ። ሳኦል ዱንካንዳ ጉታን ኦላንቾት እያ ዩሹዋ ተቅን እ ስክስ።
ዳዊቲ ህተ አድያ አብመለከነ ፃሩያ ናኣ እዮኣባ እሻ አብሳያ፥ “ሳኦል ዱንካንዳ በሳ ታራ ባናይ ኦኔ?” ያግድ ኦይችስ።
አብሳይ፥ “ታኒ ኔራ ባና” ያግስ።
ሄሳ ግሾ፥ ዳዊቲነ አብሳይ ሄ ቃማ ኦላንቾታኮ ያ ዎደ ሳኦል ባ ሁጰ ሶን ቶራ ኤስድ፥ ዱንካንያ ግዶን ዝንእዳይሳ ደምዶሶና። አበኔርነ ኦላንቾት እያ ዩሹዋን ዝንእዶሶና።
አብሳይ፥ “ፆሳይ ነ ሞርክያ ሀች ነ ኩሸን አድ እሚስ፤ ታኒ ቶራን እያ እስ ቶሆ ሳአራ ኦይዳ ጫዳና፤ እያ ዛራ ጫዳናዉ ኮሸና” ያግስ።
ሽን ዳዊቲ አብሳያኮ፥ “ኔኒ እያ ዎፓ፤ ጎዳይ ትይዳ ካዋ ቦላ ባ ኩሽያ ደንያ ኦናካ ጎዳይ ሴራና። ደኦ ጎዳይ ኤርያ መላ፥ ፆሳይ እያ ዎና፤ እ ባ ጋላሳን ዎይኮ ኦላን ሀይቃና። ጎዳይ ትይዳ ካዋ ቦላ ታ ኩሽያ ደንናዳ ታና ጎዳይ ተቆ። አነ እያ ሁጰ ሶን ደእያ ቶራነ ሃ ኦይክያ ሚሽያ ኤክድ ቦስ” ያግስ።
ዳዊቲ ሳኦላ ሁጰ ሶን ደእያ ቶራነ ሃ ኦይክያ ሚሽያ ኤክን፥ ኤንቲ ብዶሶና። ኤንታ ኦንካ በእቤና ዎይኮ ኦንካ ኤርቤና ዎይኮ ኦንካ ባርክቤና። ጎዳይ ኤንታ ቦላ ዎልቃማ ስኮ የድዳ ግሾ ኡባይ ስኮ ሀይቅ አግዶሶና።
ዳዊቲ ሄፍን ፕንድ፥ ኤንታፈ ሃክድ ሀራ ደረ ቦላ ከይድ ኤቅስ። ዳዊቲ ሳኦላ ኦላንቾታነ ኔራ ናኣ አበኔራ ፄግድ፥ “አበኔራ፥ ታኒ ፄግያ ዎደ ስእኪ?” ያግድ ዋስስ።
አበኔር፥ “ቃላ ቁ ኦ ፄግድ ካዋ ስኮ ድገይ ኦኔ?” ያግስ።
ዳዊቲ፥ “ኔኒ ዎዛናማ አስ ግድኪ? እስራኤለ ግዶን ነ መላ አስ ኦኔ? ያትን፥ ካዋ፥ ነ ጎዳ አይስ ናግኪ? እስ አስ ካዋ፥ ነ ጎዳ ዎናዉ ብስ። ነ ኦዳባይ ሎኦ ግደና። ደኦ ጎዳይ ኤርያ መላ፥ ነነ ነ ኦላንቾት ፆሳይ ትይዳ ህንተ ጎዳ ናግቦና ግሾ ህንተ ሀይቃናዉ በሴስ። ካዋ ቶራይነ እያ ሁጰ ሶን ደእያ ሃ ኦይክያ ሚሸይ አዉን ደእያኮ በአ” ያግስ።
ዳዊታ ቃላ ግደይሳ ሳኦል ኤርድ፥ “ታ ናአዉ ዳዊታ፥ ሄስ ነ ቃሌ?” ያግስ።
ዳዊትቲ፥ “ኤ፥ ታ ጎዳዉ፥ ካዋዉ፥ ሄስ ታ ቃላ። ታ ጎዳዉ፥ ታና ነ አይልያ ኔኒ አይስ ካላይ? ታኒ አይ ኦድና? ታ ባላይ አይቤ? ታ ጎዳዉ፥ ካዋዉ፥ ኔኒ ነ አይልያ ቃላ ስአና መላ ታ ነና ዎሳይስ። ጎዳይ ነና ታ ቦላ ደንዳባ ግድኮ፥ እ ያርሾ ኤኮ። ሽን አስ ነና ደንዳባ ግድኮ፥ ‘ባዳ ሀራ ፆሳታ ጎይና’ ያግዶሶና። ጎዳ ቢታን ታዉ ደእያ ላታፐ ኤንቲ ታና ጎድዳ ግሾ ኤንቲ ጎዳ ስንን ባደትዳባ ግዶ! ሀእ ጎዳ ስንፈ ሃክድ፥ አላጋ ቢታን ደእያ ኡራ ሱ ጉሶፋ። እስ አስ ኩራቾ ሻንካታናዉ ደረ ቦላ ከየይሳዳ፥ እስራኤለ ካዎይ ካስቶለ ኮያናዉ ከይስ” ያግስ።
ሳኦል፥ “ታኒ ነና ቆሀስ። ታ ናአዉ፥ ዳዊታ፥ ሃ ስማ! ሀች ነ ታ ሸምፕዉ ሀይቆፐ አሽዳ ግሾ ታኒ ነና ዛራዳ ገንከ። ቱማ ታኒ ኤያባ ሀናስ፤ ግታ ባላ ባላስ” ያግስ።
ዳዊቲ ዛሪድ፥ “ካዋዉ፥ ነ ቶራይ ሀይስሽ፥ ነ አሳፐ እስ አስ ይድ ኤኮ። እስ እስ አሳስ እያ ፅሎተ መላነ እያ አማነተ መላ ጎዳይ ጋተ ቃንፄስ። ሀች ጎዳይ ነና ታ ኩሸን አድ እሚስ፤ ሽን ጎዳይ ትይዳ ካዋ ቦላ ታኒ ታ ኩሽያ ዎናዉ ኮያብከ። ሀች ነ ሸምፑዋ ታ አሽዳይሳዳ ጎዳይ ታና መቶ ኡባፈ አሽድ ቦንቾ” ያግስ።
ሳኦል፥ “ታ ናአዉ፥ ዳዊታ፥ ኔኒ አንጀታ። ኔኒ ግታባ ኦና፤ ነዉ እንጀታና” ያግስ። ዳዊቲ ባ ኦግያ ብስ፤ ሳኦልካ ባ ሶ ስምስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.