ጌሻ ማፃፋ
1 ሳሜላ 20
ዮናታን ዳዊታ ማድስ
ዳዊቲ ራማን ደእያ ናዮታፐ ባቃትድ፥ ዮናታናኮ ብድ፥ “ታኒ አይ ኦድና? ታ ባላይ አይቤ? ነ አዋይ ታና ዎናዉ ኮየይ ታኒ እያ አይ ቆህኔ?” ያግድ ኦይችስ።
ዮናታን፥ “ሄስ ኔፐ ሃኮ፤ ኔኒ ሀይቃካ። ጉባ ግድን፥ ግታባ ግድን፥ ታ አዋይ ታፐ ቆስድ አይኮካ ኦና። ታ አዋይ ታፐ አይስ ሄሳ ቆስዴ? ሄስ ሀነና” ያግድ ዛርስ።
ሽን ዳዊቲ፥ “ነ ታና ዶሰይሳ ነ አዋይ ሎይ ኤሬስ። እ ባ ዎዛናን፥ ዮናታን ሀ ኦዳ ኤሮፖ፤ እ ኤርኮ አዛናና” ያግስ። ሽን፥ “ደኦ ፆሲ ኤርያ መላ፥ ነ ሸምፖይ ኤሮ፤ ታፐነ ሀይቆፐ ግዶን እስ ታንጎ ፃላል አትስ” ያግድ ጫቅስ።
ዮናታን፥ “ኔኒ ኦ ግዳባ አይባካ ታኒ ነዉ ኦና” ያግስ።
ዳዊቲ ዛሪድ፥ “ዎንቶ አጌና ፄሮ ባኣለ ቦንችያ ጋላስ፤ ታኒ ካዉዋራ ካ ማናዉ ኮሼስ። ሽን ዎንት ፔእን ኦማርስ ጋካናዉ ታኒ ጋደን ቆሰታና። ነ አዋይ ታና ኮይኮ፥ ኔኒ፥ ‘ዳዊቲ ባ አሳራ ላይ ያርሾ ያርሽያ ዎደ ግድያ ግሾ ባ ሶ ቤተለመ ባናዉ ታና ኦይችድ ብስ’ ያጋ። እ፥ ‘ያኮ ሎኦ’ ጊኮ፥ ታዉ ነ አይልያስ ሳሮ፤ ሽን እ ሀንቀትኮ፥ እ ታና ቆሀናዉ ባ ዎዛናን ቆፕዳይሳ ሄሳን ኤራ። ሽን ኔኒ ታዉ ነ አይልያስ ሎኦባ ኦ፤ ኔኒ ታራ ነ አይልያራ ጎዳ ስንን ጫቃዳሳ። ታኒ ባላ ግድኮ፥ ታና ነ ዎ፤ ነ አዋስ ታና አዳ እሞፋ” ያግስ።
ዮናታን፥ “ሄስ ኔፐ ሃኮ፤ ታ አዋይ ነና ቆሀናዉ ቆፕዳባ ታ ኤርዳኮ፥ ነዉ ኦድክና?” ያግስ።
ዳዊቲ “ነ አዋይ ነዉ ኢታ ዛሮ ዛርኮ፥ ታዉ ኦዳናይ ኦኔ?” ያግድ ኦይችስ።
ዮናታን፥ “ሃያ፤ ጋደ ቦስ” ያግን፥ ናምአይ ጋደ ብዶሶና።
ዮናታን ዳዊታኮ፥ “ጎዳይ እስራኤለ ፆሳይ ኤሮ፥ ታኒ ዎንት ፔእን ታ አዋይ ነባ ግያባ ስአዳ ነዉ እ ቆፕያ ቆፋይ ሎኦ ግድኮ ታኒ ኪታዳ ነና ኤርሳና። ሽን ታ አዋይ ነና ቆሀናዉ ኮያባ ግድኮ፥ ሄሳ ታኒ ነና ኤርሶናነ ኔኒ ሳሮን ከሳ ኤካና መላ ኦና እፅኮ፥ ጎዳይ ታና ፕርዶ፤ ጎዳይ ታ አዋራ ግድዳይሳዳ ኔራ ግዶ። ታ ደኦ ላይ ኡባን ታ ሀይቆና መላ ጎዳ ሲቁዋ ታና በሳ። ጎዳይ ዳዊታ ሞርከታ ኡባ ቢታፈ ይስያ ዎደካ ነ ሲቁዋ ታ ሶ አሳስ በሳ” ያግስ።
ሄሳ ግሾ፥ ዮናታን፥ “ጎዳይ ዳዊታ ሞርከታ ፕርዶ” ያግድ ዳዊታ ሶ አሳራ ጫቅስ። ዮናታን ዳዊታ ባ ሁጰዳ ዶስያ ግሾ፥ “ኔኒ ታና ቱማ ዶሰይሳ ቆንጭሳናዉ ታዉ አነ ናምአን ጫቃ” ያግስ።
ሄሳፈ ጉየ፥ ዮናታን፥ “ዎንቶ አጌና ፄሮ ባኣለ ቦንችያ ጋላስ፤ ኔኒ ኡትያ በሳይ መላ አትኮ ነ ባይናይስ ኤረታና። ዎንት ፔእን ኦማርስ ባዳ፥ ሀ መቶይ ዶምዳ ጋላስ ኔኒ ቆሰትዳ በሳን፥ ኤፀላ ዛላፈ ጉየራ ቆሰታ። ታኒ እስባ ቦላ ፆንግያ አሳዳ ሀናዳ ሄ ዶንገ ቶራታ ሄ ዛላ ምየ የዳና። ሄሳፈ ጉየ፥ ‘ባዳ ዶንገ ቶራታ ኮያ’ ያጋዳ እስ ናአ ኪታና። ታኒ እያኮ፥ ‘ዶንገ ቶራት ኔፐ ሀ ባጋራ ደኦሶና፤ ሃ ኤካዳ ያ’ ግያባ ግድኮ፥ ሃያ፤ ደኦ ጎዳይ ኤርያ መላ፥ ነዉ ሳእ ሳሮ፤ ነና አይኮይካ ቦቸና። ሽን ታኒ ናኣኮ፥ ‘ዶንገ ቶራት ኔፐ ህን ባጋራ ደኦሶና’ ግያባ ግድኮ፥ ኔኒ አጋዳ ባ፤ ጎዳይ ነ ባና መላ ኮይያ ግሾ ባ። ኔራ ታራ ኦደትዳ ኦዳስ ጎዳይ ኑ ግዶን መርናዉ ማርካ” ያግስ።
ሄሳ ግሾ፥ ዳዊቲ ጋደን ቆሰትስ። አጌና ፄሮ ባኣለ ቦንችያ ጋላስ ጋክዳ ዎደ ካዎይ ሳኦል ግብራ ቦላ ኡትስ። ካዎይ ባ ኡትያ በሳን ጎዳ ማታን ኡትስ፤ ዮናታን እያፐ ስን ባጋን፥ አበኔር ሳኦላ ማታን ኡትስ፤ ሽን ዳዊታ በሳይ መላ ደኤስ። ሳኦል ሄ ጋላስ አይኮካ ግቤና። ሳኦል ባ ዎዛናን፥ “ዳዊቲ ዎጋዳ ጌዮና መላ እስባይ እያ ጋክስ፤ እ ጌይቤና” ያግድ ቆፕስ። ሽን ዎንተ ጋላስ፥ አጌናይ ፄርን ናምአን ጋላስ ዳዊታ በሳይ መላ ደኤስ። ሳኦል ባ ናኣ ዮናታና ፄግድ፥ “እሰየ ናአይ ዝነካ ሀችካ ግብራ ማናዉ አይስ ይበኔ?” ያግድ ኦይችስ።
ዮናታን፥ “ዳዊቲ ቤተለመ ባና ግድ ታና ምንድ ኦይችስ። እ ታኮ፥ ‘ኑ ሶ አሳይ ካታማን ያርሾ ያርሽያ ግሾነ ታ ያን በንታና መላ ታ እሻይ ታና ኪትዳ ግሾ ታና የዳርክ። ታ ነ ስንን ሳባ ደምዳባ ግድኮ ታኒ ታ እሻታ በአና መላ ታና የዳ’ ያግድ ኦይችስ። ካዋ ግብራፐ ማናዉ እ ዮናይ ሄሳ ግሾሳ” ያግድ ዛርስ።
ሳኦል ዮናታና ቦላ ሸነ ኤፅ ከይድ፥ “ላ፥ ጌላነ ማካላንቾ ማጫሰ ናአዉ፥ ኔኒ ነዉ ካዉሸ፥ ነ አየስ ዬላ ኤሀናዉ እሰየ ናኣራ ላገተይሳ ታ ኤርክናዬ? እሰየ ናአይ ሀ ሳአ ቦላ ደእዳ ፔሻን ነ ዎይኮ ነ ካዎተይ ኤቀና። ሀእ ኪታዳ ኤለ ኤህሳ፤ እ ሀይቃናዉ በሴስ” ያግስ።
ዮናታን ባ አዋ፥ “እ አይስ ሀይቂ? እ አይ ኢታባ ኦዴ?” ያግድ ኦይችስ።
ሳኦል ዮናታና ዎናዉ ቶራ እያ ቦላ ፆንግስ። ሄሳ ግሾ፥ ዮናታን ባ አዋ ሳኦል፥ ዳዊታ ዎናዉ ቆፕዳይሳ ጌሽድ ኤርስ። ዮናታን ሸነትድ ግብራ ቦላፈ ደንድስ፤ ባ አዋይ፥ ዳዊታ ካዉሽዳ ግሾ ዮናታን አዛንድ፥ አጌና ፄሮ ባኣለ ቦንችያ ናምአን ጋላስ ካ ምቤና።
ዮናታን ባራ እስ ናአ ኤክድ ዎንታ ጉራ ዳዊታራ ጋሄታናዉ ጋደ ብስ። ዮናታን፥ “ታኒ ዱክያ ዶንገ ቶራታ ዎፃ ባዳ ኤካዳ ያ” ያግስ። ናአይ ዎፅያ ዎደ እስ ዶንገ ቶራ ሄፍን ዱክስ። ናአይ ዮናታና ዶንገ ቶራይ ዎዳ በሳ ጋክያ ዎደ ዮናታን ናኣ ፄግድ፥ “ዶንገ ቶራይ ኔፐ ህን ባጋራ ደኤኔ?” ዮናታን ናኣ፥ “ኤለሳ፤ ባ፤ ኤቆፋ” ያግድ ባ ቃላ ቁ ኦድ ኦድስ። ናአይ ዶንገ ቶራ ማፅድ ባ ጎዳስ ኤህስ። ዮናታናፐነ ዳዊቲፐ አትሽን፥ ናአይ ሄ ፁራ ኤረና። ዮናታን ባ ኦላ ሚሽያ ናኣስ እምድ፥ “ሀይሳ ካታማ ኤካዳ ባ” ያግስ።
ናአይ ብዳፐ ጉየ፥ ዳዊቲ ሄ ዛላ ጉየፐ ከይድ ዮናታና ስንን ጉልባትድ፥ ባ ሶምኡዋ ሳአ ጋድ ሄ ቶሆ ዝግስ። ሄሳፈ ጉየ፥ እሶይ እሱዋራ ዬረትድ ዬክዶሶና፥ ሽን ዳዊቲ ዮናታናፐ አ ዬክስ።
ዮናታን፥ “ሳሮ ባ፤ ‘ነ ግዶንነ ታ ግዶን፥ ነ ኮቻ ግዶንነ ታ ኮቻ ግዶን፥ ጎዳይ መርናዉ ማርካ ግዶ’ ያግድ ኑ ናምአይ ጎዳ ሱንን ጫቅዳ” ያግስ። ሄሳፈ ጉየ፥ ዳዊቲ ደንድድ ብስ፤ ዮናታንካ ካታማ ጉየ ስምስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.