ጌሻ ማፃፋ
1 ካዎታ 6
ፆሳ ኬይ ኬፀትስ
እስራኤለ አሳይ ግብፀ ቢታፈ ከይዳ 480 ላይን፥ ሶሎሞነይ እስራኤለ ቦላ ካዎትዳ ኦይዳን ላይን፥ ዚፋ ጌተትያ ናምአን አጌናን፥ ሶሎሞነይ ጎዳ ፆሳ ኬ ኬፃናዉ ዶምስ። ሶሎሞነይ ኬፅዳ ፆሳ ኬይ አዱሳተይ ኡሱፑን ታሙ ዋ፤ ጎምፓይ ላታሙ ዋ፤ ጌሳይ ሀስታሙ ዋ። ፆሳ ኬ ገልያ በሳን ደእያ ባራንዳ ጎምፓይ ፆሳ ኬ ጎምፓ መላ ላታሙ ዋ፤ ኬ አዱሳተይ ፆሳ ኬ ገልያ በሳ ጋካናዉ ታሙ ዋ። ፆሳ ኬስ ሶ ባጋራ ዳልጋ፥ ካረ ባጋራ ፁን ማስኮተት ደኦሶና። ፆሳ ኬ ማታን፥ ጌሻ በሳነ ኡባፋ ጌሻ በሳ ዩሹዋን ሀራ ፖቀ ኬፅስ፤ ሄ ዩሹዋን ክፍለታ ኬፅስ። ኮይሮ ፖቅያ ጎምፓይ እቻሹ ዋ፤ ናምአን ፖቅያ ጎምፓይ ኡሱፑን ዋ፤ ሄን ፖቅያ ጎምፓይ ላፑን ዋ። እስ እስ ፖቅያ ጎዳይ ጋርሳ ባጋራ ደእያ ጎዳፐ ሌኦ። ጌሻ በሳ ካንድ ገሎና መላ ፆሳ ኬ ጎዳስ ካረ ባጋራ ተቀ ዎስ።
ፆሳ ኬይ ሹቻ ቆእያ በሳን ማሰትዳ ሹቻ ፃላላን ግምበትስ፤ ፆሳ ኬይ ግምበትያ ዎደ ናርቃ፥ ካልታ፥ ዎይኮ ሀራ አይ ብራታ ግርስ ፆሳ ኬን ስኤትቤና።
ጋርሳራ ደእያ ፖቅያ ገልያ ፐንገይ ፆሳ ኬፈ ዱገሀ ባጋራ ደኤስ፤ ሄ በሳፈ ናምአን ፖቅያነ ሄን ፖቅያ ባናዉ የድ ከይያ ደት ደኦሶና። ሄሳዳ ኦድ፥ ሶሎሞነይ ኬ ኬፅድ ዉርስስ፤ ኮርንስያ ማሰትዳ ዝጋ ምን ካምስ። ፆሳ ኬ ዩሹዋን ፖቀታ ኬፅድ ኦንግስ፤ ኤንታ እሱዋ እሱዋ ጌሳይ እቻሹ ዋ ግድድ፥ ጎዳራ ዝጋ ምን ኦይከትስ።
ጎዳይ ሶሎሞነኮ፥ “ሀ ኔኒ ኬፅያ ፆሳ ኬን፥ ኔኒ ታ አዋጁዋ ካልኮ፥ ታ ዎጋ ኦኮ፥ ታ ኪታ ናግኮነ ታ ኪታ ኪተትኮ፥ ታኒ ነ አዋ ዳዊታስ እምዳ ኡፋይሳ ቃላ ነ ባጋራ ፖላና። ታኒ እስራኤለ አሳ ግዶን ዳና፤ ታኒ ታ አሳ እስራኤለ አግከ” ያግስ። ሶሎሞነይ ፆሳ ኬ ኬፅድ ኦንግስ።
ፆሳ ኬ ጋ ባጋ ጎዳ፥ ዉይገፐ ብድ ካራ ጋካናዉ ማሰትዳ ዝጋ ምን ካምስ፤ ዉይግያን ማሰትዳ ፂዳ ም ሂፅስ። ፆሳ ኬ ግዶን ኡባፈ ጌሻ በሳ መናዉ ጉየ ባጋራ ላታሙ ዋ ግድያ በሰ ሻክድ፥ ዉይገፐ ካራ ጋካናዉ ማሰትዳ ዝጋ ጎዳ ኤስስ። ሄ ኡባፈ ጌሻ በሳፈ ስን ባጋራ ደእያ ዉይግያ አዱሳተይ ኦይታሙ ዋ። ፆሳ ኬ ሶ ባጋይ ጎሰነ ጪሻ ምስልያ መዳ ማሰትዳ ዝጋ ምን ካመትስ፤ ኡባይ ዝጋፐ ኦሰትስ፤ አይ ሹችካ በንተና።
ሶሎሞነይ ጎዳ ጫቆ ታቦትያ ዎናዉ ፆሳ ኬ ግዶን ኡባፈ ጌሻ በሳ ጊግስስ። ኡባፈ ጌሻ በሳይ ላታሙ ዋ አዱሰ፥ ላታሙ ዋ ዳልጋነ ላታሙ ዋ ቃ። ሶሎሞነይ ሄ ኡባፈ ገሻ በሳ ጋ ባጋ ዋላህ ባይና ዎርቀን ላንፅስ፤ ያርሾ በሳይ ማሰትዳ ዝጋ ምን ካመትስ። ሶሎሞነይ ፆሳ ኬ ግዱዋ ዋላህ ባይና ዎርቀን ላንፅስ፤ ዎርቃን ላንፀትዳ ቆልአ ገልያ ፐንግያ ቦላ ያነ ሃነ ጋክያ ዎርቃ ሳንላታ ቶልድ አሌቅስስ። ኬ ግዶ ባጋ ዎርቃን ላንፅስ፤ ኡባፈ ጌሻ በሳ ስንን ደእያ ያርሾ በሳ ዎርቃን ላንፅስ።
ኡባፈ ጌሻ በሳን ዎናዉ እሶይ እሶይ ታሙ ዋ አዱቅያ ሻማሆፐ ኦሰትዳ ናምኡ ክሩበ ምስለታ ማስድ ጊግስስ። ኮይሮ ክሩብያ ቀፈይ፥ እሶይ እቻሹ ዋ፤ ናምአንይ እቻሹ ዋ፤ ኮይሮ ቀፍያ ፄራፐ ብድ ናምአን ቀፍያ ፄራ ጋካናዉ ታሙ ዋ። ናምአን ክሩበይ ታሙ ዋ፤ ናምኡ ክሩበታ ሀኖታይነ መይ እስ መላ። እስ ክሩብያ ጌሳይ ታሙ ዋ፤ ናምአን ክሩብያ ጌሳይ ሄሳ መላ። ሶሎሞነይ ፆሳ ኬን ደእያ ኡባፈ ጌሻ በሳን ክሩበታ ዎስ። ኤንታ ቀፈይ ምጨትድ ኡትስ፤ እስ ክሩብያ ቀፈይ እስ ባጋ ጎዳ ቦችያ ዎደ፥ ሀንኮ ክሩብያ ቀፈይ ሀንኮ ባጋ ጎዳ ቦቼስ፤ ኤንታ ናምኣ ቀፈይ ሶ ግዶን እሶይ እሱዋ ቦቾሶና። ሶሎሞነይ ክሩበታ ዎርቃን ላንፅስ።
ቆልአነ ዉይገ ጎዳ ኡባ ክሩበታ፥ ዛምባነ ጪሻ ምስለን አሌቅስስ። ፆሳ ኬ ግዶ ክፍልያ ዉይግያ ካረ ባጋ ክፍልያ ዉይግያ ዎርቃን ላንፅስ።
ኡባፈ ጌሻ በሳ ገልያ ፐንግያን ሻማሆ ምፈ ሳንቃ ጊግስስ። ፐንገ ጎባነታስ እቻሹ ባጋራ ማዛነይ ደኤስ። ሻማሆ ምፈ ኦሰትዳ ናምኡ ሳንቃታ ቦላ ክሩበታ፥ ዛምባነ ጪሻ ምስለ ጊግስድ ሳንቃታ፥ ክሩበታነ ዛምባ ዎርቃን ላንፅስ። ሄሳዳካ፥ ፆሳ ኬ ገልያ ፐንግያ ሻማሆፐ ኦሰትዳ ኦይዱ ማዛነራ ደእያ ሳንቃ ጊግስስ። እ ሄ ፐንግያ እስ እስ ሳንቃይ ግዶን ዳኮትድ ዶየትያ ናምኡ ሳንቃታ ከስስ። ክሩበታ፥ ዛምባነ ጪሻ ምስለታ ኤንታ ቦላ ዎስ፤ ኤንታ ቦላ ዎርቃ እስ ግና ኦድ ላንፅስ።
ሶ ባጋራ ደእያ ዳባባ ግምብስ፤ ሄ ግምብያ ቦላ ማሰትዳ ሄ ሹቹ፥ እሱዋ እሱዋ ቦላ ዎድ፥ እስ ማሰትዳ ዝጋ ኤንታ ቦላ ዎድ ግምብስ።
ፆሳ ኬ ባሶይ ሶሎሞነይ ካዎትዳ ኦይዳን ላይን፥ ዚፋ ጌተትያ ናምአን አጌናን ባሰትስ። ሶሎሞነይ ካዎትዳ ታማነ እስን ላይን፥ ቡላ ጌተትያ ሆስፑን አጌናን ፆሳ ኬይ ሀልችዳይሳ መላ ኬፀትድ ዉርስ። ሶሎሞነይ ፆሳ ኬ ላፑን ላይን ኬፅድ ዉርስስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.