1 ታርከ 16

1ኤንቲ ፆሳ ታቦትያ ኤህድ ዳዊቲ ታቦትያ ዎናዉ ኤስዳ ዱንካንያ ግዶን ዎድ፥ ፁሳ ያርሾነ እስፈተ ያርሾ ፆሳስ ያርሽዶሶና። 2ዳዊቲ ፁሳ ያርሾነ እስፈተ ያርሾ ያርሽድ ፖልዳፐ ጉየ ጎዳ ሱንን አሳ አንጅስ። 3እስራኤለ አሳ ኡባስ ማጫስነ አደስ፥ ሁጰን ሁጰን እስ ሙመ ኡይ፥ እስ ቃንፆ አሾነ እስ ዎይነ ኑካ ግሽስ።

4ጎዳ ታቦትያ ስንን ኦና መላነ ጎዳ እስራኤለ ፆሳ ሳባና መላ፥ ጋላታና መላነ ቦንቻና መላ ጉ ሌወታ ዳዊቲ ሹምስ። 5ሌወታ ሀላቃይ አሳፋ፤ አሳፋ ካልድ ዛካርያሳ። ዛካርያሳ ካልድ ደኤይ ይኤላ፥ ሻምራሞታ፥ ይኤላ፥ ማትታ፥ ኤልኣባ፥ ባናያነ ኦቤድ-ኤዶመ። ኤንቲ ማስንቆነ ዲ ዲፃናዉ ሹመትዶሶና፤ ሽን አሳፍ ዳላ ግርሳናዉ ሹመትስ። 6ካህነይ ባናይነ ያሀዝኤል ፆሳ ጫቆ ታቦትያ ስንን ኡባ ዎደ ሞይዘ ፑናናዉ ሹመትዶሶና። 7ሄ ጋላስ ዳዊቲ አሳፍነ እያ ዳቦት ጎዳ ሳባና መላ ሀ ማዝሙርያ ኮይሮ ኪትስ።

ጋላታ ማዝሙረ

(ማዝ 105:1-15፤ 96:1-13፤ 106:1፥ 47-48)

8ጎዳ ጋላትተ፤ እያ ሱን ፄግተ፤

እያ ኦሱዋ ካዎተታ ግዶን ኦድተ።

9እያ ሳቢተ፤ ጋላታ ማዝሙርያ እያዉ የፅተ፤

ማላልስያ እያ ኦሶ ኡባ ኦድተ።

10እያ ጌሻ ሱንን ጬቀትተ፤

ጎዳ ኮየይሳታ ዎዛናይ ኡፋይቶ።

11ጎዳነ እያ ዎልቃ በእተ፤

ኡባ ዎደ እያ ስን ኮይተ።

12-13ህንተኖ፥ እስራኤለ ኮቻቶ፥

ዶረትዳ ያይቆባ ናይቶ፥

እያ ማላታ፥ እ እምዳ ፕርዳነ ማላልስያባታ ሀሳይተ።

14እ ጎዳ ኑ ፆሳ፤

እያ ፕርዳይ ቢታ ኡባ ቦላና።

15እያ ጫቁዋ መርናዉ

ሙኩሉ የለተ ጋካናዉ፥

እያ ቃላ ናግተ።

16አብራሃመራ ጫቅዳ ጫቁዋ ናጌስ፤

ይሳቃስ ገልዳ ቃላ ምንስ።

17ያይቆባስ ዎጋ፥

እስራኤለስ መርና ጫቁዋ፥

ኦድ ምንስ።

18“ታኒ ነዉ ካናነ ቢታ እማና፤

እ ነ ኮቻስ ላታ ግዳና” ያግስ።

19ሄስ ህንተ ታይቦን ጉነ

ካናነን በተ ግድድ ደእያ ዎደ ሀንስ።

20እስ ደርያፐ ሀራ ደረ ፕንዶሶና፤

እስ ካዎተፈ ሀራ ካዎተ ዩይዶሶና።

21ፆሳይ ኤንታ ኦንካ ናቃና መላ እምቤና፤

ኤንታ ግሾ ካዎታ ሴርስ።

22“ታኒ ትይዳይሳታ ቦቾፍተ፤

ታ ናበታ ቆሆፕተ” ያግስ።

23ሳአን ደእያ አሳ ኡባይ ጎዳስ የፅተ፤

እያ አሹዋ ጋላስ ጋላስ ኦድተ።1

24ካዎተታ ግዶን እያ ቦንቹዋ፥

ማላልስያ እያ ኦሱዋ አሳ ኡባ ግዶን አዋጅተ።

25ጎዳይ ግታ፤ አ ጋላታይ እያዉ በሴስ፤

ፆሳታ ኡባፈ አድ ቦንቸታናዉ በሴስ።

26ሀራ ካዎተታ ፆሳት ኡባይ ኤቃታ፤

ሽን ጎዳይ ሳሎታ መዳ ፆሳ።

27እያ ስንን ቦንቾይነ ቴም ደኤስ፤

ምኖተነ ኡፋይስ እ ደእያ በሳን ደኤስ።

28ህንተኖ፥ ቢታ ካዎተቶ፥

ጎዳ ቦንቾነ ዎልቃ እምተ።

29እያ ሱንስ በሲያ ቦንቾ እምተ፤

ያርሾ ኤክድ እያ ስን ዪተ፤

እያ ጌሻተ ቴማን ጎዳ ጎይንተ።

30ቢታን ደእያ አሳ ኡባይ እያ ስንን ኮኮርተ፤

ሳአይ ምን ኤቅዳ ግሾ ቃፀና።

31ሳሎት ኡፋይቶ፤ ሳእ ሀሹ ጎ!

ካዎተታ ግዶን ኤንቲ “ጎዳይ ካዎትስ!” ያጎ።

32አባይነ እያ ግዶን ደእያ ኡባይ ጉሞ፤

ጋደይነ እያን ደእያ ካ ኡባይ ኡፋይቶ።

33ሄ ዎደ ዎራን ደእያ ም ኡባይ

ኡፋይሳን ጎዳ ስንን የፃና።

እ ሳኣ ቦላ ፕርዳናዉ ዬስ።

34ጎዳይ ኬሀ ግድያ ግሾነ

እያ ሲቆይ መርናሳ ግድያ ግሾ፥

ጎዳ ጋላትተ።

35“አቤት ኑና አሽያ ፆሳዉ ኑና አሻ፤2

ኑኒ ነ ጌሻ ሱን ጋላታና መላነ

ነ ቦንቹዋን ኑ ቦንቸታና መላ፥

ካዎተታ ግዶፈ ሺሻዳ ኑና አሻ” ያግተ።

36ጎዳይ እስራኤለ ፆሳይ፥

መርናፐ መርና ጋካናዉ ጋላተቶ!

አሳ ኡባይ፥ “አምንእ” ግድ፥ ጎዳ ጋላትዶሶና።

37ጎዳ ጫቆ ታቦትያ ስንን ጋላስ ጋላስ ጎይኖስ ኮሽያባ ኡባ ዎደ ኤንቲ ኦና መላ ዳዊቲ አሳፋነ እያ ዳቦታ ዎስ። 38ቃስ ኦቤድ-ኤዶመነ ኡሱፑን ታማነ ሆስፑን እያ ዳቦታ ኤንታራ ኦና መላ ዎስ፤ የዱቱና ናኣ ኦቤድ-ኤዶመነ ሆሳ ፐንግያ ናጋና መላ ዎስ።

39ካህነይ ሳዶቅነ እያራ ኦያ ካህነት ጋባኦናን ደእያ ቃ በሳን፥ ዱንካንያ ስንን ኦና መላ ኤንታ ያን አግስ። 40ጎዳይ እስራኤለስ እምዳ ህግያን ፃፈትዳይሳዳ ኤንቲ ዎንታነ ኦማርስ ኡባ ዎደ ፁሳ ያርሾ ያርሻና መላ ኦስ። 41እያ ሲቆይ መርናሳ ግድያ ግሾ ጎዳ ማዝሙረን ጋላታና መላ ሄማና፥ የዱቱናነ ዶረትዳ ሀራታ ዳዊቲ ኤንታራ እስፈ ዎስ። 42ሄማንነ የዱቱን ሞይዘ ፑኖሶና፥ ዳላ ጊርሶሶና ጋላታ ማዝሙረ የፅሸ ካእያ ሀራ ሚሸታ ካኦሶና። የዱቱና አደ ናይት ፐንግያ ናጋናዉ ሹመትዶሶና።

43ሄሳፈ ጉየ አሳ ኡባይ ባ ሶ ሶ ብስ። ዳዊቲካ ባ ሶ አሳ አንጃናዉ ስምስ።