Gofa Full Bible Ethiopic Version
ሌምሶ 29
ዳሮ ዎደ ሴረትድ ስሞና አስ
ሀሳዮና መቃና፤
ሄ ኡራስ ፓፆይ ባዋ።
ፅሎ አሳት ሹመትያ ዎደ አሳይ ኡፋይቴስ፤
ሽን ኢታት ቢታ ሃርያ ዎደ አሳይ ኡንኤቴስ።
ጭንጫተ ዶስያ አስ ባ አዋ ኡፋይሴስ፤
ሽን ላይማ ማጫሳ ሄራን ዩይያ አስ ባ ሚሽያ ዉርሴስ።
ቱማ ፕርዳን ካዎይ ባ ካዎተ ዎፑ ኦስ፤
ሽን ዎፈ ኤክያ ካዎይ ባ ካዎተ ይሴስ።
ባ ሾሩዋ ጭሞን ሳቢያ አስ፥
ባ ቶሆስ ፅሄ የጌስ።
ኢታ አስ ባ ናጋራን ኦይከቴስ፤
ሽን ፅሎ አስ ኡፋይቴስ፥ የፄስ።
ፅሎ አስ ማንቆታስ ሱረ ፕርዴስ፤
ሽን ኢታ አሳት ሄሳ ኤሮኮና።
ጫይያ አሳት ካታማን ኦሹ ደንሶና፤
ሽን ጭንጫ አሳት ሀንቆ እርፅሶሶና።
ጭንጫ አስ ኤያ አሳ ፕርደ ኬ ኤፍኮ፥
ኤያይ ሀንቀቴስ፤ ቅስ፤ እያዉ ሳሮይ ባዋ።
ሱ ጉሳናዉ ሳሞትያ አሳት ሱረ አስ እፆሶና፤
ፅሎ አሳ ዎናዉ ኮዮሶና።
ኤያ አስ ባ ሀንቁዋ የድ በሴስ፤
ሽን ጭንጫ አስ ባና ሃሬስ።
ሹማይ ዎርዶ ኦዳ ስእያባ ግድኮ፥
እያ ሞርናት ኡባይ ኢታ ግዶሶና።
ማንቆይነ አሰ ናቅያ አስ እስባ ኮፆሶና፤
ኤንታ ናምኣስ አይፈ እምዳይ ጎዳ።
ካዎይ ማንቆታስ ሱረ ፕርድኮ፥
እ ባ አራታን ጋምአና።
ፕርጮን ሴር ናይታስ ጭንጫተ እሜስ፤
ሽን የዳን ድጭዳ ናእ ባ አይዉ ካዉሼስ።
ኢታ አሳት ዳርያ ዎደ ናጋር ዳሬስ፤
ሽን ፅሎት ኤንታ ኩንደ በአና።
ነ ናኣ ሴራ፤
እ ነዉ ሳሮ እማና፤
እ ነና ኡፋይሳና።
ቆንጨ ባይና እፅኮ ደረይ የዳ ግዴስ፤
ሽን ህገ ናግያ አስ አንጀትዳይሳ።
አይለይ ጮ ኦዳ ፃላላን ሴረተና፤
እያዉ ገልያኮካ እ ኪተተና።
ኤሶን ሃሳያ አስ በአ ኤራይ?
እያፐ ኤያ አሳስ ኡፋይስ ደኤስ።
ነ አይልያ ናአ የዳ ድችኮ፥
እያ ዉርሰይ አዛኖ ግዳና።
ሀንቀትያ አስ ኦሹ ደንስ፤
ኤለ ይሎትያ አስ ዳሮ ናጋራ ኦስ።
ኦቶሮይ አሰ ካዉሼስ፤
ሽን አሽከ አያን ደእያ አስ ቦንቸቴስ።
ካይሶራ ላገትያ አስ ባና እፅያ አስ፤
እ ዳባባን ቱማ ኦድኮ ሴረቴስ፤
እ ቱማ ኦዶና እፅኮ ጎዳን ባደታና።
አሳስ ያሽ ሄ ኡራስ ፅሄ ግዴስ፤
ሽን ጎዳን አማነትያ አስ ሳሮ ደኤስ።
ዳሮት ማት ደእያ አሳፐ ማደ ኮዮሶና፤
ሽን ሱረ ፕርድ ጎዳፐ በንቴስ።
ፅሎት ናጋራንቾታ ሻተቶሶና፤
ኢታት ሱረ አሳ እፆሶና።
Gofa Full Bible Ethiopic Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.