Gofa Full Bible Ethiopic Version
እዮባ 19
እዮባ ሃሳያ
እዮብ ዛሪድ ሀይሳዳ ያግስ፤
ህንተ ታና አዉደ ጋካናዉ ማዱንፅሴቲ?
አዉደ ጋካናዉ ህንተ ቃላን ታና ጫደቲ?
ህንተ ታና ታሙ ቶሆ ጫይደታ፤
ታና ካዉሽሸ ዬላተከታ።
ቱማ ታ ባልዳባ ግድኮ፥
ታ ባላይ ታና ኦይቻና።
ህንተ ህንተና ቁ ቁ ኦድ፥
ታ ካዉሻ ታና ሞታናዉ ጎኤትኮ፥
ሀ መቱዋ ታ ቦላ ኤህዳይ ፆሰ ግደይሳነ
ባ ግትያን ታና ገልስዳይ እያ ግደይሳ ኤርተ።
ታ ቆሄታስ ጋዳ ዋስን፥ ታና አለይ ባዋ፤
ታ ቃላ ቁ ኦዳ ዋስንካ ታና ስኤይ ባዋ።
ታ ካንዳ ቦናዳ ፆሳይ ታ ኦግያ ድርስ፤
ታ ሄመትያ ኦግያ ማን ጎርድስ።
ታ ቦንቹዋ ታፐ ቃርስ፤
ታ ካላቻ ታ ሁጰፐ ኤክስ።
እ ታና መንረ የግስ፤
ታ ኡፋይሳ ፃጶራ ሾደትዳ ም መላ ኦስ።
እያ ሀንቆይ ታ ቦላ ኤፅ ከይስ፤
እ ታና ሞርከዳ ታይቤስ።
ታና ኦላናዉ ባ ቶራንቾታ ኪቴስ፤
ኤንቲ ታና ኦላናዉ ሚፃ ኬፅድ፥
ታ ዱንካንያ ዩሹዋን ኡትዶሶና።
ፆሳይ ታ እሻታ ታፐ ሃስስ፤
ታና ኤረይሳት ታዉ አላጋ ግድዶሶና።
ታ ዳቦት ታፐ ሃክዶሶና፤
ታ ላገት ታና ዶግዶሶና።
ታ ሶን ሞከትያ እማት ታና ዶግዶሶና፤
ታ ማጫ አይለት ታና ኦገ አሳዳ ፄልዶሶና።
ታ አይልያ ታ ፄግን ታዉ ኮየና፤
ታ ዎስን ታዉ ኤሮ ጌና።
ታ ማችያ ታ ዶና ፔኑዋ ሻተታሱ፤
ታ እሻት ታና ኡፍዶሶና።
ሀር አቶሽን ጉ ናይት ታና ካኦሶና፤
ታና በእድ ለቆሶና።
ታ ማታ ላገት ኡባይ ታና ኡፎሶና፤
ታ ዶሰይሳት ታዉ ዞኮ ዛርዶሶና።
ታ መቀይ ታ ጎጋራ ኦይከትስ፤
ታኒ ሀይቃ ክቻዳ አታስ።
ታ ላገቶ፥ ፆሳ ኩሸይ ታና ደችዳ ግሾ፥
ታዉ ቃተርከት።
ፆሳይ ታና የደይሳዳ፥ ህንተ ታና አይስ የደቲ?
ሀእ ጋካናዉ ህንተ ታና ዋይስዳይስ ግደኔ?
“ሀእ ጋካናዉ ታ ኦደትዳ ቃላይ ማዝጋበትዳኮ፥
ማፃፋን ፃፈትዳኮ ታ ዶሳይስ ሽን።
መርናዉ ዳና መላ ማርሳንነ
እርሳሰን ዛላ ቦላ ዎጨትድ ፃፈትዳ ግዴረነ!
ታና ዎዝዳይስ ደኦን ደኤይሳነ
ዉርሰን ቢታ ቦላ እ ኤቃናይሳ ታ ኤራይስ።
ታ ጎጋይ ሜተትድ ዉርኮካ፥
ታኒ ታ አሹዋፐ ሻከታዳ ፆሳ በአናይሳ ኤራይስ። ሀራ አስ ግዶና ታኒ ታ ሁጰን፥
ታ አይፈን እያ በአና፤
ታ ዎዛናይ ሄ ቃማ ላሞቴስ።
“ሀ መቱዋስ ጋሶይ እያ፥
ኑ እያ ዋት የደኖ ግድ ህንተ ቆፕያባ ግድኮ፥
ማሻስ ያይተ!
ፆሳ ሀንቆይ ማሻራ ያና፤
ፕርድ ደኤይሳ ኤርተ” ያግስ።
Gofa Full Bible Ethiopic Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.