Gofa Full Bible Ethiopic Version
እዮባ 14
“ማጫሳፐ የለትዳ አሳስ ላይ ቃን፤
እካ ቃስ መቶን ኩምስ።
ጪሻዳ በንትድ ኤለስድ ቆቆፈቴስ፤
ኩያዳ ጋምኦና ኤሶን አስ።
ያትን፥ ኔኒ ሄሳ መላ አስ ካላዬ?
ፕርዳስ ነ ስን ሺሻዬ?
ቱናባፐ ጌሻባ ከሳናዉ ዳንዳኤይ ኦኔ?
ኦንካ ባዋ።
አስ ዳና ላይስ ዛው ደኤስ፤
እ ዳና አጌና ኔኒ ታይባ ዎዳሳ፤
ኔኒ ዎዳ ዛዋፐ አይ ኦንካ ባዋ።
ኡነ ኦያ አስ ባ ኦሱዋ ፖልድ ሸምፐይሳዳ፥
እ ሸምፓና መላ ነ አይፍያ እያፐ ደንዳ እያ አጋጋ።
ቃንፀትዳ ምስ ኡፋይስ ደኤስ፤
ዛሪድ አጬስ፤
ኦራ ታሸ ከስድ ድጬስ።
ም ፃጶይ ቢታ ጋርሳን ጭምኮካ፥
ዱሩማይ ቢታን ዎቅኮካ፥
ሃ ደምድ አጬስ፤
ኦራ ዶላዳ ታሸ ከሴስ።
ሽን አስ ሀይቄስ፤ ሄስ እያዉ ዉርሰ፤
እያ ሸምፖይ ከያፐ ጉየ እ አዉን ደኢ?
አባ ሃ መለይሳዳ፥
ሻፋ ሃ ዉረይሳዳ፥
ሄሳዳ አስካ ሀይቄስ፤ ስሚድ ደንደና፤
ሳሎት አና ጋካናዉ አስ ባርከና፤
ባ ስኩዋፈካ ደንደና።
ኔኒ ታና ዱፎን ገንዳኮ አይበ!
ነ ሀንቆይ አና ጋካናዉ ቆትዳኮ አይበ!
ነ ታዉ ቃሚዳ ሄ ጋላስ ታና ሀሳይዳኮ አይበ!
አስ ሀይቅኮ ስሚድ ደኦን ዳኔ?
ታ ሸምፕያ ዎደይ ያና ጋካናዉ፥
ሀ መቶ ዎደ ኡባ ዳንዳአን ናጋና።
ሄ ዎደ ነ ታና ፄጋና ታካ ኮያና፤
ነ መዳ ታና በአናዉ ላሞትያ ዎደይ ያና።
ሄ ዎደ ኔኒ ቱማ ታ ታንጉዋ ዎቻና፤
ሽን ታ ናጋራ ካላካ።
ታ ባላይ ኦጎሮን ዪጨታና፤
ታ ናጋራ ኔኒ ካማና።
ዙም ዎደይሳዳ፥
ዛል ቃለተይሳዳ፥
ሃ ሹቻ ፃጶ ቦከይሳዳ፥
ድኦይ ቢታ ሜጭድ ኤፈይሳዳ፥
ኔኒ አሳ ኡፋይስ ይሳሳ።
ኔኒ እያ መርናዉ ፆናሳ፤ እ ስመና፤
እያ ማላ ላማዳ ነ ስንፈ ድጋሳ።
እያ ናይት ቦንቸትኮ እ ኤረና፤
ኤንቲ ካዉይኮ እ በኤና።
ሽን እያ አሳተ ሴላይ እያ ፃላላስ ስኤቴስ፤
እ ባ ፃላላስ ዬኬስ” ያግስ።
Gofa Full Bible Ethiopic Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.