Skip to content
BibleKenya

Gofa Full Bible Ethiopic Version

እዮባ 11

ሶፋራ ሃሳያ

ናእማ ቢታፈ ይዳ ሶፋር ዛሪድ፥

“ሀ ሀዳ ሃሳያ ኡባስ ዛሮ እምያ አስ ባዌ?

ዎይኮ ሄሳ ኦድዳ ኡራይ ቱማ ግዳናዉ ዳንዳኢ?

ነ ሀዳ ኦዳይ አሰ ስእ ኦያ ዳኒ?

ነ ቀልቅስያ ዎደ ነና ሴርያ አስ ባዌ?

ኔኒ፥ ‘ታ ትምርተይ ቱማ፤

ታኒ ፆሳ ስንን ጌሽ’ ” ጋሳ።

ፆሳይ ነዉ ኦድያኮ፥

ባ ዶና ዶይድ ኦደትያኮ አይበ!

ጭንጫተስ ዳሮ ኦገይ ደእያ ግሾ፥

ፆሳይ ነዉ ጭንጫተ ፁራ ቆንጭስያኮ አይበ!

ሄ ዎደ ነ ሴረትዳ ሴራይ፥

በሰይሳፈ ጉ ግደይሳ ኤራናሽን።

“ጪሞ ግድዳ ፆሳ ፁራ ኤራናዉ ዳንዳአይ?

ዎይኮ ኡባ ዳንዳእያ ፆሳባ ፕልጋዳ ጋካናዉ ዳንዳአይ?

ኤንቲ ሳሎታፐ ቃ፤ ነ አይ ኦናዉ ዳንዳአይ?

ኤንቲ ስኦለፐካ አዳ ጪሞ፤ ነ ኤራናዉ ዳንዳአካ።

ፆሳ ጭንጫተይ ቢታፈ ዳልጌስ፤

አባፈካ አድ ጪሞቴስ።

እ ይድ ነና ቃሾ ኬን የግያኮ፥

ፕርዳ ኬ ሺሽኮ፥ እያ ድጋናይ ኦኔ?

ፆሳይ ፓና አሳ ኤሬስ፤

ኢታባ በእያ ዎደ ስእ ግድ አገና።

ኤያ አስ ጭንጫ ግደይሳፈ፥

ዎራ ሀረይ አሰ ግድድ የለታናይስ ማታ።

ኔኒ ነ ዎዛና ሱረ ኦኮ፥

ነ ኩሽያ እያኮ ምጭኮ፥

ናጋራ ነ ኩሸፐ ሃስኮ፥

ነ ኬን ኢታባይ ዶና መላ ኦኮ፥

ሄ ዎደ ኔኒ ቁ ጋዳ ዬል ባይና ኡባባ በአን፤

ያሽ ባይና ምናዳ ኤቃና።

ኔኒ ነ መቱዋ ኡባ ዶጋና፤

ጎግድ አዳ ድኦዳ ዛራ ሀሳያካ።

ነ ደኦይ ሴታ ጋላሳ አዋፐ አድ ፖአና፤

ነ ደኡዋ ማይ ዎንታ ፃልቀዳ ፖአና።

ነዉ ኡፋይስ ደእያ ግሾ ኔኒ ህርጎና ዳና፤

ፆሳይ ነና ናግያ ግሾ ዎፑ ጋዳ ዳና።

ኔኒ ያሽ ባይና ስካና፤

ዳሮ አሳይ ነናን ናሸታናዉ ኮያና።

ሽን ኢታት መቶ በእሸ አኬኮኮና፤

እያፐ ባቃትድ አታናዉ ዳንዳኦኮና፤

ኤንታ ኡፋይሳይ ሀይቆ” ያግስ።

Gofa Full Bible Ethiopic Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.