Gofa Full Bible Ethiopic Version
መተ 13
አብራመነ ሎፀ ሻከተ
አብራመይ ባአ ማቺው ሶራነ ባዉ ደእያባ ኡባ ኤክድ ግብፀፈ ነገበ መላ ቢታ ብስ። ሎፀይካ እያራ ዎላ ብስ። አብራመይ ሄ ዎደ መሄን፥ ብራንነ ዎርቃን ዳሮ ዱረትስ።
አብራመይ ናገበፐ ደንድድ በሳፈ በሰ አሸ ቤተለ ጋካናዉ ብስ። ቤተለፐነ ጋየፐ ግዶን እ ኮይሮ ዱንካንያ ቶክዳ በሳነ ጎዳስ ካሰ ያርሾ ያርሽዳ በሳ ጋክድ፥ ያን አብራመይ ጎዳ ሱን ፄግስ።
አብራመራ ዎላ ሄመትያ ሎፀስካ ዳሮ ዶርሳት፥ ዴሻት፥ መሄት፥ ሶ አሳትነ አይለት ደኦሶና። ሄ ዎደ አብራመስነ ሎፀስ ዳሮ መሄይ ደእያ ግሾ ኤንቲ ባንታ መሄታ ሄምያ በሳይ ፁምስ። ሄሳ ግሾ፥ አብራመ መሄታ ሄመይሳታ ግዶንነ ሎፀ መሄታ ሄመይሳታ ግዶን ካች ከይስ። ሄ ዎደ ካናነ አሳትነ ፓርዘ አሳት ሄ ቢታን ደኦሶና።
ሄሳ ግሾ፥ አብራመይ ሎፀኮ፥ “ኑኒ እሻንታ ግድያ ግሾ ኑ ግዶን ዎይኮ ኑ መሄታ ሄመይሳታ ግዶን ካች ዳናዉ በሰና። ቢታይ ዳልጋ ግድያ ግሾ ኑ ዎልፐ ሻከታና። ነ ሀድርሳ ባጋ ቢኮ ታኒ ኡሻቻ ባጋ ባና፤ ኔኒ ኡሻቻ ባጋ ቢኮ ታኒ ሀድርሳ ባጋ ባና” ያግስ። ሎፀይ ቢታ ዩይ አድ ፄልያ ዎደ ዮርዳኖሰ ዛንጋራይ፥ ጎዳ ጋናትያዳ ዎይኮ ዞኣረ ባጋራ ደእያ ግብፀ ቢታ መላ ሃ ኩምዳይሳ በእስ። ሄስካ፥ ሀንዳይ ጎዳይ ሶዶመነ ጋሞራ ጌተትያ ካታማታ ይሳናፐ ስን። ሄሳ ግሾ፥ ሎፀይ ዮርዳኖሰ ዛንጋራ ኡባ ባዉ ዶርድ ዶሎሀ ባጋ ብስ። ሄሳዳ ሀንድ እሶይ እሱዋፈ ሻከትዶሶና። አብራመይ ካናነ ቢታን ደእስ። ሽን ሎፀይ ዛንጋራን ደእያ ካታማታ ግዱዋን ሶዶመ ማታን ባ ዱንካንያ ቶክስ። ሄ ዎደ ሶዶመ አሳይ ዳሮ ኢታነ ጎዳ ስንን ናጋራንቾታ። ሎፀይ አብራመፐ ሻከትዳፐ ጉየ፥ ጎዳይ አብራመኮ፥ “ነ ደእያ በሳፈ ፑደ ቁ ጋዳ ፑደሀ ባጋነ ዱገሀ ባጋ፥ ዶሎሀ ባጋነ ዉሎሀ ባጋ የዳ ፄላ። ሄ ኔኒ በእያ ቢታ ኡባ ታኒ መርናዉ ነዉነ ነ ሼሻስ እማና። ታኒ ነ ሼሻ ቢታ ባናዳ ዳርሳና። ኦንካ ቢታ ባና ታይባናዉ ዳንዳኦናይሳዳ ነ ሼሻይካ ታይበተና። ታኒ ሀ ቢታ ነዉ እማና ግሾ ደንዳዳ ቢታ አዱሳተንነ ዳልጋተን ስመረታ።” ሄሳ ግሾ፥ አብራመይ ባ ዱንካንያ ሾድድ ከብሮናን ደእያ ማምረ ግታ ምታ ማታን ደአናዉ ብስ። ያን ጎዳስ ያርሾ በሲ ጊግስስ።
Gofa Full Bible Ethiopic Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.